ಬೆಂಗಳೂರು: 'ಕುಳ್ಳನ ಹೆಂಡತಿ' ಎಂಬ ಟೈಟಲ್ ಕೇಳಿದಾಕ್ಷಣ ಏನನ್ನಿಸುತ್ತದೆ? ಇಲ್ಲಿ ಗಂಡ ಕುಳ್ಳ ಇರಬಹುದು ಎಂದನಿಸಬಹುದು. ಆದರೆ, ನಿರ್ದೇಶಕ ವಿಶಾಖ್, 'ಕುಳ್ಳನ ಹೆಂಡತಿ' ಎಂದು ಚಿತ್ರಕ್ಕೆ ಹೆಸರಿಟ್ಟು ವಿಭಿನ್ನ ಕಥೆಯನ್ನು ಹೇಳುವುದಕ್ಕೆ ಹೊರಟಿದ್ದಾರೆ.
ಇದನ್ನೂ ಓದಿ: ಆಟ-ಓಟ ಜೀವನಪಾಠ: ಗುರುಶಿಷ್ಯರು ಸಿನಿಮಾ ವಿಮರ್ಶೆ
ಸ್ಟಾರ್ ವೆಂಚರ್ಸ್ ಬ್ಯಾನರ್ನಲ್ಲಿ ನಿರ್ಮಾಣವಾಗಿರುವ 'ಕುಳ್ಳನ ಹೆಂಡತಿ' ಚಿತ್ರದಲ್ಲಿ ಆಶ್ರಿತ್ ವಿಶ್ವನಾಥ್ ಹಾಗೂ ರಾಸಿಕಾ ಬೀರೇಂದ್ರ ನಾಯಕ-ನಾಯಕಿಯಾಗಿ ನಟಿಸಿದ್ದಾರೆ. ಈಗಾಗಲೇ ಚಿತ್ರೀಕರಣ ಹಾಗೂ ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳನ್ನು ಮುಗಿದಿದ್ದು, ಇತ್ತೀಚೆಗೆ ಟ್ರೇಲರ್ ಬಿಡುಗಡೆಯಾಗಿದೆ.
'ಕುಳ್ಳನ ಹೆಂಡತಿ' ಚಿತ್ರದ ಕುರಿತು ಮಾತನಾಡುವ ನಿರ್ದೇಶಕ ವಿಶಾಖ್, ಈ ಚಿತ್ರಕ್ಕೆ ಅವರದ್ದೇ ಕಥೆ ಸ್ಫೂರ್ತಿಯಂತೆ. '26ರ ಹರೆಯದ ಯುವಕನಿಗೆ 33ರ ವಯಸಿನ ನರ್ಸ್ ಮೇಲೆ ಲವ್ ಆದರೆ ಹೇಗಿರುತ್ತೆ ಎಂಬುದನ್ನು ಈ ಚಿತ್ರದ ಮೂಲಕ ಹೇಳ ಹೊರಟಿದ್ದೇನೆ. ಒಂದು ಸುಂದರ ಲವ್ ಸ್ಟೋರಿ ಇದಾಗಿದ್ದು, 45 ದಿನಗಳ ಕಾಲ ಚಿತ್ರೀಕರಣ ಮಾಡಿದ್ದೇವೆ. ನನ್ನ ಹೆಂಡತಿಯೂ ಸಹ ನನಗಿಂತ ದೊಡ್ಡವರು. ಅದೂ ಕೂಡ ಈ ಚಿತ್ರಕಥೆಗೆ ಸ್ಪೂರ್ತಿಯಾಗಿದೆ. ಡಾಕ್ಟರ್ ಹಾಗೂ ರೋಗಿಯ ನಡುವಿನ ಕಥೆಯ ಜತೆಗೆ ಹೈಟ್ ಹಾಗೂ ವಯಸ್ಸಿನ ಅಂತರದ ಸಿನಿಮಾ ಇದಾಗಿದೆ. ನಮ್ಮ ಚಿತ್ರವು 2020ರಲ್ಲೇ ಶುರುವಾಗಿತ್ತು. ಇದೇ ಅಕ್ಟೋಬರ್ನಲ್ಲಿ ಚಿತ್ರ ಮಾಡುವ ಯೋಚನೆಯಿದೆ' ಎನ್ನುತ್ತಾರೆ.
ಈ ಚಿತ್ರದಲ್ಲಿ ಐದು ಹಾಡುಗಳಿದ್ದು, ಪರಮ್ ನಿರ್ವಿಕಾರ್ ಸಂಗೀತ ಸಂಯೋಜಿಸಿದ್ದಾರೆ. ಇದಕ್ಕೂ ಮುನ್ನ ಕೆಲವು ಕಿರುಚಿತ್ರಗಳಿಗೆ ಮತ್ತು ಆಲ್ಬಂ ಸಾಂಗ್ಗಳಿಗೆ ಸಂಗೀತ ಸಂಯೋಜಿಸಿದ್ದ ಅವರು ಇದೇ ಮೊದಲ ಬಾರಿಗೆ ಚಿತ್ರಕ್ಕೆ ಸಂಗೀತ ಸಂಯೋಜಿಸಿದ್ದಾರೆ.
ಅಶ್ರಿತ್ ವಿಶ್ವನಾಥ್ ಮತ್ತು ರಾಸಿಕಾ ಬೀರೇಂದ್ರ ಜತೆಗೆ ದೀಪಿಕಾ, ಅರಸೀಕೆರೆ ರಾಜು, ಕೆಂಚಣ್ಣ, ಜಯಾ ಮುಂತಾದವರು ಈ ಚಿತ್ರದಲ್ಲಿ ನಟಿಸಿದ್ದಾರೆ.