ಚೆನ್ನೈ: ಸದಾ ಒಂದಿಲ್ಲೊಂದು ವಿಚಾರದಲ್ಲಿ ಸಖತ್ ಸುದ್ದಿಯಾಗುವ ದಕ್ಷಿಣ ಭಾರತದ ಖ್ಯಾತ ನಟಿ ತ್ರಿಷಾ ಕೃಷ್ಣನ್ ( Trisha Krishnan ), ಇದೀಗ ತಮ್ಮ ವೈಯಕ್ತಿಕ ವಿಷಯಕ್ಕಾಗಿ ಮತ್ತೊಮ್ಮೆ ಸಖತ್ ಚರ್ಚೆಯಲ್ಲಿದ್ದಾರೆ. ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ತ್ರಿಷಾ ಅವರ ಮದುವೆ ಸುದ್ದಿ ಕಾಡ್ಗಿಚ್ಚಿನಂತೆ ಹರಿದಾಡುತ್ತಿದೆ. ಅದಕ್ಕೆ ಕಾರಣ ತ್ರಿಷಾ ಅವರು ಧರಿಸಿರುವ ನೆಕ್ಲೇಸ್‌ ಹಾಗೂ ಲಾಕೆಟ್ ಮೇಲಿನ ನಿಗೂಢ ಲವ್ ಎಮೋಜಿ. ಈ ಒಂದು ಲಾಕೆಟ್ ಇಡೀ ಚಿತ್ರರಂಗದಲ್ಲಿ ಹೊಸ ಸಂಚಲನ ಸೃಷ್ಟಿಸಿದೆ.
ಸಿನಿಮಾ ಶೂಟಿಂಗ್ ನಿಮಿತ್ತ ಲಂಡನ್‌ಗೆ ತೆರಳಿದ್ದ ಹಿರಿಯ ನಟಿ ರಾಧಿಕಾ ಶರತ್‌ಕುಮಾರ್ ಅವರು, ನಟಿ ತ್ರಿಷಾ ಜತೆ ತೆಗೆಸಿಕೊಂಡ ಸೆಲ್ಫಿಯೊಂದನ್ನು ತಮ್ಮ ಇನ್ಸ್ಟಾಗ್ರಾಂ ಸ್ಟೋರಿಯಲ್ಲಿ ಹಂಚಿಕೊಂಡಿದ್ದರು. ಆ ಫೋಟೋದಲ್ಲಿ ತ್ರಿಷಾ ಧರಿಸಿರುವ ನೆಕ್ಲೇಸ್‌ನ ಲಾಕೆಟ್ ಭಾಗವನ್ನು ಮುಚ್ಚುವಂತೆ ಅಥವಾ ಕಾಣದಂತೆ ಅದರ ಮೇಲೆ ಲವ್ ಎಮೋಜಿ ಹಾಕಲಾಗಿದೆ. ಇದನ್ನು ಗಮನಿಸಿದ ಸಿನಿ ಅಭಿಮಾನಿಗಳು, ತ್ರಿಷಾ ಮದುವೆ ಆಗಿದ್ದಾರಾ? ಅವರು ತಮ್ಮ ವಿಶೇಷ ಲಾಕೆಟ್ ಅನ್ನು ಮುಚ್ಚಿಕೊಳ್ಳುತ್ತಿರುವುದು ಯಾಕೆ? ಎಂದು ಪ್ರಶ್ನೆಗಳನ್ನು ಕೇಳುತ್ತಿದ್ದಾರೆ. ಸದ್ಯ ಈ ಫೋಟೋ ಸಿಕ್ಕಾಪಟ್ಟೆ ವೈರಲ್ ಆಗುತ್ತಿದ್ದು, ನಿಗೂಢ ಲಾಕೆಟ್ ಎಲ್ಲರ ಕೇಂದ್ರಬಿಂದುವಾಗಿದೆ.
ಈ ಹಿಂದೆ ತಮಿಳುನಾಡು ಮುಖ್ಯಮಂತ್ರಿ ಹಾಗೂ ಖ್ಯಾತ ನಟ ವಿಜಯ್ ಅವರೊಂದಿಗೆ ತ್ರಿಷಾ ಹೆಸರು ಥಳಕು ಹಾಕಿಕೊಂಡು ಸಾಕಷ್ಟು ವಿವಾದಗಳು ಮತ್ತು ವಾದ-ಪ್ರತಿವಾದಗಳು ಹುಟ್ಟಿಕೊಂಡಿದ್ದವು. ವಿಜಯ್ ಪತ್ನಿ ಸಂಗೀತಾ ಸೋರ್ನಲಿಂಗಂ ಅವರು ಡಿವೋರ್ಸ್ಗೆ ಅರ್ಜಿ ಹಾಕಿದ್ದಾರೆ ಎಂಬ ಸುದ್ದಿಯು ಕೆಲಕಾಲ ಜೋರು ಚರ್ಚೆ ಹುಟ್ಟುಹಾಕಿತ್ತು. ಈ ಹಿನ್ನೆಲೆಯಲ್ಲಿ, ಪ್ರಸ್ತುತ ವೈರಲ್ ಆಗಿರುವ ಫೋಟೋದಲ್ಲಿ ಆ ಲಾಕೆಟ್ ಒಳಗೆ ಏನಿದೆ ಎಂಬ ಕುತೂಹಲ ಅಭಿಮಾನಿಗಳಲ್ಲಿ ಗರಿಗೆದರಿದೆ. ವಿಜಯ್ ಜತೆಗಿನ ನಂಟು ಈಗಲೂ ಮುಂದುವರಿದಿದ್ದು, ನಟಿಯು ಉದ್ದೇಶಪೂರ್ವಕವಾಗಿಯೇ ತಮ್ಮ ಕೊರಳಿನ ಆಭರಣವನ್ನು ಮುಚ್ಚಿಕೊಳ್ಳುತ್ತಿದ್ದಾರಾ ಎಂಬ ಅನುಮಾನಗಳು ವ್ಯಕ್ತವಾಗುತ್ತಿವೆ.
ಅಂದಹಾಗೆ, ತ್ರಿಷಾ ಅವರ ಲಾಕೆಟ್ ಚರ್ಚೆಗೆ ಬರುತ್ತಿರುವುದು ಇದೇ ಮೊದಲ ಬಾರಿಯೇನಲ್ಲ. ಕೆಲ ತಿಂಗಳುಗಳ ಹಿಂದೆ 'ಥಗ್ ಲೈಫ್' ಸಿನಿಮಾದ ಪ್ರಚಾರ ಕಾರ್ಯಕ್ರಮದಲ್ಲಿ ಭಾಗವಹಿಸಲು ಬಂದಿದ್ದಾಗಲೂ ಅವರು ಧರಿಸಿದ್ದ ವಿಶಿಷ್ಟ ಚಿನ್ನದ ಬಣ್ಣದ ಅಲೈಲಾ (Alila) ಆಕಾರದ ಲಾಕೆಟ್ ಭಾರಿ ಚರ್ಚೆಗೆ ಕಾರಣವಾಗಿತ್ತು. ಸಾರ್ವಜನಿಕ ಸಮಾರಂಭಗಳಲ್ಲಿ ಹಾಗೂ ಸೆಲ್ಫಿಗಳಲ್ಲಿ ತ್ರಿಷಾ ಅವರು ಧರಿಸುವ ಆಭರಣಗಳ ಮೇಲೆಯೇ ಎಲ್ಲರ ಕಣ್ಣು ನೆಟ್ಟಿರುತ್ತದೆ. ಏಕೆಂದರೆ, ಅವರು ಧರಿಸುವ ವಸ್ತುಗಳು ಅವರ ಮದುವೆ ಅಥವಾ ಗೌಪ್ಯ ಸಂಬಂಧದ ಸುಳುವಿರಬಹುದು ಎಂದು ನೆಟ್ಟಿಗರು ತಮ್ಮದೇ ರೀತಿಯಲ್ಲಿ ವಿಶ್ಲೇಷಿಸುತ್ತಿರುತ್ತಾರೆ.
ಹೀಗೆ ಪದೇಪದೆ ವಿವಾದಗಳು ಮತ್ತು ಮದುವೆ ಸುದ್ದಿಗಳು ಮುನ್ನೆಲೆಗೆ ಬರುತ್ತಿದ್ದರೂ ನಟಿ ತ್ರಿಷಾ ಕೃಷ್ಣನ್ ಮಾತ್ರ ತಮ್ಮ ಮದುವೆ ಅಥವಾ ವೈಯಕ್ತಿಕ ಬಾಂಧವ್ಯದ ಇಂದಿಗೂ ತುಟಿ ಬಿಚ್ಚದೇ ಮೌನವಾಗಿದ್ದಾರೆ. ಇತ್ತೀಚಿನ ಈ ಲಂಡನ್ ಸೆಲ್ಫಿ ಫೋಟೋದ ಗುಟ್ಟು ಕೂಡ ಊಹಾಪೋಹಗಳಾಗಿಯೇ ಉಳಿದಿದ್ದು, ನಟಿಯ ಮದುವೆಯ ಕುರಿತು ಅಭಿಮಾನಿಗಳ ವಲಯದಲ್ಲಿ ಎದ್ದಿರುವ ಕುತೂಹಲಕ್ಕೆ ಮುಂದಿನ ದಿನಗಳಲ್ಲಿ ಸ್ವತಃ ನಟಿಯೇ ತೆರೆ ಎಳೆಯಲಿದ್ದಾರಾ ಎಂದು ಕಾದು ನೋಡಬೇಕಿದೆ, (ಏಜೆನ್ಸೀಸ್).