‘ಪುಷ್ಪ’ ಚಿತ್ರದ ಬಿಡುಗಡೆ ಹಿನ್ನೆಲೆಯಲ್ಲಿ ಮಾತನಾಡಿದ ರಶ್ಮಿಕಾ, ಕನ್ನಡದಲ್ಲಿ ಡಬ್ಬಿಂಗ್ ಮಾಡದಿರುವುದಕ್ಕೆ ಬೇಸರವೂ ಇದೆ ಎಂಬುದನ್ನು ಹೇಳಿಕೊಂಡಿದ್ದಾರೆ. ‘ಇತ್ತೀಚೆಗಷ್ಟೇ ‘ಪುಷ್ಪ’ ಚಿತ್ರದ ಶೂಟಿಂಗ್ ಮುಗಿದಿದೆ. ಪ್ರಚಾರ, ಪೋಸ್ಟ್ ಪ್ರೊಡಕ್ಷನ್, ಡಬ್ಬಿಂಗ್ ಸೇರಿ ಹಲವು ಕೆಲಸಗಳು ಹಗಲು ರಾತ್ರಿ ನಡೆಯುತ್ತಿವೆ. ಈ ನಡುವೆ ನಾಲ್ಕು ಸಿನಿಮಾ ಶೂಟಿಂಗ್ನಲ್ಲಿಯೂ ನಾನು ಬಿಜಿಯಾಗಿದ್ದೇನೆ. ಅದರ ನಡುವೆಯೇ ಮೂರು ದಿನಗಳ ಕಾಲ ತೆಲುಗು ಅವತರಣಿಕೆಗೆ ಡಬ್ ಮಾಡಿದ್ದೇನೆ. ಅದೂ ಸಹ ಇನ್ನೂ ಪೂರ್ಣವಾಗಿಲ್ಲ. ಆ ಒಂದು ಕಾರಣಕ್ಕೆ ಕನ್ನಡಕ್ಕೆ ಡಬ್ ಮಾಡಲು ಆಗಿಲ್ಲ. ಕನ್ನಡಕ್ಕೂ ಡಬ್ ಮಾಡಬೇಕೆಂಬ ಆಸೆ ಇತ್ತು. ಆದರೆ, ಕೆಲಸದ ಒತ್ತಡದ ನಡುವೆ ಸಾಧ್ಯವಾಗಲಿಲ್ಲ. ಮುಂದಿನ ನನ್ನ ಪ್ಯಾನ್ ಇಂಡಿಯಾ ಸಿನಿಮಾಗಳಿಗೆ ಕನ್ನಡಕ್ಕೆ ಖಂಡಿತ ನಾನೇ ಡಬ್ ಮಾಡ್ತೀನಿ’ ಎಂಬುದು ರಶ್ಮಿಕಾ ಮಾತು. ಸುಕುಮಾರ್ ನಿರ್ದೇಶನದ, ಅಲ್ಲು ಅರ್ಜುನ್ ನಾಯಕನಾಗಿ ನಟಿಸಿರುವ ‘ಪುಷ್ಪ’ ಸಿನಿಮಾ ಇದೇ 17ಕ್ಕೆ ತೆಲುಗು, ತಮಿಳು, ಕನ್ನಡ, ಮಲಯಾಳಂ ಮತ್ತು ಹಿಂದಿಯಲ್ಲಿ ತೆರೆಗೆ ಬರುತ್ತಿದೆ. ಕನ್ನಡದ ಡಾಲಿ ಧನಂಜಯ್ ಸಹ ಈ ಚಿತ್ರದಲ್ಲಿದ್ದಾರೆ.
