ಕರೊನಾ ಶಂಕಿತರು ಹಾಗೂ ಸೋಂಕಿತರ ಪತ್ತೆ, ಪರೀಕ್ಷೆ ಹಾಗೂ ತ್ವರಿತ ಚಿಕಿತ್ಸೆಗೆ ನೆರವು ನೀಡುತ್ತಿರುವ ‘ಆರೋಗ್ಯ ಸೇತು’ ಆಪ್ ಆವಿಷ್ಕಾರಕ್ಕೆ ಕೇಂದ್ರ ಸರ್ಕಾರದ ಪ್ರಯತ್ನವೇ ಪ್ರೇರಣೆ ಎಂದು ಗೋ ಇಬಿಬೋ ಕಂಪನಿ ಹಿರಿಯ ಉಪಾಧ್ಯಕ್ಷ ರಾಹುಲ್ ಗೋಯಲ್ ಗುರುವಾರ ‘ವಿಜಯವಾಣಿ’ಯೊಂದಿಗೆ ಸಂತಸ ಹಂಚಿಕೊಂಡರು. ಮಾರಕ ಪಿಡುಗು ಬಾಧಿತರು ಹಾಗೂ ಅನುಮಾನ ಇರುವವರ ಬಗ್ಗೆ ಆಡಳಿತ ಯಂತ್ರಾಂಗ ಬಳಸಿಕೊಳ್ಳುತ್ತಿರುವುದನ್ನು ಗಮನಿಸಿ, ಲಭ್ಯ ತಂತ್ರಜ್ಞಾನ ಬಳಕೆ ಸೂಕ್ತವೆನಿಸಿತು. ಈ ದಿಸೆಯಲ್ಲಿ ಕಂಪನಿಯ ಮತ್ತೊಬ್ಬ ಸಹೋದ್ಯೋಗಿ ಮುಖ್ಯ ತಾಂತ್ರಿಕ ಅಧಿಕಾರಿ ವಿಕಲ್ಪ ಸಹಾನಿ ಜತೆಗೂಡಿ ಇಂಥ ಪ್ರಯತ್ನಕ್ಕೆ ಕೈಹಾಕಿದೆವು. ಆಪ್ಗಳ ಅಭಿವೃದ್ಧಿಯಲ್ಲಿನ ಅನುಭವ, ಕೌಶಲ ಬಳಸಿಕೊಂಡು 18 ದಿನಗಳಲ್ಲಿ ನಿಖರ ಫಲಿತಾಂಶ ಹಾಗೂ ಪರಿಣಾಮಕಾರಿ ಕ್ರಮಕ್ಕೆ ಅನುಕೂಲವಾಗುವ ಆಪ್ ಅಭಿವೃದ್ಧಿಪಡಿಸಲಾಯಿತು. ಕೇಂದ್ರ ಸರ್ಕಾರ ಈ ಆಪ್ಗೆ ನೀಡಿದ ಮಾನ್ಯತೆ, ರಾಜ್ಯ ಸರ್ಕಾರದ ಪ್ರೋತ್ಸಾಹ ಖುಷಿ ತಂದಿದೆ. ಎಲ್ಲಕ್ಕಿಂತಲೂ ಹೆಚ್ಚಾಗಿ ದೇಶದ ಜನರ ಆರೋಗ್ಯ ರಕ್ಷಣಾ ಕೆಲಸದಲ್ಲಿ ಮಹತ್ವದ ಪಾತ್ರ ವಹಿಸುತ್ತಿರುವುದು ತೃಪ್ತಿಕೊಟ್ಟಿದೆ ಎಂದು ರಾಹುಲ್ ಹೇಳಿದರು.
