ಮುಂಬೈ: ಬಾಲಿವುಡ್ ಮೆಗಾಸ್ಟಾರ್ ಅಮಿತಾಭ್ ಬಚ್ಚನ್ ಅವರು ದೇಶ-ವಿದೇಶಗಳಲ್ಲಿ ಲಕ್ಷಾಂತರ ಮೌಲ್ಯದ ಆಸ್ತಿ ಹೊಂದಿರುವುದು ತಿಳಿದೇ ಇದೆ. ಮುಂಬೈನ ಪ್ರತಿಷ್ಠಿತ ಅಂಧೇರಿ ಏರಿಯಾದಲ್ಲಿಯೂ ಒಂದು ಡುಪ್ಲೆಕ್ಸ್ ಫ್ಲ್ಯಾಟ್ ಅನ್ನು ಹೊಂದಿದ್ದಾರೆ. ಇದೀಗ ಆ ಫ್ಲ್ಯಾಟ್ ಅನ್ನು ಬಾಲಿವುಡ್ ಹಾಟ್ ಬ್ಯೂಟಿ ಕೃತಿ ಸನೋನ್ ಎರಡು ವರ್ಷಗಳ ಕಾಲ ಬಾಡಿಗೆಗೆ ಪಡೆದಿದ್ದಾರೆ.
ಅಮಿತಾಬ್ ಬಚ್ಚನ್ ಅವರ ಈ ಫ್ಲಾಟ್ ಅಂಧೇರಿ ಪಶ್ಚಿಮದ ಲೋಖಂಡವಾಲಾ ರಸ್ತೆಯಲ್ಲಿರುವ ಅಟ್ಲಾಂಟಿಸ್ ಕಟ್ಟಡದ 27 ಮತ್ತು 28ನೇ ಮಹಡಿಯಲ್ಲಿದೆ. ನಾಲ್ಕು ಕಾರುಗಳನ್ನು ಪಾರ್ಕ್ ಮಾಡುವಷ್ಟು ಅನುಕೂಲಕರವಾದ ಪಾರ್ಕಿಂಗ್ ಜಾಗವು ಸೇರಿದಂತೆ ಫ್ಲ್ಯಾಟ್ಗೆ ಪ್ರತಿ ತಿಂಗಳ ಬಾಡಿಗೆ ಬರೋಬ್ಬರಿ 10 ಲಕ್ಷ ರೂಪಾಯಿಯನ್ನು ಕೃತಿ ಸನೋನ್ ನೀಡುತ್ತಿದ್ದಾರೆ.
ಕಳೆದ ನವೆಂಬರ್ 12ರಂದು ಕೃತಿ ಸನೋನ್ ಬಾಡಿಗೆ ಒಪ್ಪಂದ ಮಾಡಿಕೊಂಡಿದ್ದಾರೆ. ಒಪ್ಪಂದದ ಅವಧಿಯು ಅಕ್ಟೋಬರ್ 2021 ರಿಂದ ಅಕ್ಟೋಬರ್ 2023ರವರೆಗೂ ಮಾನ್ಯವಾಗಿರಲಿದೆ. ಮುಂಗಡ ಹಣವಾಗಿ ಈಗಾಗಲೇ 60 ಲಕ್ಷ ರೂ. ಅನ್ನು ಕೃತಿ ಪಾವತಿಸಿದ್ದಾರೆ. 2021ರ ಏಪ್ರಿಲ್ನಲ್ಲಿ ಈ ಫ್ಲ್ಯಾಟ್ ಅನ್ನು ಅಮಿತಾಭ್ ಬರೋಬ್ಬರಿ 31 ಕೋಟಿ ರೂಪಾಯಿಗೆ ಖರೀದಿಸಿದ್ದರು.
ಇನ್ನು ಸಿನಿಮಾ ವಿಚಾರಕ್ಕೆ ಬಂದರೆ ಕೃತಿ ಕೊನೆಯದಾಗಿ ಮಿಮಿ ಚಿತ್ರದಲ್ಲಿ ಕಾಣಿಸಿಕೊಂಡರು. ಚಿತ್ರದಲ್ಲಿ ಅದ್ಭುತ ನಟನೆಗೆ ಪ್ರಶಂಸೆಯನ್ನು ಗಿಟ್ಟಿಸಿಕೊಂಡಿದ್ದಾರೆ. ಇದೀಗ ಕೃತಿ ಅವರು 'ಬಚ್ಚನ್ ಪಾಂಡೆ', 'ಆದಿಪುರುಷ', 'ಭೆದಿಯಾ' ಮತ್ತು 'ಗಣಪತ್' ನಂತಹ ಬಿಗ್ ಬಜೆಟ್ ಚಿತ್ರಗಳಲ್ಲಿ ನಟಿಸುತ್ತಿದ್ದಾರೆ. (ಏಜೆನ್ಸೀಸ್)