ಲಾಕ್ಡೌನ್ ಶುರುವಾದಾಗಿನಿಂದ ಒಂದಲ್ಲ ಒಂದು ರೀತಿ ಸಹಾಯಕ್ಕೆ ಧಾವಿಸುತ್ತಿರುವ ನಟರಲ್ಲಿ ಅಕ್ಷಯ್ ಕುಮಾರ್ ಸಹ ಕಾಣಿಸುತ್ತಾರೆ. ಬಾಲಿವುಡ್ನಲ್ಲಿ ಮೊದಲ ಬಾರಿಗೆ ಪಿಎಂ ಕೇರ್ಸ್ಗೆ 25 ಕೋಟಿ ರೂ ನೀಡಿ ಮೆಚ್ಚುಗೆಯನ್ನೂ ಪಡೆದುಕೊಂಡಿದ್ದರು ಈ ಬಾಲಿವುಡ್ ಕಿಲಾಡಿ. ಇದೀಗ ಕರೊನಾ ವಾರಿಯರ್ಸ್ ಬೆನ್ನಿಗೆ ನಿಂತಿದ್ದಾರೆ. ಕರೊನಾ ಸೋಕಿಂತರನ್ನು ಪತ್ತೆ ಮಾಡುವ ಯಂತ್ರವೊಂದನ್ನು ಮುಂಬೈ ಪೊಲೀಸರಿಗೆ ವಿತರಿಸಿದ್ದಾರೆ.
ತಾಂತ್ರಿಕವಾಗಿ ರೋಗದ ಲಕ್ಷಣವನ್ನು ಪತ್ತೆ ಹಚ್ಚುವ ಕೈಗೆ ಧರಿಸುವ ಸಾಧನವನ್ನ ಮುಂಬೈನ 1000ಕ್ಕೂ ಅಧಿಕ ಪೊಲೀಸ್ ಸಿಬ್ಬಂದಿಗೆ ನೀಡಿದ್ದಾರೆ. ಜರ್ಮನ್ ಮೂಲದ ಆರೋಗ್ಯಕ್ಕೆ ಸಂಬಂಧಿಸಿದ ಸ್ಟಾರ್ಟ್ಅಪ್ ಕಂಪನಿಯೊಂದು ಈ ಯಂತ್ರವನ್ನು ಸಿದ್ಧಪಡಿಸಿದ್ದು, ಅದು ಜಿಒಕ್ಯೂಐಐ ಸಂಸ್ಥೆ ಜತೆಗೆ ಪಾಲುದಾರಿಕೆ ಹೊಂದಿದೆ. ಆ ಜಿಒಕ್ಯೂಐಐ ಸಂಸ್ಥೆಗೆ ಅಕ್ಷಯ್ ಕುಮಾರ್ ರಾಯಭಾರಿಯಾಗಿದ್ದು, ಅದನ್ನೇ ಬಳಸಿಕೊಂಡು ಕೈಗೆ ಧರಿಸುವ ಸಾಧನವನ್ನು ವಿತರಿಸಿದ್ದಾರೆ.
ಈ ಸಾಧನದ ಕೆಲಸವೇನು? ದೇಹದ ಉಷ್ಣತೆ, ಹೃದಯ ಬಡಿತ, ರಕ್ತದೊತ್ತಡ, ನಡಿಗೆ, ಕ್ಯಾಲೋರಿಸ್ ಕೌಂಟ್ ಹೀಗೆ ಹಲವು ಉಪಯುಕ್ತಕಾರಿ ಅಂಶಗಳ ಬಗ್ಗೆ ಮಾಹಿತಿ ನೀಡಲಿದೆ. ಕರೊನಾ ರೋಗಲಕ್ಷಣಗಳನ್ನೂ ಇದು ಪತ್ತೆಮಾಡಲಿದೆ. ಈಗಾಗಲೇ ವಿದೇಶದಲ್ಲಿ ಈ ಸಾಧನ ಲಭ್ಯವಿದ್ದು, ಭಾರತದಲ್ಲಿ ಮುಂದಿನ ದಿನಗಳಲ್ಲಿ ಮಾರಾಟಕ್ಕೆ ಸಿಗಲಿದೆ. ಕೇವಲ ಕರೊನಾ ವಾರಿಯರ್ಸ್ಗಷ್ಟೇ ಅಲ್ಲದೆ, ಸಾರ್ವಜನಿಕವಾಗಿಯೂ ಇದನ್ನು ಧರಿಸಬಹುದಂತೆ. (ಏಜೆನ್ಸೀಸ್)