ಆರೋಗ್ಯ, ಕೃಷಿ, ಶೈಕ್ಷಣಿಕ, ಬ್ಯಾಂಕಿಂಗ್, ಇ-ಕಾಮರ್ಸ್, ಕೈಗಾರಿಕೆ ಸೇರಿ ಬಹುತೇಕ ಕ್ಷೇತ್ರಗಳಿಗೆ ಕಾಲಿಟ್ಟಿರುವ ಕೃತಕ ಬುದ್ಧಿಮತ್ತೆ ತಂತ್ರಜ್ಞಾನ ಗ್ರಾಮೀಣಾಭಿವೃದ್ಧಿ ಇಲಾಖೆಯಲ್ಲೂ ಕಾರ್ಯಾರಂಭಿಸಿದೆ. ಪ್ರಧಾನಮಂತ್ರಿ ಆವಾಸ್ ಯೋಜನೆ (ಪಿಎಂಎವೈ-ಜಿ), ಪ್ರಧಾನಮಂತ್ರಿ ಗ್ರಾಮೀಣ ರಸ್ತೆ ಯೋಜನೆ (ಪಿಎಂಜಿಎಸ್ವೈ), ದೀನ ದಯಾಳ ಉಪಾಧ್ಯಾಯ ಗ್ರಾಮೀಣ ಕೌಶಲ್ಯ ಯೋಜನೆ (ಡಿಡಿಯು-ಜಿಕೆವೈ) ಮತ್ತು ಮಹಾತ್ಮಾ ಗಾಂಧಿ ಗ್ರಾಮೀಣ ರಾಷ್ಟ್ರೀಯ ಉದ್ಯೋಗ ಖಾತ್ರಿ (ಎಂಜಿ- ನರೇಗಾ) ಯೋಜನೆಗಳ ಜಾರಿಯಲ್ಲಿ ಅಕ್ರಮ ಪ್ರಕರಣಗಳು ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ನಿಯಂತ್ರಣಕ್ಕಾಗಿ ಕೇಂದ್ರ ಗ್ರಾಮೀಣಾಭಿವೃದ್ಧಿ ಇಲಾಖೆ ಎ.ಐ. ತಂತ್ರಜ್ಞಾನಕ್ಕೆ ಮೊರೆ ಹೋಗಿದೆ. ಒಂದೆಡೆ ಎ.ಐ. ತಂತ್ರಜ್ಞಾನದ ದುರ್ಬಳಕೆ ಹೆಚ್ಚುತ್ತಿದ್ದರೆ ಇನ್ನೊಂದೆಡೆ ಅನುಕೂಲತೆಗಳೂ ಸಹ ಹೆಚ್ಚಾಗುತ್ತಿದೆ. ಸರ್ಕಾರಿ ಸ್ಕೀಂಗಳ ಜಾರಿಯಲ್ಲಿ ಎ.ಐ. ತಂತ್ರಜ್ಞಾನ ಬಳಕೆಗೆ ಕೇಂದ್ರ ಸರ್ಕಾರ ಸಾಕಷ್ಟು ಒತ್ತು ಕೊಡುತ್ತಿದೆ. ಆಕ್ಸ್ಫರ್ಡ್ ಎ.ಐ. ರೆಡಿನೆಸ್ ಇಂಡೆಕ್ಸ್ ಪ್ರಕಾರ ಭಾರತ 40ನೇ ರ್ಯಾಂಕ್ನಲ್ಲಿದೆ. ಸ್ಟ್ಯಾನ್ಪೋರ್ಡ್ ಎ.ಐ. ಸೂಚ್ಯಂಕ ವರದಿ ಅನ್ವಯ ಎ.ಐ. ಕೌಶಲ್ಯ ಬಳಕೆ ಪ್ರಮಾಣದಲ್ಲಿ ಭಾರತವೇ ಅಗ್ರಸ್ಥಾನದಲ್ಲಿದೆ. 2026ರ ವೇಳೆಗೆ 500 ಶತಕೋಟಿ ಎಐ ಅವಕಾಶ ಸೃಷ್ಟಿಯಾಗಲಿದೆ. ಈಗ ಸರ್ಕಾರಿ ಯೋಜನೆಗಳ ಅವ್ಯವಹಾರ ಪತ್ತೆಹಚ್ಚಲು ಎಐ ರೆಡಿಯಾಗಿದೆ.
