ನವದೆಹಲಿ: ಮಹಾಮಾರಿ ಕರೊನಾ ವೈರಸ್ ಮೃತ್ಯಕೂಪಕ್ಕೆ ಜಾಗತಿಕವಾಗಿ 2.50 ಲಕ್ಷಕ್ಕೂ ಹೆಚ್ಚು ಮಂದಿ ಬಲಿಯಾಗಿದ್ದಾರೆ. ಹೀಗಿರುವಾಗ ಈ ಎರಡು ಪುಟ್ಟ ರಾಷ್ಟ್ರಗಳಲ್ಲಿ ಕರೊನಾ ಪ್ರಕರಣ ಹೆಚ್ಚಿದ್ದರೂ ಮರಣ ಪ್ರಮಾಣ ದರ ತುಂಬಾ ಕಡಿಮೆ ಇರುವುದು ತೀವ್ರ ಕುತೂಹಲ ಮೂಡಿಸಿದೆ.
ಆ ಎರಡು ರಾಷ್ಟ್ರಗಳೇ ಕತಾರ್ ಮತ್ತು ಸಿಂಗಾಪುರ. ಉಭಯ ರಾಷ್ಟ್ರಗಳಲ್ಲಿ ಕರೊನಾ ಮರಣ ಪ್ರಮಾಣ ದರ ಶೇ. 0.1 ಕ್ಕಿಂತಲೂ ಕಡಿಮೆ ಇದೆ. ಸಿಂಗಾಪುರದಲ್ಲಿರುವ ವಿದೇಶಿ ಕಾರ್ಮಿಕರ ವಸತಿ ನಿಲುಯಗಳಲ್ಲಿ ಏಕಾಏಕಿ ಸ್ಪೋಟಗೊಂಡ ಕರೊನಾ ವೈರಸ್ ಇಡೀ ರಾಷ್ಟ್ರಕ್ಕೆ ಹಬ್ಬಿದ್ದು, ಏಷ್ಯಾದ ಹೆಚ್ಚು ಕರೊನಾ ಪ್ರಕರಣ ರಾಷ್ಟ್ರಗಳಲ್ಲಿ ಇದು ಕೂಡ ಸೇರಿಕೊಂಡಿದೆ. ಆದರೆ, ಮರಣ ಪ್ರಮಾಣ ಮಾತ್ರ ತುಂಬಾ ಕಡಿಮೆ. ಗಮನಾರ್ಹವೆಂದರೆ, ವಯಸ್ಸಾದವರೇ ಕರೊನಾಗೆ ತುತ್ತಾಗುತ್ತಿರುವ ಸಂದರ್ಭದಲ್ಲಿ ಸಿಂಗಾಪುರದಲ್ಲಿ ಕಳೆದ ವೀಕೆಂಡ್ನಲ್ಲಿ 102 ವರ್ಷದ ಹಿರಿಯ ಮಹಿಳೆಯೊಬ್ಬರು ಕರೊನಾದಿಂದ ಗುಣಮುಖರಾಗಿ ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಆಗಿದ್ದಾರೆ.
ಇದನ್ನೂ ಓದಿ: VIDEO| ಹೆದ್ದಾರಿಯಲ್ಲಿ ಕಾರು ಚಲಾಯಿಸುವಾಗ ಸಿಕ್ಕಿಬಿದ್ದ 5 ವರ್ಷದ ಬಾಲಕನ ಹೇಳಿಕೆ ಕೇಳಿ ದಂಗಾದ ಪೊಲೀಸರು!
ಪರಿಣಿತರು ಹೇಳುವ ಪ್ರಕಾರ ಎರಡು ರಾಷ್ಟ್ರಗಳಲ್ಲಿ ಮರಣ ಪ್ರಮಾಣ ದರ ಕಡಿಮೆಯಾಗಲು ರೋಗಿಗಳ ಸಂಖ್ಯೆ ಮತ್ತು ಅವರನ್ನು ನಿಭಾಯಿಸಲು ಇರುವ ಸಮರ್ಥ ಆರೋಗ್ಯ ರಕ್ಷಣಾ ವ್ಯವಸ್ಥೆ ಎಂದಿದ್ದಾರೆ.
ಪ್ರಮುಖ ಆರ್ಥಿಕ ರಾಷ್ಟ್ರಗಳಲ್ಲಿ ಒಂದಾದ ಕತಾರ್ನಲ್ಲಿ ಮರಣ ಪ್ರಮಾಣ ಶೇ. 0.07 ರಷ್ಟಿದೆ. ಒಟ್ಟು 16 ಸಾವಿರಕ್ಕೂ ಹೆಚ್ಚು ಪ್ರಕರಣಗಳು ಪತ್ತೆಯಾಗಿದ್ದರೂ ಮರಣ ಸಂಖ್ಯೆ ಮಾತ್ರ ಕೇವಲ 12 ಇದೆ. ಇನ್ನು ಸಿಂಗಾಪುರದಲ್ಲಿ ಮರಣ ಪ್ರಮಾಣ ದರ ಶೇ. 0.093 ರಷ್ಟಿದೆ. 19 ಸಾವಿರಕ್ಕೂ ಕೇಸ್ಗಳು ಕಂಡುಬಂದಿದ್ದರೂ ಸಾವಿನ ಸಂಖ್ಯೆ ಮಾತ್ರ 18 ಇದೆ. ಎರಡೂ ದೇಶಗಳು ತಮ್ಮ ಜನಸಂಖ್ಯೆಯ ಅನುಗುಣವಾಗಿ ವೈರಸ್ ಮರಣ ಪ್ರಮಾಣವನ್ನು ಕಡಿಮೆ ಮಾಡಿವೆ. 1 ಲಕ್ಷ ಮಂದಿಗೆ ಶೇ. 0.5ಕ್ಕಿಂತಲೂ ಮರಣ ಪ್ರಮಾಣ ಕಡಿಮೆ ಇದೆ.
ವಿಶ್ವದಲ್ಲೇ ಸಂಪತ್ಭರಿತ ರಾಷ್ಟ್ರಗಳೆಂಬ ಕೀರ್ತಿಗೆ ಕತಾರ್-ಸಿಂಗಾಪುರ ಭಾಜನವಾಗಿವೆ. ಹೀಗಾಗಿ ಉತ್ತಮ ಟೆಸ್ಟಿಂಗ್ ಕಿಟ್ಸ್ ಮತ್ತು ಆಸ್ಪತ್ರೆ ಬೆಡ್ ಸೇರಿದಂತೆ ಅನೇಕ ಸೌಲಭ್ಯಗಳನ್ನು ಸಕಾಲಕ್ಕೆ ಒದಗಿಸಿದ್ದಾರೆ ಎಂಬುದು ಅನೇಕ ಪರಿಣಿತರ ಮಾತಾಗಿದೆ. (ಏಜೆನ್ಸೀಸ್)