ನವದೆಹಲಿ : ಭಾರತದ ಈಶಾನ್ಯ ಪ್ರದೇಶದ ಚೈತನ್ಯವನ್ನು ಜೀವಂತವಾಗಿಡಲು 'ಗುಡ್ವಿಲ್ ಜೆಸ್ಚರ್' ಆಗಿ ಮಿಜೊರಾಮ್ ಸಂಸದರ ಮೇಲೆ ದಾಖಲಿಸಲಾಗಿರುವ ಎಫ್ಐಆರ್ಅನ್ನು ವಾಪಸ್ ಪಡೆಯಲಾಗುವುದು ಎಂದು ಅಸ್ಸಾಂ ಸಿಎಂ ಹಿಮಂತ ಬಿಸ್ವ ಸರ್ಮ ಇಂದು ಹೇಳಿದ್ದಾರೆ. ಈ ಬಗ್ಗೆ ಟ್ವೀಟ್ ಮಾಡಿರುವ ಸರ್ಮ, ಆದಾಗ್ಯೂ ಜುಲೈ 26 ರಂದು ನಡೆದ ಉಭಯ ರಾಜ್ಯಗಳ ಗಡಿಕಲಹದ ಪ್ರಕರಣದಲ್ಲಿ ಇತರ ಆರೋಪಿಗಳಾದ ಪೊಲೀಸ್ ಅಧಿಕಾರಿಗಳ ವಿರುದ್ಧ ಕಾರ್ಯಾಚರಣೆ ನಡೆಸಲಾಗುವುದು ಎಂದಿದ್ದಾರೆ.
ಜುಲೈ 26 ರ ಗಡಿ ಗಲಾಟೆಯಲ್ಲಿ ಅಸ್ಸಾಂನ ಆರು ಪೊಲೀಸ್ ಸಿಬ್ಬಂದಿ ಮೃತಪಟ್ಟಿದ್ದರು. ಈ ಹಿನ್ನೆಲೆಯಲ್ಲಿ ಮಿಜೊರಾಮ್ನ ಪೊಲೀಸ್ ಅಧಿಕಾರಿಗಳ ವಿರುದ್ಧ ಮತ್ತು ಮಿಜೊ ನ್ಯಾಷನಲ್ ಫ್ರಂಟ್ನ ರಾಜ್ಯಸಭಾ ಸಂಸದ ಕೆ.ವನ್ಲಾಲ್ವೆನ ಅವರ ವಿರುದ್ಧ ಎಫ್ಐಆರ್ ದಾಖಲಿಸಲಾಗಿತ್ತು. ಮತ್ತೊಂದೆಡೆ, ಮಿಜೊರಾಂ ಪೊಲೀಸರು ಅಸ್ಸಾಂ ಸಿಎಂ ಸರ್ಮ ಅವರ ಹೆಸರನ್ನೂ ಸೇರಿಸಿ ಹಲವರ ವಿರುದ್ಧ ಎಫ್ಐಆರ್ ದಾಖಲಿಸಿದ್ದರು.
ಆದರೆ, ನಿನ್ನೆಯ ದಿನ ಮಿಜೊರಾಮ್ ಸಿಎಂ ಜೊರಂತಂಗ ಅವರು, ಅಸ್ಸಾಂನೊಂದಿಗಿನ ಗಡಿ ವಿವಾದವನ್ನು ಮಾತುಕತೆಯ ಮೂಲಕ ಸೌಹಾರ್ದಯುತವಾಗಿ ಬಗೆಹರಿಸಲಾಗುವುದು ಎಂದು ಹೇಳಿಕೆ ನೀಡಿದ್ದರು. ಕೇಂದ್ರ ಗೃಹ ಸಚಿವ ಅಮಿತ್ ಷಾ ಮತ್ತು ಅಸ್ಸಾಂ ಸಿಎಂ ಸರ್ಮಾ ಅವರೊಂದಿಗೆ ದೂರವಾಣಿ ಮೂಲಕ ಚರ್ಚೆ ನಡೆಸಿದ್ದಲ್ಲದೆ, ಪರಿಸ್ಥಿತಿ ಹದಗೆಡುವಂತಹ ಯಾವುದೇ ಹೆಜ್ಜೆಗಳನ್ನು ತೆಗೆದುಕೊಳ್ಳಬಾರದೆಂದು ಮಿಜೋರಾಂ ಜನರಿಗೆ ಮನವಿ ಮಾಡಿದ್ದರು. ಇದರೊಂದಿಗೆ ಸರ್ಮ ಅವರ ವಿರುದ್ಧದ ಎಫ್ಐಆರ್ಅನ್ನು ಕೈಬಿಡಲಾಗುವುದು ಎಂದಿದ್ದರು.
ಮಿಜೋರಾಂನ ಕೊಲಾಸಿಬ್ ಮತ್ತು ಅಸ್ಸಾಂನ ಕ್ಯಾಚಾರ್ ಜಿಲ್ಲೆಗಳ ನಡುವಿನ ಗಡಿಯಲ್ಲಿನ ಸಂಘರ್ಷ ವಲಯಕ್ಕೆ ಭೇಟಿ ನೀಡುವಾಗ ಉಭಯರಾಜ್ಯಗಳ ಅಧಿಕಾರಿಗಳು ಮತ್ತು ಪಡೆಗಳಿಗೆ ಶಸ್ತ್ರಾಸ್ತ್ರಗಳನ್ನು ಒಯ್ಯಲು ಅನುಮತಿಸುವುದಿಲ್ಲ ಎಂದು ಕೇಂದ್ರ ಎರಡೂ ರಾಜ್ಯಗಳಿಗೆ ಹೇಳಿದೆ. (ಏಜೆನ್ಸೀಸ್)