ಬೆಂಗಳೂರು: ಪವರ್ಸ್ಟಾರ್ ಪುನೀತ್ ರಾಜಕುಮಾರ್ ನಾಯಕತ್ವದ ಯುವರತ್ನ ಚಿತ್ರದ ಬಗ್ಗೆ ಹೊಸ ಅಪ್ಡೇಟ್ ಮಾಹಿತಿಯೊಂದು ಇದೀಗ ಲಭ್ಯವಾಗಿದೆ. ಹಾಗಂತ ಸಿನಿಮಾ ತಂಡ ಹೊಸ ಟೀಸರ್ ಏನಾದ್ರೂ ಬಿಡುಗಡೆ ಮಾಡುತ್ತ ಎಂದುಕೊಳ್ಳಬೇಡಿ. ಬದಲಿಗೆ ಯುವರತ್ನ ಚಿತ್ರದ ಶೂಟಿಂಗ್ ಮುಕ್ತಾಯವಾಗಿದೆ.
ಮಾತಿನ ಭಾಗದ ಬಹುತೇಕ ಚಿತ್ರೀಕರಣ ಮುಗಿಸಿಕೊಂಡಿರುವ ‘ಯುವರತ್ನ’ ಚಿತ್ರತಂಡ ಎರಡು ಹಾಡಿನ ಶೂಟಿಂಗ್ ಮಾತ್ರ ಬಾಕಿ ಉಳಿಸಿಕೊಂಡಿತ್ತು. ಇದೀಗ ಆರೂವರೆ ತಿಂಗಳ ಬಳಿಕ ಸಿನಿಮಾ ಕೆಲಸಗಳಲ್ಲಿ ತಂಡ ಭಾಗಿಯಾಗಿ, ಬಾಕಿ ಕೆಲಸಗಳನ್ನು ಮುಗಿಸಿಕೊಂಡಿದೆ.
ಇಂಟ್ರೋಡಕ್ಷನ್ ಹಾಡಿನ ಸಲುವಾಗಿ ಕಂಠೀರವ ಸ್ಟುಡಿಯೋದಲ್ಲಿ ಸೆಟ್ ಹಾಕಲಾಗಿತ್ತು. ಬಳಿಕ ರೊಮ್ಯಾಂಟಿಕ್ ಹಾಡೊಂದರ ಶೂಟಿಂಗ್ ಸಲುವಾಗಿ ಗೋವಾಕ್ಕೆ ಹಾರಿತ್ತು. ಇದೀಗ ಕುಂಬಳಕಾಯಿ ಒಡೆದುಕೊಂಡು, ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳಿಗೆ ಚಾಲನೆ ನೀಡಿದೆ. ಹಾಗಾದರೆ ಬಿಡುಗಡೆ ಯಾವಾಗ? ಸದ್ಯದ ಮಾಹಿತಿ ಪ್ರಕಾರ, ಕ್ರಿಸ್ಮಸ್ಗೆ ಯುವರತ್ನ ಬಿಡುಗಡೆ ಆಗಲಿದೆ ಎಂಬ ಮಾತಿದೆ. ಇನ್ನಷ್ಟೇ ಈ ಬಗ್ಗೆ ಅಧಿಕೃತ ಮಾಹಿತಿ ಹೊರಬೀಳಬೇಕಿದೆ.
ಇದನ್ನೂ ಓದಿ: ಕಿಕ್ಕೇರಿದ ಸುದ್ದಿಗೆ ಸಿಡಿದೆದ್ದ ಬಾಲಿವುಡ್; ಚಾನೆಲ್-ಆ್ಯಂಕರ್ಸ್ ವಿರುದ್ಧ ಕೋರ್ಟ್ಗೆ ದೂರಿತ್ತ ‘ಖಾನ್ದಾನ್’
ಈ ಮೊದಲು ನಿರ್ಧಾರವಾದಂತೆ ಕಳೆದ ವರ್ಷದ ಕ್ರಿಸ್ಮಸ್ಗೆ ಯುವರತ್ನ ಬಿಡುಗಡೆ ಆಗಬೇಕಿತ್ತು. ಬಳಿಕ ಮೇ ಎಂಬ ಸುದ್ದಿ ಹರಿದಾಡಿತ್ತು. ಆದರೆ, ಕರೊನಾ ಹಿನ್ನೆಲೆಯಲ್ಲಿ ಆ ಲೆಕ್ಕಾಚಾರ ಎಲ್ಲವೂ ತಲೆಕೆಳಗಾಯಿತು.
ಅಂದಹಾಗೆ, ‘ಯುವರತ್ನ’ ಚಿತ್ರದಲ್ಲಿ ಪುನೀತ್ ಜತೆಗೆ ಸಾಯೇಷಾ ಸೆಹಗಲ್, ದಿಗಂತ್, ಸೋನು ಗೌಡ, ಧನಂಜಯ್ ಮುಂತಾದವರು ನಟಿಸಿದ್ದಾರೆ. ಚಿತ್ರಕ್ಕೆ ಕಥೆ-ಚಿತ್ರಕಥೆ ಜತೆಗೆ ಸಂಭಾಷಣೆ ರಚಿಸಿ ನಿರ್ದೇಶನ ಮಾಡುತ್ತಿರುವುದು ಸಂತೋಷ್ ಆನಂದರಾಮ್. ಈ ಹಿಂದೆ ಪುನೀತ್ ಅಭಿನಯದಲ್ಲಿ ‘ರಾಜ್ಕುಮಾರ’ ಮತ್ತು ‘ನಿನ್ನಿಂದಲೇ’ ಚಿತ್ರಗಳನ್ನು ನಿರ್ಮಿಸಿದ್ದ ಹೊಂಬಾಳೆ ಫಿಲಂಸ್ನ ವಿಜಯ್ ಕುಮಾರ್ ಕಿರಗಂದೂರು ಈ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ.