ಉಡುತಡಿಯಲ್ಲಿ ಹುಟ್ಟಿ (ಶಿವಮೊಗ್ಗ ಜಿಲ್ಲೆಯ ಶಿಕಾರಿಪುರ ತಾಲೂಕು), ಬೆಳೆದು ಸ್ಥಳೀಯ ರಾಜ ಕೌಶಿಕನ ಮೋಹಪಾಶಕ್ಕೆ ಒಳಗಾಗದೆ, ಬುದ್ಧಿವಂತಿಕೆಯಿಂದ ಹೆತ್ತವರನ್ನು ಪಾರು ಮಾಡಿದ್ದಲ್ಲದೆ, ನಡೆಸಲು ಸಾಧ್ಯವಾಗದ ಷರತ್ತುಗಳನ್ನು ಹಾಕಿ ವಚನಭಂಗವನ್ನು ಮಾಡಿದ ಕೌಶಿಕ ರಾಜನನ್ನು, ‘ಏ ಕೌಶಿಕ ನೀನು ಸೋತಿದ್ದೀಯಾ. ಕೊಟ್ಟ ಮಾತುಗಳನ್ನು ಪಾಲಿಸಿಲ್ಲ. ನಾನು ಹೋಗುತ್ತೇನೆ’ ಎಂದು ಹೊರಟಳು. ಕಾಡುಮೇಡುಗಳಲ್ಲಿ ಸಂಚರಿಸಿ, ‘ಅಳಿ ಸಂಕುಲವೇ, ಮಾಮರವೇ, ಕೋಗಿಲೆಯೇ ನೀವು ಕಾಣಿರೇ’ ಎಂದು ಚನ್ನಮಲ್ಲಿಕಾರ್ಜುನನ ಹುಡುಕಾಡಿದಳು. ಅನುಭವ ಮಂಟಪದಲ್ಲಿ ಎಲ್ಲರಿಂದಲೂ ಸೈ ಎನಿಸಿಕೊಂಡು ಮಹಾದೇವಿಯಕ್ಕಳಾದಳು. ಕೊನೆಗೂ ಕದಳಿಯಲ್ಲಿ ತನ್ನ ಅರಿವಿನ ಸಾಕ್ಷಾತ್ಕಾರ ಮಾಡಿಕೊಂಡು ಪರಿಪೂರ್ಣಳಾದಳು.
