ಏರ್​ ಇಂಡಿಯಾ ವಿಮಾನ ದುರಂತದ ಸಂತ್ರಸ್ತರಿಗೆ ಸಿಗಲಿದೆ 1.19 ಕೋಟಿ ರೂ. ಪರಿಹಾರ...! ಲೆಕ್ಕಾಚಾರ ಹೇಗೆ?

ನವದೆಹಲಿ: ಕೋಳಿಕ್ಕೋಡ್​ನಲ್ಲಿ ಸಂಭವಿಸಿದ ಏರ್​ ಇಂಡಿಯಾ ಎಕ್ಸ್​ಪ್ರೆಸ್​​ ವಿಮಾನ ದುರಂತದಲ್ಲಿ ಮೃತಪಟ್ಟ ಇಬ್ಬರು ಪೈಲಟ್​ಗಳು ಸೇರಿ ಇತರ 18 ಪ್ರಯಾಣಿಕರ ಕುಟುಂಬದವರು 1.19 ಕೋಟಿ ರೂ. ಪರಿಹಾರ ಪಡೆಯಲು ಅರ್ಹರಾಗಿದ್ದಾರೆ.

ಸಾಮಾನ್ಯವಾಗಿ ವಿಮಾನ ದುರಂತದಲ್ಲಿ ಮೃತಪಟ್ಟವರಿಗೆ ಹಾಗೂ ಗಾಯಗೊಂಡವರಿಗೆ ಮಾಂಟ್ರಿಯಲ್​ ಒಪ್ಪಂದದ ಪ್ರಕಾರ ಪರಿಹಾರ ನಿಗದಿ ಮಾಡಲಾಗುತ್ತದೆ ಎಂದು ಏರ್​ ಇಂಡಿಯಾದ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ.

ಈ ಒಪ್ಪಂದವನ್ನು ಹಿನ್ನೆಲೆಯಾಗಿಟ್ಟುಕೊಂಡು ಕಳೆದ ಫೆಬ್ರವರಿಯಲ್ಲಿ ಕೇಂದ್ರ ಸರ್ಕಾರ ವಿಮಾನ ಪ್ರಯಾಣಿಕರ ಹಕ್ಕುಗಳ ಸನ್ನದು ರೂಪಿಸಿದೆ. ಇದರಂತೆ ಪರಿಹಾರದ ಮೊತ್ತ ಎಷ್ಟಿರಬೇಕು ಎಂಬುದನ್ನು ನಿರ್ಧರಿಸಲಾಗುತ್ತದೆ.

ಇದನ್ನೂ ಓದಿ; ತಾಯ್ನೆಲ ಸ್ಪರ್ಶಿಸಲು ಹಾತೊರೆದವರಿಗೆ ಕಾಡಿತ್ತು ದುಃಸ್ವಪ್ನ; ‘ವಂದೇ ಭಾರತ’ ವಿಮಾನವದು; ಟೇಬಲ್​ ಟಾಪ್​ ನಿಲ್ದಾಣದಲ್ಲಿ ಮತ್ತೊಂದು ದುರಂತ 

ಅಂತಾರಾಷ್ಟ್ರೀಯ ವಿಮಾನ ಪ್ರಯಾಣಿಕರು ನಷ್ಟ ಪರಿಹಾರವಾಗಿ 1,13,100 ವಿಶೇಷ ಪಾವತಿ ಹಕ್ಕು (ಸ್ಪೆಷಲ್​ ಡ್ರಾಯಿಂಗ್​ ರೈಟ್ಸ್​- ಎಸ್​ಡಿಆರ್​) ಹೊಂದಿದ್ದಾರೆ. ಅಪಘಾತ ಸಂಭವಿಸಿದ ಶುಕ್ರವಾರಕ್ಕೆ ಅನ್ವಯಿಸುವಂತೆ ಒಂದು ಎಸ್​ಡಿಆರ್​ನ ಮೌಲ್ಯ 1.14 ಅಮೆರಿಕನ್​ ಡಾಲರ್​ ಆಗಿದೆ. ಇದನ್ನು ಭಾರತೀಯ ರೂಪಾಯಿಗಳಿಗೆ ಪರಿವರ್ತಿಸಿದಲ್ಲಿ ಈ ಮೊತ್ತ 1.19 ಕೋಟಿ ರೂ. ಆಗಲಿದೆ ಎಂದು ಲೆಕ್ಕ ಹಾಕಲಾಗಿದೆ.

2016ರಲ್ಲಿ ನಷ್ಟ ಪರಿಹಾರದ ಮೊತ್ತವನ್ನು 1ಲಕ್ಷ ಎಸ್​ಡಿಆರ್​ನಿಂದ 1.13 ಲಕ್ಷಕ್ಕೆ ಏರಿಸಲಾಯಿತು. ಇದಲ್ಲದೇ, ಕಾರ್ಗೋ ವಿಳಂಬ ಅಥವಾ ನಷ್ಟಕ್ಕೆ ನೀಡಲಾಗುವ ಪರಿಹಾರವನ್ನು ಹೆಚ್ಚಿಸಲಾಗಿದೆ. ದೇಶೀಯ ವಿಮಾನ ದುರಂತದಲ್ಲಿ ಸಾವು ಸಂಭವಿಸಿದಲ್ಲಿ 20 ಲಕ್ಷ ರೂ. ಪರಿಹಾರ ನೀಡಲಾಗುತ್ತದೆ.

ಇದನ್ನೂ ಓದಿ; ಕೋಳಿಕ್ಕೋಡ್​ ವಿಮಾನ ದುರಂತ; ಲ್ಯಾಂಡಿಂಗ್ ಎರಡು ಬಾರಿ ಯತ್ನಿಸಿದ್ದ ಪೈಲಟ್​…! 

ಸದ್ಯ ಏರ್​ ಇಂಡಿಯಾ ಮೃತರ ಕುಟುಂಬಕ್ಕೆ 10 ಲಕ್ಷ ರೂ. ಪರಿಹಾರ ಘೋಷಿಸಿದೆ. ಕೇರಳ ಸರ್ಕಾರ ಕೂಡ 10 ಲಕ್ಷ ರೂ. ನೀಡಿದೆ. ಇದರ ಹೊರತಾಗಿಯೂ ಹೆಚ್ಚಿನ ಪರಿಹಾರಕ್ಕಾಗಿ ಒತ್ತಾಯಿಸುವ ಹಾಗೂ ನ್ಯಾಯಾಲಯದ ಮೊರೆ ಹೋಗುವ ಅಧಿಕಾರ ಸಂತ್ರಸ್ತರು ಹೊಂದಿರುತ್ತಾರೆ.

https://www.vijayavani.net/when-will-the-russian-vaccine-be-available/