ನವದೆಹಲಿ: ಇದು ಲಾಕ್ಡೌನ್ ಸಮಯ. ಲಾಕ್ಡೌನ್ಗಿಂತ ಮುಂಚೆ ಎಲ್ಲೆಲ್ಲೋ ಇದ್ದವರು ತಮ್ಮೂರಿಗೆ ಬರಲಾರದೇ ಪರದಾಡುವ ಅವಧಿಯಿದು. ಮನೆಯಲ್ಲಿ ಒಂಟಿ ವೃದ್ಧರಿದ್ದರೂ, ಅನಾರೋಗ್ಯಪೀಡಿತರಿದ್ದರೂ ಊರು ಬಿಟ್ಟು ಹೋದವರು ವಾಹನವಿಲ್ಲದೇ ವಾಪಸ್ ಬರಲಾಗದೇ ಪರದಾಡುವ ಸಮಯವಿದು.
ಹೌದು. ಇಂಥದ್ದೇ ಒಂದು ಪ್ರಸಂಗ ಎದುರಾದದ್ದು ಅಸ್ಸಾಂನ 78 ವರ್ಷದ ವೃದ್ಧ ಕೆ.ಪಿ.ಅಗರವಾಲ್ ಅವರಿಗೆ. ಅವರ ಹೆಂಡತಿ ಮತ್ತು ಮಕ್ಕಳು ಲಾಕ್ಡೌನ್ ಘೋಷಣೆಯಾಗುವ ಮೊದಲು ಬೆಂಗಳೂರಿಗೆ ಪ್ರಯಾಣ ಬೆಳೆಸಿದ್ದರು. ಅವರು ಅಲ್ಲಿಯೇ ಇದ್ದಾಗ ದಿಢೀರ್ ಲಾಕ್ಡೌನ್ ಘೋಷಣೆಯಾಯಿತು. ಇದರಿಂದ ವಾಪಸ್ ಊರಿಗೆ ಬರಲು ಆಗಲಿಲ್ಲ.
ಮನೆಯಲ್ಲಿ ಅಗರವಾಲ್ ಒಬ್ಬರೇ ಇರುವ ಸ್ಥಿತಿ. ಲಾಕ್ಡೌನ್ ಮುಗಿಯುವ ಸಮಯವನ್ನೇ ಕಾಯುತ್ತಿದ್ದರು ಇವರು. ಒಂಟಿಯಾಗಿದ್ದು ಸೋತು ಹೋಗಿದ್ದರೂ ಏನೂ ಮಾಡದ ಅಸಹಾಯಕರಾಗಿದ್ದರು.
ಮೇ 4. ಇವರು 78 ವರ್ಷ ಮುಗಿಸಿ 79ನೇ ವರ್ಷಕ್ಕೆ ಕಾಲಿಡುವ ದಿನ. ಮನೆಯಲ್ಲಿ ಯಾರೂ ಇರಲಿಲ್ಲ. ತನ್ನವರನ್ನು ನೆನೆದು ಅಗರವಾಲ್ ಅವರು ಭಾವುಕರಾಗಿ ಮನೆಯ ಹೊರಕ್ಕೆ ಕಾಲಿಟ್ಟಾಗ ಅಲ್ಲಿ ಕೆಲವು ಪೊಲೀಸರು ನಿಂತಿದ್ದರು. ಅವರು ಪೋಸ್ಟರ್ ಹಿಡಿದುಕೊಂಡಿದ್ದರು. ಅದರಲ್ಲಿ "ನಾನು ನಿಮ್ಮ ಮಗಳು" "ನಾನು ನಿಮ್ಮ ಮಗ" ಎಂದು ಬರೆಯಲಾಗಿತ್ತು!‘
ಇದೇನಿದು ಎಂದು ನೋಡುವಷ್ಟರಲ್ಲಿಯೇ ಅಲ್ಲಿದ್ದ ಪೊಲೀಸ್ ಅಜ್ಜನ ತಲೆಗೆ ಹುಟ್ಟುಹಬ್ಬದ ಕ್ಯಾಪ್ ಹಾಕಿ, ಅವರಿಗೆ ಕೇಕ್ ತಿನ್ನಿಸಿ ಹುಟ್ಟುಹಬ್ಬದ ಶುಭಾಶಯ ಕೋರಿದರು! ಈ ಅನಿರೀಕ್ಷಿತ ಘಟನೆಯಿಂದ ಭಾವುಕರಾದ ಅಗರವಾಲ್ ಅವರು ಕಣ್ಣೀರಾದರು.
ಇವರು ಮನೆಯಲ್ಲಿ ಒಬ್ಬರೇ ಇದ್ದುದು ಹಾಗೂ ಇವರ ಹುಟ್ಟುಹಬ್ಬದ ಬಗ್ಗೆ ಅಕ್ಕಪಕ್ಕದ ಮನೆಯವರಿಂದ ತಿಳಿದುಕೊಂಡಿದ್ದ ಪೊಲೀಸರು ಹೀಗೊಂದು ವಿಶಿಷ್ಟ ರೀತಿಯಲ್ಲಿ ಹುಟ್ಟುಹಬ್ಬ ಆಚರಿಸಿದ್ದರು.
ಈ ಘಟನೆಯ ವೀಡಿಯೋ ವೈರಲ್ ಆಗಿದ್ದು, ಪೊಲೀಸರ ಕಾರ್ಯಕ್ಕೆ ಎಲ್ಲೆಡೆ ಬಹು ಶ್ಲಾಘನೆ ವ್ಯಕ್ತವಾಗಿದೆ. ಸಾರ್ವಜನಿಕರ ಸೇವೆಯೇ ನಮ್ಮ ಧ್ಯೇಯವಾಗಿದ್ದು, ಲಾಕ್ಡೌನ್ ಅವಧಿಯಲ್ಲಿ ಎಲ್ಲರ ಹಿತವನ್ನೂ ನಾವು ಕಾಪಾಡುತ್ತೇವೆ ಎಂದಿದ್ದಾರೆ ಪೊಲೀಸರು (ಏಜೆನ್ಸೀಸ್)