ಕೆಲಸ ಇಲ್ಲದೆ ತರಕಾರಿ ಮಾರುತ್ತಿರುವ ಬಾಲಿವುಡ್​ ನಟ!

ಕರೊನಾ ಮತ್ತು ಲಾಕ್​ಡೌನ್​ನಿಂದ ಅದೆಷ್ಟೋ ಸಿನಿಮಾ ಕಲಾವಿದರು ಮತ್ತು ತಂತ್ರಜ್ಱರು ಕೆಲಸವಿಲ್ಲದೆ ಸಮಸ್ಯೆ ಎದುರಿಸುತ್ತಿದ್ದಾರೆ. ದೊಡ್ಡ ಸಂಭಾವನೆ ಪಡೆಯುವ ಸ್ಟಾರ್​ ನಟರು ಮತ್ತು ತಂತ್ರಜ್ಱರೇನೋ ಇದೆಲ್ಲದರಿಂದ ಪಾರಾಗಿದ್ದಾರೆ. ಆದರೆ, ಸಣ್ಣ-ಪುಟ್ಟ ಕಲಾವಿದರಂತೂ ಇದರಿಂದ ಬಹಳ ಸಂಕಷ್ಟಕ್ಕೆ ಈಡಾಗಿದ್ದಾರೆ.

ಇದನ್ನೂ ಓದಿ: ನನ್ನ ಮಗನಿಗೂ ಆತ್ಮಹತ್ಯೆ ಮಾಡಿಕೊಳ್ಳುವ ಯೋಚನೆ ಇತ್ತು!

ಲಾಕ್​ಡೌನ್​ನಿಂದ ಕೆಲಸ ಕಳೆದುಕೊಂಡಿರುವ ಜಾವೆದ್​ ಹೈದರ್​ ಎಂಬ ಬಾಲಿವುಡ್​ ನಟ, ಇದೀಗ ದೆಹಲಿಯಲ್ಲಿ ತರಕಾರಿ ಮಾರುತ್ತಿದ್ದಾರೆ. ಜಾವೆದ್​ ತರಕಾರಿ ಮಾರುವ ವಿಡಿಯೋವೊಂದನ್ನು 'ಬಿಗ್​ ಬಾಸ್​ - 4'ರ ವಿನ್ನರ್​ ಡಾಲಿ ಬಿಂದ್ರಾ ಸೋಷಿಯಲ್​ ಮೀಡಿಯಾ ಮೂಲಕ ಹಂಚಿಕೊಂಡಿದ್ದು, ಆತನಿಗೆ ನೆರವಾಗಿ ಎಂದು ಚಿತ್ರರಂಗದ ಸ್ನೇಹಿತರಲ್ಲಿ ವಿನಂತಿಸಿಕೊಂಡಿದ್ದಾರೆ.

ಜಾವೆದ್​ ಹೈದರ್​ ತುಂಬಾ ಹೆಸರು ಮಾಡಿದ ನಟನೇನಲ್ಲ. ಬಾಲಿವುಡ್​ ಚಿತ್ರಗಳಲ್ಲಿ ಮತ್ತು ಹಿಂದಿ ಧಾರಾವಾಹಿಗಳಲ್ಲಿ ಸಣ್ಣ-ಪುಟ್ಟ ಪಾತ್ರಗಳಲ್ಲಿ ಅವರು ಕಾಣಿಸಿಕೊಂಡಿದ್ದರು. ಅಮೀರ್​ ಖಾನ್​ ಅಭಿನಯದ ಗುಲಾಮ್​, ಲೈಫ್​ ಕಿ ಐಸಿ ತೇಸಿ ಸೇರಿದಂತೆ ಕೆಲವು ಚಿತ್ರಗಳಲ್ಲಿ ನಟಿಸಿದ್ದರು. ಲಾಕ್​ಡೌನ್​ಗೂ ಮುನ್ನ ಒಂದಿಷ್ಟು ಚಿತ್ರಗಳಲ್ಲಿ ನಟಿಸಿದ್ದ ಜಾವೆದ್​, ಲಾಕ್​ಡೌನ್​ ನಂತರ ಚಿತ್ರರಂಗ ಬಂದ್​ ಆದಾಗಿನಿಂದ ಕೆಲಸ ಇಲ್ಲದೆ ಖಾಲಿ ಇದ್ದಾರೆ. ಬೇರೆ ದಾರಿ ಇಲ್ಲದೆ ಅವರು ದೆಹಲಿಯ ರಸ್ತೆಗಳಲ್ಲಿ ತರಕಾರಿ ಮಾರುತ್ತಿದ್ದಾರಂತೆ.

ಇದನ್ನೂ ಓದಿ: ಅಂಬರೀಶ್ ಸ್ಮಾರಕ ನಿರ್ಮಾಣ ಎಲ್ಲಿ? ಎಷ್ಟು ವೆಚ್ಚದಲ್ಲಿ ಆಗಲಿದೆ ಗೊತ್ತಾ?

ಇನ್ನು ಜಾವೆದ್​ ಅವರ ಈ ಸ್ಥಿತಿಯನ್ನು ನೋಡಿ, ನೆಟ್ಟಿಗರನೇಕರು ಮರುಗಿದ್ದಾರೆ. ಒಬ್ಬ ನಟನಿಗೆ ಇಂಥದ್ದೊಂದು ಪರಿಸ್ಥಿತಿ ಬರಬಾರದಿತ್ತು ಎಂದು ಬೇಸರಿಸಿಕೊಂಡಿದ್ದಾರೆ. ಇನ್ನೂ ಕೆಲವರು, ಜಾವೇದ್​ ಅವರ ಜೀವನೋತ್ಸಾಹವನ್ನು ಹೊಗಳಿದ್ದಾರೆ. ಏನೇ ಸಮಸ್ಯೆಗಳು ಎದುರಾದರೂ, ಇದ್ದುದರಲ್ಲೇ ನೆಮ್ಮದಿಯಿಂದ ಬದುಕಬೇಕು ಎಂದು ಜಾವೆದ್​, ತರಕಾರಿ ಮಾರುವ ಮೂಲಕ ಸಾರುತ್ತಿದ್ದಾರೆ. ಎಷ್ಟೇ ಕಷ್ಟಗಳ ಮಧ್ಯೆಯೂ ಏನಾದರೂ ಸಾಧಿಸಬೇಕು ಎನ್ನುವ ಅವರ ಶ್ರದ್ಧೆ ಅನುಕರಣೀಯ ಎಂದು ಕೆಲವರು ಕಮೆಂಟ್​ ಮಾಡಿದ್ದಾರೆ.

ಅಂದಹಾಗೆ, ಜಾವೆದ್​ ಅವರು ಟಿಕ್​ಟಾಕ್​ ವಿಡಿಯೋಗಳನ್ನು ಮಾಡುವುದರಲ್ಲಿ ಬಹಳ ಜನಪ್ರಿಯರಾಗಿದ್ದು, ತರಕಾರಿ ಮಾರುತ್ತಲೇ ಅವರು ಹಲವು ವಿಡಿಯೋಗಳನ್ನು ಮಾಡುತ್ತಲೇ ಇದ್ದಾರೆ. ಟಿಕ್​ಟಾಕ್​ನಲ್ಲಿ ಅವರಿಗೆ 97 ಸಾವಿರ ಹಿಂಬಾಲಕರಿದ್ದು, ಅವರ ವಿಡಿಯೋಗಳಿಗೆ 1.6 ಮಿಲಿಯನ್​ ಲೈಕ್​ಗಳು ಸಿಕ್ಕಿವೆ.

https://www.vijayavani.net/chiyan-vikram-and-srinidhi-cobra-film-song-making-stills-are-here/