ನವದೆಹಲಿ: ದೇಶದ ಮುಂಚೂಣಿ ಬ್ಯಾಂಕ್ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ(ಎಸ್ಬಿಐ) ವಾಲಂಟರಿ ರಿಟೈರ್ಮೆಂಟ್ ಸ್ಕೀಮ್ (ವಿಆರ್ಎಸ್) ಅನ್ನು ಜಾರಿಗೊಳಿಸಿದ್ದು, 30,190 ಉದ್ಯೋಗಿಗಳಿಗೆ ಇದು ಅನ್ವಯವಾಗಲಿದೆ. ಬಿಐನ ಒಟ್ಟು ಉದ್ಯೋಗಿಗಳ ಸಂಖ್ಯೆ 2019ರ ಮಾರ್ಚ್ನಲ್ಲಿ 2.57 ಲಕ್ಷ ಇದ್ದುದು, 2020ರ ಮಾರ್ಚ್ಗೆ 2.49 ಲಕ್ಷ ಆಗಿದೆ. ಈಗ ವಿಆರ್ಎಸ್ ಜಾರಿಯಾದ ಹಿನ್ನೆಲೆಯಲ್ಲಿ ಉದ್ಯೋಗಿಗಳ ಸಂಖ್ಯೆ ಇನ್ನಷ್ಟು ಕಡಿಮೆಯಾಗಲಿದೆ.
ಮೂಲಗಳ ಪ್ರಕಾರ, ವಿಆರ್ಎಸ್ನ ಕರಡು ಯೋಜನೆ ಸಿದ್ಧವಾಗಿದ್ದು, ಆಡಳಿತ ಮಂಡಳಿಯ ಅನುಮೋದನೆಗಾಗಿ ಕಾಯಲಾಗಿದೆ. ಪ್ರಸ್ತಾವಿತ ಸ್ಕೀಮ್ಗೆ ಸೆಕೆಂಡ್ ಇನ್ನಿಂಗ್ಸ್ ಟ್ಯಾಪ್ ವಿಆರ್ಎಸ್ 2020 ಎಂದು ಹೆಸರಿಸಲಾಗಿದೆ. ಬ್ಯಾಂಕಿನ ಮಾನವ ಸಂಪನ್ಮೂಲ ಹದಗೊಳಿಸಿ, ವೆಚ್ಚದ ಹೊರೆಯನ್ನು ತಗ್ಗಿಸುವ ಉದ್ದೇಶ ಇದರದ್ದು ಎಂದು ಹೇಳಲಾಗುತ್ತಿದೆ.
ಈ ಸ್ಕೀಮ್ ಮೂಲಕ ಉದ್ಯೋಗಿಗಳಿಗೆ ಗೌರವಯುತ ಬೀಳ್ಕೊಡುಗೆ ನೀಡಲಾಗುತ್ತಿದೆ. 25 ವರ್ಷ ಸೇವೆ ಪೂರ್ಣಗೊಳಿಸಿದವರು ಮತ್ತು 55 ವರ್ಷ ಮೇಲ್ಪಟ್ಟವರನ್ನು ಇದಕ್ಕೆ ಪರಿಗಣಿಸಲಾಗುತ್ತಿದೆ. ಈ ವರ್ಷದ ಡಿಸೆಂಬರ್ 1ರಂದು ಈ ಯೋಜನೆ ಆರಂಭವಾಗಲಿದ್ದು ಫೆಬ್ರವರಿ ಕೊನೆಯ ತನಕ ಇರಲಿದೆ. ಈ ಅವಧಿಯಲ್ಲಿ ವಿಆರ್ಎಸ್ ತೆಗೆದುಕೊಳ್ಳುವವರಿಗೆ ಕೆಲವು ಪ್ರಯೋಜನಗಳು ಸಿಗಲಿವೆ. ಈ ಅವಧಿಯನ ನಂತರ ಬರುವ ವಿಆರ್ಎಸ್ ಅರ್ಜಿಗಳನ್ನು ಪರಿಗಣಿಸಲಾಗುವುದಿಲ್ಲ ಎಂದು ಬ್ಯಾಂಕ್ ಮೂಲಗಳು ಹೇಳಿಕೊಂಡಿವೆ. (ಏಜೆನ್ಸೀಸ್)