ಬೆಂಗಳೂರು: ಜಗ್ಗೇಶ್ ಅವರು ಚಿತ್ರರಂಗದಲ್ಲಿ 40 ವರ್ಷಗಳನ್ನು ಪೂರೈಸಿದ ಖುಷಿಯಲ್ಲಿ ಮಂಗಳವಾರವಷ್ಟೇ ಮಾಧ್ಯಮದವರ ಜತೆಗೆ ಮನಬಿಚ್ಚಿ ಮಾತನಾಡಿದ್ದಾರೆ. ತಮ್ಮ ನಾಲ್ಕು ದಶಕಗಳ ಪಯಣವನ್ನು ವಿವರಿಸಿದ್ದಾರೆ. ಪೋಷಕ ನಟನಾಗಿದ್ದವನು ಹೀರೋ ಆಗಿ, ಆ ನಂತರ ಹೇಗೆಲ್ಲಾ ನಡೆದು ಬಂದೆ ಎಂಬ ವಿಷಯವನ್ನು ಹೇಳಿಕೊಂಡಿದ್ದಾರೆ.
ಎಲ್ಲಾ ಸರಿ, ಪೋಷಕ ನಟರಾಗಿದ್ದ ಅವರು, ಹೀರೋ ಆಗಿದ್ದು ಹೇಗೆ ಮತ್ತು ಯಾಕೆ? ಈ ಪ್ರಶ್ನೆ ಬರದೇ ಇರದು. ಇಷ್ಟಕ್ಕೂ ಜಗ್ಗೇಶ್ ಅವರು ಹೀರೋ ಆಗುವುದಕ್ಕೆ ಕಾರಣ ಯಾರು ಗೊತ್ತಾ? ಅವರನ್ನು ಹೀರೋ ಆಗುವುದಕ್ಕೆ ಪ್ರೇರೇಪಿಸಿದ್ದು ಯಾರು ಗೊತ್ತಾ? ಅಂಬರೀಶ್ ಎಂದು ಅವರೇ ಹೇಳಿಕೊಂಡಿದ್ದಾರೆ.
90ರ ದಶಕದ ಆರಂಭದಲ್ಲಿ ಅಂಬರೀಶ್ ಅವರ ಜತೆಗೆ ಒಂದು ಚಿತ್ರದಲ್ಲಿ ಅಭಿನಯಿಸುತ್ತಿದ್ದರಂತೆ ಜಗ್ಗೇಶ್. ನಂಜನಗೂಡಿನಲ್ಲಿ ಚಿತ್ರೀಕರಣ ನಡೆಯುವಾಗ, ಜನ ಜಗ್ಗೇಶ್ ಅವರಿಗೆ ಜೈಕಾರ ಹಾಕುತ್ತಿದ್ದರಂತೆ. ಇದನ್ನು ನೋಡಿದ ಅಂಬರೀಶ್, 'ನೀನಿನ್ನು ಹೀರೋ ಆಗು' ಎಂದು ಹೇಳಿದರಂತೆ.
'ಅಂಬರೀಶ್ ಅವರು ಹೀರೋ ಆಗು ಎಂದಾಗ, ತಕ್ಷಣ ಬೇಡ ಗುರು ಎಂದೆ. ಆದರೆ, ಅವರು ಒತ್ತಾಯ ಮಾಡಿದರು. ಕೊನೆಗೆ 'ತರ್ಲೆ ನನ್ಮಗ' ಚಿತ್ರ ಮೂಲಕ ಹೀರೋ ಆದೆ. ಕಾರಣಾಂತರಗಳಿಂದ ಆ ಚಿತ್ರ ನಿಂತು ಹೋಯಿತು. ಆ ನಂತರ ನಮ್ಮ ಬಾವ ಶ್ರೀನಿವಾಸ್ ಜತೆಗೆ ಸೇರಿ 'ಭಂಡ ನನ್ನ ಗಂಡ' ಮಾಡಿದೆ. ಆ ಚಿತ್ರದಲ್ಲಿ ಒಂದು ಅತಿಥಿ ಪಾತ್ರವಿತ್ತು. ಆ ಪಾತ್ರವನ್ನು ಅಂಬರೀಶ್ ಅವರೇ ಮಾಡಿದರೆ ಚೆನ್ನಾಗಿರುತ್ತದೆ ಎಂದು ಹೋಗಿ ಕೇಳಿದೆ. ಅವರು ಒಪ್ಪಿ ಅತಿಥಿ ಪಾತ್ರ ಮಾಡಿದರು' ಎಂದು ನೆನಪಿಸಿಕೊಳ್ಳುತ್ತಾರೆ ಜಗ್ಗೇಶ್.
ಇನ್ನು ಚಿತ್ರವನ್ನು ವಿತರಿಸುವುದಕ್ಕೆ ಯಾರೂ ಮುಂದೆ ಬರದಿದ್ದಾಗ, ಜಗ್ಗೇಶ್ ಮತ್ತೆ ಹೋಗಿದ್ದು ಅಂಬರೀಶ್ ಬಳಿಗಂತೆ. 'ರಾತ್ರಿ ಅವರ ಮನೆಗೆ ಹೋಗಿದ್ದೆ. ನಿಮ್ಮ ಮಾತು ಕೇಳಿ ಹೀರೋ ಆದೆ, ಈಗ ಚಿತ್ರ ಬಿಡುಗಡೆಯಾಗುತ್ತಿಲ್ಲ ಎಂದೆ. ಮುಂದೆ ಏನ್ಮಾಡಲಿ ಎಂದೆ. ಆಯ್ತು ಹೋಗು ಅಂತ ಕಳುಹಿಸಿದರು. ಬೆಳಿಗ್ಗೆ ಮಾಣಿಕ್ಚಂದ್ ಅವರಿಂದ ಫೋನ್ ಬಂತು. ಅವರು ಚಿತ್ರ ಬಿಡುಗಡೆಯಾಗುವುದಕ್ಕೆ ಮುಂದೆ ಬಂದರು. ಅವರೇ ಐದು ಲಕ್ಷ ಹಾಕಿ ಚಿತ್ರ ಬಿಡುಗಡೆ ಮಾಡಿದರು. ಆ ಚಿತ್ರ ಆಗಿನ ಕಾಲಕ್ಕೆ ಒಂದು ಕೋಟಿ ಬ್ಯುಸಿನೆಸ್ ಮಾಡಿತ್ತು. ಮಾಣಿಕ್ಚಂದ್ 20 ಲಕ್ಷ ಕಮಿಷನ್ ತೆಗೆದುಕೊಂಡರು. ಆ ಮಟ್ಟಿಗೆ ಚಿತ್ರ ಹಿಟ್ ಆಗಿತ್ತು. ಹೀಗೆ ಕೈಹಿಡಿದು ನನ್ನನ್ನು ಹೀರೋ ಮಾಡಿಸಿದರು ಅಂಬರೀಶ್' ಎನ್ನುತ್ತಾರೆ ಜಗ್ಗೇಶ್.