ಮುಂಬೈ: ಸುಮಾರು 4000 ಕೋಟಿ ರೂಪಾಯಿಗಳ ಬೃಹತ್ ಬಜೆಟ್‌ನಲ್ಲಿ ಎರಡು ಭಾಗಗಳಲ್ಲಿ ತಯಾರಾಗುತ್ತಿರುವ, ಭಾರತೀಯ ಚಿತ್ರರಂಗದ ಅತಿದೊಡ್ಡ ಸಿನಿಮಾ 'ರಾಮಾಯಣ'ದ ( Ramayana ) ಮೊದಲ ಭಾಗ ಇಂದು ಚಿತ್ರಮಂದಿರಗಳ ಬಾಗಿಲು ತಟ್ಟಿದೆ. ತಲೆಮಾರುಗಳಿಂದ ಜನಮಾನಸದಲ್ಲಿ ಅಚ್ಚೊತ್ತಿರುವ ಪವಿತ್ರ ರಾಮಾಯಣದ ಕಥೆಯನ್ನು ಆಧುನಿಕ ತಂತ್ರಜ್ಞಾನ ಮತ್ತು ಅದ್ದೂರಿ ದೃಶ್ಯಕಾವ್ಯದ ರೂಪದಲ್ಲಿ ಬೆಳ್ಳಿಪರದೆಯ ಮೇಲೆ ತರಲಾಗಿದೆ. ಈ ಚಿತ್ರದ ಕಥೆ ಮತ್ತು ಪ್ರಮುಖ ನಟರ ಅಭಿನಯದ ಸಂಪೂರ್ಣ ವಿಮರ್ಶೆ ಇಲ್ಲಿದೆ.
ಚಿತ್ರದ ಆರಂಭಿಕ 30 ನಿಮಿಷಗಳು ಸಂಪೂರ್ಣವಾಗಿ ಲಂಕಾಧಿಪತಿ ರಾವಣನ ಅಧಿಪತ್ಯ ಮತ್ತು ಅವನ ಪರಿವರ್ತನೆಯ ಮೇಲೆ ಬೆಳಕು ಚೆಲ್ಲುತ್ತದೆ. ಸಾಮಾನ್ಯ ಸಿನಿಮಾಗಳಲ್ಲಿ ನಾಯಕನ ಪರಿಚಯದಿಂದ ಕಥೆ ಆರಂಭವಾದರೆ, ಇಲ್ಲ ನಿರ್ದೇಶಕರು ರಾವಣನ ಹಿನ್ನೆಲೆ, ತಾಯಿ ಕೈಕಸಿಯ ಕೋರಿಕೆ ಮತ್ತು ಬ್ರಹ್ಮದೇವನಿಂದ ವರ ಪಡೆಯಲು ಆತ ನಡೆಸುವ ಕಠಿಣ ತಪಸ್ಸಿಗೆ ಹೆಚ್ಚಿನ ಒತ್ತು ನೀಡಿದ್ದಾರೆ. ಈ ಮುಖಾಂತರ ರಾವಣನ ಪಾತ್ರದ ಆಳ ಮತ್ತು ಆತನ ಅಸುರ ಶಕ್ತಿಯನ್ನು ಅತ್ಯಂತ ಭವ್ಯವಾಗಿ ಪ್ರದರ್ಶಿಸಲಾಗಿದೆ. ಪ್ರಥಮಾರ್ಧದ ಈ ದೃಶ್ಯಗಳಲ್ಲಿ ಕನ್ನಡಿಗರ ಹೆಮ್ಮೆಯ ನಟ ಯಶ್ ತಮ್ಮ ಕಟ್ಟುಮಸ್ತಾದ ದೇಹದಂಡನೆ, ತೀವ್ರತೆಯ ಕಣ್ಣೋಟ ಹಾಗೂ ರಾಜಸಿಕ ನಡಿಗೆಯಿಂದ ಪರದೆಯ ಮೇಲೆ ಅಕ್ಷರಶಃ ಆರ್ಭಟಿಸಿದ್ದಾರೆ. ರಾವಣನ ಉಗ್ರರೂಪ ಮತ್ತು ದಶಾವತಾರದ ದೃಶ್ಯಗಳಲ್ಲಿ ಯಶ್ ಅವರ ಸ್ಕ್ರೀನ್ ಪ್ರೆಸೆನ್ಸ್ ಪ್ರೇಕ್ಷಕರನ್ನು ಮಂತ್ರಮುಗ್ಧರನ್ನಾಗಿಸುತ್ತದೆ ಮತ್ತು ರಣಬೀರ್‌ಗಿಂತಲೂ ಹೆಚ್ಚು ಹೈಲೈಟ್ ಆಗಿ ಕಾಣಿಸಿಕೊಳ್ಳುತ್ತಾರೆ.
ಮತ್ತೊಂದೆಡೆ, ಶ್ರೀರಾಮನಾಗಿ ಪರದೆಯ ಮೇಲೆ ಕಾಣಿಸಿಕೊಂಡಿರುವ ರಣಬೀರ್ ಕಪೂರ್ ತಮ್ಮ ಪಾತ್ರಕ್ಕೆ ಗರಿಷ್ಠ ಮಟ್ಟದ ನ್ಯಾಯ ಒದಗಿಸಲು ಶ್ರಮಿಸಿದ್ದಾರೆ. ಇತ್ತೀಚೆಗೆ ಬಿಡುಗಡೆಯಾಗಿದ್ದ ಹಿಂಸಾತ್ಮಕ 'ಅನಿಮಲ್' ಚಿತ್ರದ ಛಾಯೆಯನ್ನು ಸಂಪೂರ್ಣವಾಗಿ ಕಳಚಿಹಾಕಿ, ಶಾಂತ, ಧೀರ ಹಾಗೂ ಮರ್ಯಾದಾ ಪುರುಷೋತ್ತಮನಾಗಿ ರೂಪಾಂತರಗೊಳ್ಳುವುದು ಸವಾಲಿನ ಕೆಲಸವಾಗಿತ್ತು. ಬಿಲ್ಲು-ಬಾಣ ಹಿಡಿದು ಸಮರಭೂಮಿಯಲ್ಲಿ ಹೋರಾಡುವ ಆಕ್ಷನ್ ದೃಶ್ಯಗಳಲ್ಲಿ ಮತ್ತು ಮುಖದ ಸೌಮ್ಯ ಭಾವನೆ ವ್ಯಕ್ತಪಡಿಸುವಲ್ಲಿ ರಣಬೀರ್ ಮಿಂಚಿದ್ದಾರೆ. ಆದರೆ, ಅವರ ಧ್ವನಿ ಸಂಭಾಷಣೆ ಮತ್ತು ಸಂಸ್ಕೃತ ಪದಗಳ ಉಚ್ಚಾರಣೆಯಲ್ಲಿ ಸ್ವಲ್ಪಮಟ್ಟಿನ ಕೃತಕತೆ ಎದ್ದು ಕಾಣುತ್ತದೆ. ಯಶ್ ಅವರ ಗಂಭೀರ ಧ್ವನಿ ಮತ್ತು ಆರ್ಭಟದ ಮುಂದೆ, ಈ ಮೊದಲ ಭಾಗದಲ್ಲಿ ರಣಬೀರ್ ಕಪೂರ್ ಅವರ ನಾಯಕನ ಪಾತ್ರ ಕೊಂಚ ಶ್ಯಾಡೋ ಆದಂತೆ ಭಾಸವಾಗುವುದು ಸತ್ಯ.
ಈ ಚಿತ್ರದ ಮತ್ತೊಂದು ದೊಡ್ಡ ವಿಶೇಷತೆಯೆಂದರೆ ಸೀತಾಮಾತೆಯ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ಸಾಯಿ ಪಲ್ಲವಿ ಅವರ ಅಭಿನಯ. ಸಾಂಪ್ರದಾಯಿಕವಾಗಿ ಸೀತೆಯನ್ನು ಕೇವಲ ಸೌಮ್ಯ ಹಾಗೂ ರಕ್ಷಣೆ ಬಯಸುವ ಪಾತ್ರವಾಗಿ ತೋರಿಸಲಾಗುತ್ತಿತ್ತು, ಆದರೆ ಈ ರಾಮಾಯಣದಲ್ಲಿ ಸೀತೆ ಖಡ್ಗ ಹಿಡಿದು ಶತ್ರುಗಳ ವಿರುದ್ಧ ಹೋರಾಡುವ ವೀರಾಂಗನೆಯಾಗಿ ಮೂಡಿಬಂದಿದ್ದಾಳೆ. ಸಾಯಿ ಪಲ್ಲವಿ ತಮ್ಮ ಸಹಜ ಅಭಿನಯ ಮತ್ತು ಸಾಹಸ ದೃಶ್ಯಗಳ ಮೂಲಕ ಪ್ರೇಕ್ಷಕರ ಮನ ಗೆಲ್ಲುತ್ತಾರೆ. ಇನ್ನು ದಶರಥ ಮಹಾರಾಜನಾಗಿ ಹಿರಿಯ ನಟ ಅರುಣ್ ಗೋವಿಲ್ (ಹಳೆಯ ರಾಮಾಯಣದ ರಾಮ) ಅವರ ನಟನೆ ಅತ್ಯಂತ ಭಾವುಕವಾಗಿದ್ದು, ಅವರ ಧ್ವನಿ ಮತ್ತು ಸ್ಕ್ರೀನ್ ಪ್ರೆಸೆನ್ಸ್ ಅನುಭವೀ ಕ್ರೀಡಾಪಟುವಿನಂತೆ ಗಂಭೀರತೆ ತಂದಿದೆ. ಲಕ್ಷ್ಮಣನಾಗಿ ರವಿ ದುಬೆ ಹಾಗೂ ಪರಶುರಾಮನ ಶಕ್ತಿಶಾಲಿ ಎಂಟ್ರಿ ದೃಶ್ಯಗಳು ರೋಮಾಂಚನ ಉಂಟುಮಾಡುತ್ತವೆ.
ಚಿತ್ರದ ತಾಂತ್ರಿಕ ಮಗ್ಗಲುಗಳನ್ನು ಪರಿಶೀಲಿಸಿದಾಗ, ಹಿನ್ನೆಲೆ ಸಂಗೀತ ಮತ್ತು ಧ್ವನಿ ಸಂಯೋಜನೆ ಅತ್ಯಂತ ಪ್ರಭಾವಶಾಲಿಯಾಗಿ ಮೂಡಿಬಂದಿದೆ. ಸೀತಾಸವಯಂವರ, ಶ್ರೀರಾಮ ಶಿವಧನಸ್ಸನ್ನು ಮುರಿಯುವ ಸನ್ನಿವೇಶ, ಪರಶುರಾಮ ಮತ್ತು ಲಕ್ಷ್ಮಣರ ನಡುವಿನ ಸಂಭಾಷಣೆ ಹಾಗೂ ಚಿತ್ರದ ಕ್ಲೈಮ್ಯಾಕ್ಸ್‌ನಲ್ಲಿ ಹನುಮಂತನಾಗಿ ಸನ್ನಿ ಡಿಯೋಲ್ ಅವರ ಧಮಾಕಾದಾರ್ ಪರಿಚಯದ ದೃಶ್ಯಗಳು ಥಿಯೇಟರ್‌ನಲ್ಲಿ ಚಪ್ಪಾಳೆ ಗಿಟ್ಟಿಸುತ್ತವೆ. ನಿರ್ದೇಶಕ ನಿತೇಶ್ ತಿವಾರಿ ಅವರು ಪೌರಾಣಿಕ ಮೂಲಕ್ಕೆ ಧಕ್ಕೆಯಾಗದಂತೆ, ಸಾರ್ವಜನಿಕರ ನಂಬಿಕೆಯನ್ನು ಗೌರವಿಸಿ ಯಾವುದೇ ಅನಗತ್ಯ ಪ್ರಯೋಗಗಳಿಗೆ ಕೈಹಾಕದೆ ಎಚ್ಚರಿಕೆಯ ನಿರ್ದೇಶನ ನೀಡಿದ್ದಾರೆ. ಜಾಗತಿಕ ಮಟ್ಟದ ಪ್ರೇಕ್ಷಕರನ್ನು ತಲುಪುವ ಸಕಲ ಅರ್ಹತೆಗಳು ಚಿತ್ರದ ಮೇಕಿಂಗ್‌ನಲ್ಲಿ ಎದ್ದು ಕಾಣುತ್ತವೆ.
ಆದಾಗ್ಯೂ, ಈ ಬೃಹತ್ ಸಿನಿಮಾದಲ್ಲಿ ಕೆಲವು ಎದ್ದು ಕಾಣುವ ಲೋಪದೋಷಗಳೂ ಇವೆ. ಕಥೆಯನ್ನು ವೇಗವಾಗಿ ಮುನ್ನಡೆಸುವ ಆತುರದಲ್ಲಿ ಕೆಲವು ಪ್ರಮುಖ ಘಟನೆಗಳನ್ನು ಕೇವಲ ಕೆಲವೇ ಸೆಕೆಂಡುಗಳಲ್ಲಿ ಮುಗಿಸಿರುವುದು ಪ್ರೇಕ್ಷಕರಲ್ಲಿ ಅತೃಪ್ತಿ ಮೂಡಿಸುತ್ತದೆ. ವಿಶೇಷವಾಗಿ ರಾಮ-ಭರತರ ಮಿಲನದಂತಹ ಭಾವನಾತ್ಮಕ ಸನ್ನಿವೇಶ ಮತ್ತು ಪರುಶುರಾಮ-ಲಕ್ಷ್ಮಣರ ವಾಗ್ವಾದದ ದೃಶ್ಯಗಳು ಇನ್ನೂ ಸ್ವಲ್ಪ ಸುದೀರ್ಘವಾಗಿರಬೇಕಿತ್ತು ಎನಿಸುತ್ತದೆ. ಜೊತೆಗೆ, ಸಹಾಯಕ ಪಾತ್ರಗಳಾದ ಭರತ ಮತ್ತು ಶತ್ರುಘ್ನರ ಪಾತ್ರಗಳನ್ನು ತೀವ್ರವಾಗಿ ಕಡಿತಗೊಳಿಸಿ, ಕೇವಲ ರಾಮ ಮತ್ತು ರಾವಣನ ಮುಖಾಮುಖಿಗಷ್ಟೇ ಹೆಚ್ಚಿನ ಗಮನ ನೀಡಲಾಗಿದೆ. ಇದು ಕಥೆಯ ಭಾವನಾತ್ಮಕ ಆಳವನ್ನು ಕೊಂಚ ಕಡಿಮೆ ಮಾಡಿದೆ.
ಇನ್ನೊಂದು ಪ್ರಮುಖ ನಿರಾಶಾದಾಯಕ ಅಂಶವೆಂದರೆ ವಿಎಫ್‌ಎಕ್ಸ್ (VFX) ಮತ್ತು ಪಾತ್ರವರ್ಗದ ದುರುಪಯೋಗ. ಲಂಕೆಯ ರಾಕ್ಷಸರನ್ನು ತೋರಿಸುವ ಭರದಲ್ಲಿ ಮಹಾನ್ ನಟರ ಸಹಜ ಮುಖಗಳನ್ನೇ ಮರೆಮಾಚಲಾಗಿದೆ. ಉದಾಹರಣೆಗೆ, 'ಪಂಚಾಯತ್' ಸರಣಿಯ ಪ್ರಖ್ಯಾತ ನಟ ಫೈಸಲ್ ಮಲಿಕ್ ಅವರು ಕುಂಭಕರ್ಣನ ಪಾತ್ರ ಮಾಡಿದ್ದರೂ, ಅವರ ಮುಖಕ್ಕೆ ಬಳಸಲಾದ ಭಾರಿ ಸಿಜಿಐ ಹಾಗೂ ಮೇಕಪ್‌ನಿಂದಾಗಿ ಅವರನ್ನು ಗುರುತಿಸುವುದೇ ಸಾಧ್ಯವಾಗುವುದಿಲ್ಲ. ಪ್ರೇಕ್ಷಕರು ಇಂತಹ ಪ್ರತಿಭಾವಂತ ನಟರ ಅಭಿನಯವನ್ನು ನೋಡಲು ಬಯಸುತ್ತಾರೆಯೇ ಹೊರತು ಸಂಪೂರ್ಣವಾಗಿ ಕೃತಕ ಗ್ರಾಫಿಕ್ಸ್ ಅನ್ನಲ್ಲ. ಕೆಲವು ಕಡೆಗಳಲ್ಲಿ ಬಳಸಲಾದ ಸಿಜಿಐ ದೃಶ್ಯಗಳು ತೀರಾ ಕೃತಕವಾಗಿ ಕಾಣುತ್ತಿದ್ದು, 4000 ಕೋಟಿ ಬಜೆಟ್‌ಗೆ ತಕ್ಕಂತಹ ನೈಜತೆಯನ್ನು ತರಲು ವಿಫಲವಾಗಿವೆ.
ಅಂತಿಮವಾಗಿ ಹೇಳುವುದಾದರೆ, ನಿತೇಶ್ ತಿವಾರಿಯ 'ರಾಮಾಯಣ' ಭಾರತೀಯ ಚಿತ್ರರಂಗದ ಇತಿಹಾಸದಲ್ಲಿ ಒಂದು ಹೊಸ ದೃಶ್ಯ ಕ್ರಾಂತಿಯಾಗಿದೆ. ರಣಬೀರ್ ಕಪೂರ್ ತಮ್ಮ ಸೌಮ್ಯ ನಟನೆಯಿಂದ ರಾಮನಾಗಿ ಸಭ್ಯತೆ ಮೆರೆದರೆ, ಯಶ್ ತಮ್ಮ ರೌದ್ರಾವತಾರದ ಮೂಲಕ ಇಡೀ ಸಿನಿಮಾದ ಮೊದಲ ಭಾಗವನ್ನು ತಮ್ಮದಾಗಿಸಿಕೊಂಡು ಸಂಪೂರ್ಣವಾಗಿ ಮಿಂಚಿದ್ದಾರೆ. ಕಥಾ ನಿರೂಪಣೆಯಲ್ಲಿನ ಕೆಲವು ನ್ಯೂನತೆಗಳು ಮತ್ತು ಧ್ವನಿ ಸಂಭಾಷಣೆಯ ಮಿತಿಗಳನ್ನು ಹೊರತುಪಡಿಸಿದರೆ, ಚಿತ್ರಮಂದಿರದಲ್ಲೇ ಅನುಭವಿಸಬೇಕಾದ ಒಂದು ಅದ್ದೂರಿ ಚಿತ್ರವಿದು. ಭಾರತೀಯ ಸಂಸ್ಕೃತಿ ಮತ್ತು ಆಧುನಿಕ ತಂತ್ರಜ್ಞಾನದ ಈ ಸಮ್ಮಿಲನವನ್ನು ಪ್ರತಿಯೊಬ್ಬ ಸಿನೆಮಾ ಪ್ರಿಯನೂ ಒಮ್ಮೆ ನೋಡಿ ಆನಂದಿಸಬಹುದು, (ಏಜೆನ್ಸೀಸ್).