ಮಲಮಗಳ ವಿರುದ್ಧವೇ 50 ಕೋಟಿ ರೂ. ಮಾನನಷ್ಟ ನೋಟಿಸ್​ ನೀಡಿದ ಖ್ಯಾತ ನಟಿ!

ಹಿಂದಿ ಕಿರುತೆರೆಯ ಅತಿದೊಡ್ಡ ಸ್ಟಾರ್​ಗಳಲ್ಲಿ ನಟಿ ರೂಪಾಲಿ ಗಂಗೂಲಿ ಕೂಡ ಒಬ್ಬರು. "ಸಾರಾಭಾಯ್​ ವರ್ಸಸ್​ ಸಾರಾಭಾಯ್​', "ಅನುಪಮಾ' ಸೇರಿ 25ಕ್ಕೂ ಹೆಚ್ಚು ಧಾರಾವಾಹಿ, ರಿಯಾಲಿಟಿ ಶೋಗಳಲ್ಲಿ ನಟಿಸಿರುವ ಅವರು, ಕೆಲ ಸಿನಿಮಾ, ವೆಬ್​ಸರಣಿಗಳಲ್ಲೂ ಮಿಂಚಿದ್ದಾರೆ. ಕಳೆದ ಐದು ವರ್ಷಗಳಿಂದ "ಅನುಪಮಾ' ಧಾರಾವಾಹಿಯಲ್ಲಿ ಟೈಟಲ್​ ರೋಲ್​ನಲ್ಲಿ ನಟಿಸುತ್ತಿರುವ ರೂಪಾಲಿ ಹಿಂದೆಂದಿಗಿಂತಲೂ ಪ್ರೇಕ್ಷಕರಿಗೆ ಹತ್ತಿರವಾಗಿದ್ದಾರೆ.

ಆದರೆ, ಕೆಲ ದಿನಗಳಿಂದೀಚೆಗೆ ಅವರು ವಿವಾದದಿಂದಾಗಿ ಸುದ್ದಿಯಾಗುತ್ತಿದ್ದರು. ಅವರ ಮಲಮಗಳು ಇಶಾ ವರ್ಮಾ ನಮ್ಮ ಕುಟುಂಬ ಹಾಳು ಮಾಡಿದರು, ತಂದೆಯನ್ನು ಕಂಟ್ರೋಲ್​ ಮಾಡುತ್ತಿದ್ದಾರೆ, ಹಲ್ಲೆ ನಡೆಸಿದ್ದಾರೆ ಅಂತೆಲ್ಲ ರೂಪಾಲಿ ವಿರುದ್ಧ ಹಲವು ಆರೋಪಗಳನ್ನು ಮಾಡಿದ್ದರು. ಜತೆಗೆ ಮಲತಾಯಿಯ ವಿರುದ್ಧ ಮಾತನಾಡುತ್ತಾ ಇಶಾ ಸಾಲು ಸಾಲು ವಿಡಿಯೋಗಳನ್ನು ಜಾಲತಾಣದಲ್ಲಿ ಶೇರ್​ ಮಾಡತೊಡಗಿದರು. ಇದರಿಂದಾಗಿ ಕೆರಳಿರುವ ರೂಪಾಲಿ, ಇಶಾ ವಿರುದ್ಧ 50 ಕೋಟಿ ರೂ. ಮಾನನಷ್ಟದ ಲಾಯರ್​ ನೋಟಿಸ್​ ಜಾರಿಗೊಳಿಸಿದ್ದಾರೆ.

"ಈ ರೀತಿಯ ಸುಳ್ಳು ಆರೋಪಗಳು ಮಾನಸಿಕವಾಗಿ ಘಾಸಿ ಉಂಟು ಮಾಡಿದ್ದು, ವೃತ್ತಿ ವಲಯದಲ್ಲೂ ದುಷ್ಪರಿಣಾಮ ಬೀರುತ್ತಿವೆ' ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ. ನೋಟಿಸ್​ ಬೆನ್ನಲ್ಲೇ ಇಶಾ ಕೆಲ ವಿಡಿಯೋಗಳನ್ನು ಡಿಲೀಸ್​ ಮಾಡಿದ್ದಾರೆ. ರೂಪಾಲಿ ಮತ್ತು ಅಶ್ವಿನ್​ 2013ರಲ್ಲಿ ಮದುವೆಯಾಗಿದ್ದು, ಅವರಿಗೆ ರುದ್ರಾಂಶ್​ ಎಂಬ ಮಗನಿದ್ದಾನೆ. ಅದಕ್ಕೂ ಮುನ್ನ ಅಶ್ವಿನ್​, ಸಪ್ನಾ ಎಂಬುವರನ್ನು ವಿವಾಹವಾಗಿದ್ದು 2008ರಲ್ಲಿ ವಿಚ್ಛೇದನ ಪಡೆದಿದ್ದರು. ಅಶ್ವಿನ್​ ಮತ್ತು ಸಪ್ನಾಗೆ ಇಬ್ಬರು ಹೆಣ್ಣುಮಕ್ಕಳಿದ್ದು, ಅವರು ನ್ಯೂ ಜೆರ್ಸಿಯಲ್ಲಿ ಸೆಟಲ್​ ಆಗಿದ್ದಾರೆ.