ಬೆಂಗಳೂರು: ಪುನೀತ್ ರಾಜಕುಮಾರ್ ಅವರ ಹೆಸರಲ್ಲಿ ಸ್ಮಾರಕ ನಿರ್ಮಿಸುವ ಯೋಚನೆ ಇದೆ. ನಮ್ಮ ಸಕಾಘರದ ಮೂಲಕ ಅದನ್ನು ಮಾಡುತ್ತೇವೆ ಎಂದು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಹೇಳಿದರು.
ನಾಯಂಡಹಳ್ಳಿ ಜಂಕ್ಷನ್ನಿಂದ ಬನ್ನೇರುಘಟ್ಟದವರೆಗೂ ಇರುವ 12 ಕಿ.ಮೀ ರಸ್ತೆಗೆ ಪುನೀತ್ ರಾಜಕುಮಾರ್ ಹೆಸರು ನಾಮಕರಣ ಮಾಡಿ ಮಾತನಾಡಿರುವ ಅವರು, 'ಅಪ್ಪು ಅವರನ್ನು ನಾನು ಚಿಕ್ಕವಯಸ್ಸಿನಿಂದ ನೋಡಿದ್ದೇನೆ. ಚಿಕ್ಕ ವಯಸ್ಸಿನಲ್ಲಿ ಸಾಧನೆ ಮಾಡಿದವರನ್ನ ನಾನು ನೋಡಿದ್ದೇನೆ.ಅಪ್ಪು ಕೂಡ ಚಿಕ್ಕವಯಸ್ಸಿನಲ್ಲೇ ಸಾಧಿಸಿ ಹೋದವರು. ಅಪ್ಪು ಅಗಲಿದಾಗ ಜನಸಾಗರವೇ ಹರಿದು ಬಂತು. ಕೆಲವು ದಿನಗಳ ಹಿಂದೆ ನಾನು ಬೀದರ್ಗೆ ಹೋಗಿದ್ದೆ. ಅಲ್ಲಿನ ಜನ ಅಪ್ಪು ಫೋಟೋ ಹಿಡಿದು ನಮ್ಮ ಬಳಿ ಫೋಟೋ ತೆಗೆಸಿಕೊಳ್ಳಿ ಎಂದ ಗಲಾಟೆ ಮಾಡಿದರು. ಅಪ್ಪು ನಿಜವಾದ ಸಾಧಕ. ಸಾವಿನ ನಂತರವು ನೆನಪಿನಲ್ಲಿ ಇರೋರು ನಿಜವಾದ ಸಾಧಕ' ಎಂದು ಹೇಳಿದರು.
ಈ ಸಂದರ್ಭದಲ್ಲಿ ಮಾತನಾಡಿದ ನಟ ಹಾಗೂ ಪುನೀತ್ ಸಹೋದರ ರಾಘವೇಂದ್ರ ರಾಜಕುಮಾರ್, 'ಕೆಲವು ಕಾರ್ಯಕ್ರಮಗಳಲ್ಲಿ ಸಂತೋಷ ಪಡಬೇಕೋ, ಕಣ್ಣೀರು ಹಾಕಬೇಕೋ ಗೊತ್ತಾಗುವುದಿಲ್ಲ. ಆ ಸಂದಿಗ್ಧ ಪರಿಸ್ಥಿತಿ ಇವತ್ತು ಸಹ ಇದೆ. ಕೋಟ್ಯಾಂತರ ಜನರ ಮಧ್ಯೆ ನಾನ್ಯಾಕೆ ಅಪ್ಪುಗೆ ಅಣ್ಣನಾಗಿ ಹುಟ್ಟಿದೆ ಅಂತ ಯಾವಾಗಲೂ ಕಾಡುತ್ತದೆ. ಅಪ್ಪು ಇನ್ನು ಸಾಕಷ್ಟು ಕೆಲಸಗಳು ಮಾಡೋದಿತ್ತು. ಆದರೆ, ಆ ಕೆಲಸಗಳನ್ನು ನಮಗೆ ವಹಿಸಿ ಹೋಗಿದ್ದಾನೆ. ಅಪ್ಪು ದಾರಿಯಲ್ಲಿ ನಾವೆಲ್ಲರೂ ನಡೆಯಬೇಕು. ನಾನು ಅದೇ ದಾರಿಯಲ್ಲಿ ಸಾಗುತ್ತೇನೆ' ಎಂದರು.
ಈ ಸಂದರ್ಭದಲ್ಲಿ ಸಂಸದ ತೇಜಸ್ವಿ ಸೂರ್ಯ, ಸಚಿವ ಆರ್. ಅಶೋಕ್, ಅಶ್ವಿನಿ ಪುನೀತ್ ರಾಜಕುಮಾರ್ ಸೇರಿದಂತೆ ಹಲವರು ಭಾಗವಹಿಸಿದ್ದರು.