ನವದೆಹಲಿ: ಪಾಕಿಸ್ತಾನ ವಿರುದ್ಧದ ಡೇವಿಸ್ ಕಪ್ ಪಂದ್ಯದಿಂದ ಹಿಂದೆ ಸರಿದಿರುವ ಕಾರಣಕ್ಕಾಗಿ ಅಖಿಲ ಭಾರತ ಟೆನಿಸ್ ಸಂಸ್ಥೆ (ಎಐಟಿಎ), ಮುಂದಿನ ವರ್ಷಾರಂಭದ ಆಸ್ಟ್ರೆಲಿಯನ್ ಓಪನ್ನ ವೈಲ್ಡ್ಕಾರ್ಡ್ಗೆ ನನ್ನ ಹೆಸರು ಸೂಚಿಸಿಲ್ಲ ಎಂದು ಭಾರತದ ನಂ. 1 ಸಿಂಗಲ್ಸ್ ಆಟಗಾರ ಸುಮಿತ್ ನಗಾಲ್ ಬೇಸರ ವ್ಯಕ್ತಪಡಿಸಿದ್ದಾರೆ.
ಸುಮಿತ್ ನಗಾಲ್ ಈಗ ವಿಶ್ವ ರ್ಯಾಂಕಿಂಗ್ನಲ್ಲಿ 138ನೇ ಸ್ಥಾನದಲ್ಲಿದ್ದು, ಏಷ್ಯಾ-ಪೆಸಿಫಿಕ್ನಿಂದ ಆಸ್ಟ್ರೆಲಿಯನ್ ಓಪನ್ಗೆ ವೈಲ್ಡ್ಕಾರ್ಡ್ ಪಡೆಯುವ ನೆಚ್ಚಿನ ಆಟಗಾರರೆನಿಸಿದ್ದರು. ಆದರೆ ಡೇವಿಸ್ ಕಪ್ನಲ್ಲಿ ಆಡದಿರುವ ಕಾರಣ ನನ್ನ ಹೆಸರನ್ನು ವೈಲ್ಡ್ಕಾರ್ಡ್ಗೆ ಸೂಚಿಸುವುದಿಲ್ಲ ಎಂದು ಎಐಟಿಎ ಕಾರ್ಯದರ್ಶಿ ಅನಿಲ್ ಧೂಪರ್ ತಿಳಿಸಿದರು. ಅವರಿಂದ ಇಂಥ ಮಾತು ನಿರೀಕ್ಷಿಸಿರಲಿಲ್ಲ. ಭವಿಷ್ಯದಲ್ಲಾದರೂ ಪರಿಸ್ಥಿತಿ ಸುಧಾರಿಸದಿದ್ದರೆ ಭಾರತೀಯ ಟೆನಿಸ್ ಅಧಃಪತನ ಕಾಣಲಿದೆ ಎಂದು ಸುಮಿತ್ ನಗಾಲ್ ಹೇಳಿದ್ದಾರೆ.
ಪಾಕಿಸ್ತಾನದಲ್ಲಿನ ಡೇವಿಸ್ ಕಪ್ ಪಂದ್ಯ ಹುಲ್ಲುಹಾಸಿನ ಮೈದಾನದಲ್ಲಿ ನಡೆಯಲಿದೆ. ಆದರೆ ನಾನು ಗ್ರಾಸ್ ಕೋರ್ಟ್ನಲ್ಲಿ ಉತ್ತಮ ದಾಖಲೆ ಹೊಂದಿಲ್ಲ. ಇದರಿಂದಾಗಿ ವಿಂಬಲ್ಡನ್ನಲ್ಲೂ ಆಡಿದೆ. ಇದೇ ಕಾರಣದಿಂದಾಗಿ ನಾನು ಡೇವಿಸ್ ಕಪ್ನಿಂದ ಹಿಂದೆ ಸರಿದಿದ್ದೆ ಎಂದು ನಗಾಲ್ ಸ್ಪಷ್ಟಪಡಿಸಿದ್ದಾರೆ. 2021ರ ಆಸ್ಟ್ರೆಲಿಯನ್ ಓಪನ್ಗೆ ವೈಲ್ಡ್ಕಾರ್ಡ್ ಪಡೆದಿದ್ದ ನಗಾಲ್, ಈ ಬಾರಿ ಅರ್ಹತಾ ಸುತ್ತಿನಲ್ಲಿ ಸೆಣಸಲಿದ್ದಾರೆ.
