ಮುಂಬೈ: ಭಾರತೀಯ ಮಹಿಳಾ ಕ್ರಿಕೆಟ್ ತಂಡದ ಆಟಗಾರ್ತಿ ಮತ್ತು ಮಾಜಿ ಕ್ಯಾಪ್ಟನ್ ಜುಲಾನ್ ಗೋಸ್ವಾಮಿ ಅವರ ಬಯೋಪಿಕ್ನಲ್ಲಿ ಅನುಷ್ಕಾ ಶರ್ಮ ನಟಿಸಲಿದ್ದಾರೆ ಎಂಬ ಸುದ್ದಿ ಕಳೆದ ವರ್ಷ ಕೇಳಿ ಬಂದಿತ್ತು. ಈಗ ಆ ಚಿತ್ರದ ಚಿತ್ರೀಕರಣ ಮುಕ್ತಾಯವಾಗಿದ್ದು, ಈ ಸಂದರ್ಭದಲ್ಲಿ ಜುಲಾನ್ ಗೋಸ್ವಾಮಿ ಸಹ ಹಾಜರಿದ್ದರು.
ಆರು ನಗರಗಳಲ್ಲಿ, ಸುಮಾರು ಏಳು ಹಂತಗಳಲ್ಲಿ ಈ ಚಿತ್ರಕ್ಕೆ ಒಟ್ಟು 65 ದಿನಗಳ ಚಿತ್ರೀಕರಣವಾಗಿದ್ದು, ಇದೀಗ ಮುಕ್ತಾಯವಾಗಿದೆ. ಇತ್ತೀಚೆಗೆ ಚಿತ್ರತಂಡ ಕೇಕ್ ಕತ್ತರಿಸಿ ಸಂಭ್ರಮಿಸಿದೆ. ಈ ಸಂದರ್ಭದಲ್ಲಿ ಜುಲಾನ್ ಗೋಸ್ವಾಮಿ ಸಹ ಹಾಜರಿದ್ದು, ಚಿತ್ರತಂಡಕ್ಕೆ ಶುಭ ಹಾರೈಸಿದ್ದಾರೆ.
ಅನುಷ್ಕಾ ಶರ್ಮಾ ನಟಿಸಿದ ಕೊನೇ ಸಿನಿಮಾ 2018ರಲ್ಲಿ ಬಂದ 'ಜೀರೋ'. ಅದಾದ ಬಳಿಕ ನಿರ್ಮಾಣದಲ್ಲಿ ತೊಡಗಿಸಿಕೊಂಡರಾದರೂ, ನಟನೆಗೆ ಮರಳಲಿಲ್ಲ. ಅಷ್ಟರಲ್ಲಿಯೇ ಮಗಳು ವಮಿಕಾಳ ಆಗಮನವೂ ಆಯಿತು. ಇನ್ನೇನು ಸಿನಿಮಾರಂಗ ಕೈಬಿಟ್ಟರು ಎನ್ನುವಷ್ಟರಲ್ಲಿಯೇ ಅನುಷ್ಕಾ, 'ಚಕ್ಡಾ ಎಕ್ಸ್ಪ್ರೆಸ್' ಚಿತ್ರದ ಮೂಲಕ 2023ರಲ್ಲಿ ವಾಪಸ್ಸಾಗಲಿದ್ದಾರೆ. ಈ ಚಿತ್ರದ ಟೀಸರ್ ಈಗಾಗಲೇ ಬಿಡುಗಡೆ ಆಗಿದ್ದು, ಚಿತ್ರವು ನೇರವಾಗಿ ನೆಟ್ಫ್ಲಿಕ್ಸ್ನಲ್ಲಿ ಸ್ಟ್ರೀಮ್ ಆಗಲಿದೆ ಎಂದು ಹೇಳಲಾಗುತ್ತಿದೆ.