ಮುಂಬೈ: ಬಾಲಿವುಡ್ನಲ್ಲಿ ನೆಪೋಟಿಸಂ ಹೆಚ್ಚುತ್ತಿದೆ, ಇಲ್ಲಿ ಹೊಸಬರು ಹೊರಗಿನಿಂದ ಬಂದು ಬದುಕುವುದು ಬಹಳ ಕಷ್ಟವಾಗುತ್ತಿದೆ ಎಂಬ ಕೂಗು ಒಂದೆಡೆ ಕೇಳಿ ಬರುತ್ತಿದ್ದರೆ, ಇನ್ನೊಂದು ಕಡೆ ನಟ ಸೈಫ್ ಅಲಿ ಖಾನ್, ತಮ್ಮ ಎಲ್ಲಾ ಮಕ್ಕಳೂ ಇದೇ ವೃತ್ತಿಯಲ್ಲಿ ಮುಂದುವರೆಯಲಿ ಎಂದು ಹೇಳಿದ್ದಾರೆ.
ಈಗ್ಯಾಕೆ ಈ ವಿಷಯ ಎಂದರೆ, ಈಗಾಗಲೇ ಸೈಫ್ ಮಗಳು ಸಾರಾ ನಟಿಯಾಗಿದ್ದಾಗಿದೆ. ಈಗ ಅವರ ಮಗ ಇಬ್ರಾಹಿಂ ಸಹ ಬಾಲಿವುಡ್ಗೆ ಎಂಟ್ರಿ ಕೊಡುವುದಕ್ಕೆ ಸಜ್ಜಾಗುತ್ತಿದ್ದಾನೆ ಎಂಬ ಸುದ್ದಿಯೊಂದು ಬಾಲಿವುಡ್ನಲ್ಲಿ ಕೇಳಿಬರುತ್ತಿದೆ.
ಈ ಕುರಿತು ಮಾತನಾಡಿರುವ ಅವರು, 'ಇಬ್ರಾಹಿಂ ನಟನಾಗುವುದಕ್ಕೆ ತಯಾರಿ ನಡೆಸುತ್ತಿದ್ದಾನೆ. ಯಾಕಾಗಬಾರದು? ನನ್ನ ಎಲ್ಲ ಮಕ್ಕಳೂ ಇದೇ ವೃತ್ತಿಯಲ್ಲಿ ಮುಂದುವರೆಯಲಿ ಎಂಬುದು ನನ್ನ ಆಸೆ. ಏಕೆಂದರೆ, ಈ ವೃತ್ತಿಯೇ ಅದ್ಭುತ. ನಾನು 18ನೇ ವಯಸ್ಸಿನವನಾಗಿದ್ದಾಗ ನನ್ನ ಜೀವನ ಸಾಕಷ್ಟು ಹಾಳಾಗಿತ್ತು. ಬಹುಶಃ ನಾನು ನಟನಾಗದಿದ್ದರೆ ನನ್ನ ಜೀವನ ನಾಶವಾಗಿರುತ್ತಿತ್ತು. ಈ ಕ್ಷೇತ್ರಕ್ಕೆ ಬಂದಿದ್ದರಿಂದ ನನಗೊಂದು ಗುರುತೂ ಸಿಕ್ಕಿತು ಮತ್ತು ಎಲ್ಲಕ್ಕಿಂತ ಹೆಚ್ಚಾಗಿ ತೃಪ್ತಿಯೂ ಇದೆ' ಎಂದು ಅವರು ಹೇಳಿಕೊಂಡಿದ್ದಾರೆ.
ತನ್ನ ಮಗ ತನಗಿಂತ ಬಹಳ ಚೆನ್ನಾಗಿದ್ದಾನೆ ಎಂದು ಹೇಳಿರುವ ಸೈಫ್, 'ನನ್ನ ಎಲ್ಲಾ ಮಕ್ಕಳಿಗೂ ನಟನೆಯ ಬಗ್ಗೆ ಆಸಕ್ತಿ ಇದ್ದೇ ಇರುತ್ತದೆ. ಅದು ಸಹಜ. ಏಕೆಂದರೆ, ನಮ್ಮದು ಕಲಾವಿದರ ಕುಟುಂಬ. ಬಹಳಷ್ಟು ಜನ ಚಿತ್ರರಂಗದಲ್ಲಿದ್ದೇವೆ. ಹಾಗಾಗಿ ಮಗನಿಗೂ ಇಲ್ಲೇ ಮುಂದುವರೆಯಬೇಕು ಎಂಬ ಆಸೆ ಇದ್ದರೆ ಸಹಜ. ಮೊದಲು ಅವನ ಓದು ಮುಗಿಯಲಿ. ಆ ನಂತರ, ಅವನಿಗೆ ಏನು ಬೇಕೋ ಅದು ಮಾಡಲಿ. ನಮ್ಮ ಸಂಪೂರ್ಣ ಸಹಕಾರ ಇದ್ದೇ ಇರುತ್ತದೆ' ಎಂದು ಅವರು ಹೇಳಿದ್ದಾರೆ.
ಇದನ್ನೂ ಓದಿ: ನವೆಂಬರ್ 26ರಂದು ‘ಅಗೋಳಿ ಮಂಜಣ್ಣನ’ ಟೀಸರ್ …
ಇನ್ನು ತಾನು ಮಗನನ್ನು ಪರಿಚಯಿಸುತ್ತೀನೋ ಇಲ್ಲವೋ ಎಂಬುದು ಗೊತ್ತಿಲ್ಲ ಎಂದಿರುವ ಸೈಫ್, 'ಅವನನ್ನು ಚಿತ್ರರಂಗಕ್ಕೆ ನಾನು ಪರಿಚಯಿಸುತ್ತೀನೋ ಅಥವಾ ಬೇರೆಯವರು ಪರಿಚಯಿಸುತ್ತಾರೋ ಎಂಬುದು ಗೊತ್ತಿಲ್ಲ. ಆ ಆಯ್ಕೆ ನಂತರ. ಮೊದಲು ಅವನ ಓದು ಮುಗಿಯಲಿ. ನಾನು ನೋಡಿರುವಂತೆ ಅವನಿಗೆ ಚಿತ್ರರಂಗ ಮತ್ತು ಅದರಲ್ಲೂ ನಟನೆಯಲ್ಲಿ ಬಹಳ ಆಸಕ್ತಿ. ಹಾಗಾಗಿ ಅವನು ಬೇರೆ ಕೆಲಸ ಮಾಡುವುದು ಸಂಶಯವೇ' ಎನ್ನುತ್ತಾರೆ ಸೈಫ್.