ಬೆಂಗಳೂರು: 'ಕಾಂತಾರ' ಚಿತ್ರದಲ್ಲಿ ಗಮನ ಸೆಳೆದ ಪಾತ್ರಗಳ ಪೈಕಿ ತಾಯಿ ಪಾತ್ರವೂ ಒಂದು. ಈ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದ ಮಾನಸಿ ಸುಧೀರ್, ಈಗ ಸದ್ದಿಲ್ಲದೆ ಇನ್ನೊಂದು ಹೊಸ ಚಿತ್ರದಲ್ಲಿ ತಾಯಿಯಾಗಿ ನಟಿಸಿದ್ದಾರೆ. ಅದೇ 'ಜುಗಲ್ಬಂದಿ'.
ಈಗಾಗಲೇ 'ಜುಗಲ್ಬಂದಿ' ಚಿತ್ರದ ಫಸ್ಟ್ ಲುಕ್ ಹಾಗೂ ಹಾಡುಗಳ ಬಿಡುಗಡೆ ಆಗಿದೆ. ಈಗ ಈ ಚಿತ್ರದ ಟ್ರೇಲರ್ ಬಿಡುಗಡೆ ಆಗಿದೆ. ಇದು ಬರೀ ತಾಯಿ ಸೆಂಟಿಮೆಂಟ್ ಚಿತ್ರವಷ್ಟೇ ಅಲ್ಲ, ಇಲ್ಲಿ ಬೇರೆ ಕಥೆಗಳು ಸಹ ಇವೆ. ಆ ಕಥೆಗಳನ್ನೆಲ್ಲ ಸೇರಿಸಿ 'ಜುಗಲ್ಬಂದಿ' ಮಾಡಿದ್ದಾರೆ ನಿರ್ದೇಶಕ ದಿವಾಕರ್ ಡಿಂಡಿಮ.
ನಿರ್ದೇಶನದ ಜೊತೆಗೆ ಡಿಂಡಿಮ ಪ್ರೊಡಕ್ಷನ್ಸ್ ಬ್ಯಾನರ್ನಡಿ ಈ ಚಿತ್ರವನ್ನೂ ಅವರೇ ನಿರ್ಮಿಸಿದ್ದಾರೆ. ಈ ಚಿತ್ರದಲ್ಲಿ ಮಾನಸಿ ಸುಧೀರ್, ಅರ್ಚನಾ ಕೊಟ್ಟಿಗೆ, ಅಶ್ವಿನ್ ರಾವ್ ಪಲ್ಲಕ್ಕಿ, ಸಂತೋಷ್ ಆಶ್ರಯ್, ಯಶ್ ಶೆಟ್ಟಿ, ಚಂದ್ರಪ್ರಭ, ಅರವಿಂದ್ ರಾವ್, ಅನಂತ ವೇಲು ಮುಂತಾದವರು ಅಭಿನಯಿಸಿದ್ದಾರೆ.
'ಜುಗಲ್ಬಂದಿ' ಚಿತ್ರದಲ್ಲಿ ಮೂರು ಹಾಡುಗಳಿದ್ದು, ಆ ಮೂರು ಹಾಡುಗಳಿಗೂ ದಿವಾಕರ್ ಡಿಂಡಿಮ ಸಾಹಿತ್ಯ ರಚಿಸಿದ್ದು, ಪ್ರದ್ಯೋತ್ತನ್ ಸಂಗೀತ ಸಂಯೋಜಿಸಿದ್ದಾರೆ.