ಕರೊನಾ ಕುರಿತು ಭಾರತೀಯರಿಗೆ ಹಿಂದಿಯಲ್ಲೇ ಕ್ರಿಕೆಟಿಗ ಕೆವಿನ್​ ಪೀಟರ್ಸನ್ ಜಾಗೃತಿ: ಪ್ರಧಾನಿ ಮೋದಿ ಪ್ರತಿಕ್ರಿಯೆ ಹೀಗಿತ್ತು...​

ನವದೆಹಲಿ: ಮಾರಕ ಕರೊನಾ ವೈರಸ್​ ಕುರಿತು ಭಾರತೀಯರಿಗೆ ಹಿಂದಿಯಲ್ಲೇ ಟ್ವೀಟ್​ ಮಾಡಿ ಜಾಗೃತಿ ಮೂಡಿಸಿದ ಇಂಗ್ಲೆಂಡ್​ನ ಮಾಜಿ ಕ್ರಿಕೆಟಿಗ ಕೆವಿನ್​ ಪೀಟರ್ಸನ್​ಗೆ ಪ್ರಧಾನಿ ನರೇಂದ್ರ ಮೋದಿ ಅವರು ಧನ್ಯವಾದಗಳನ್ನು ತಿಳಿಸಿದ್ದಾರೆ. ಅದಕ್ಕೆ ಪ್ರತಿಯಾಗಿ ಪೀಟರ್ಸನ್ ಸಹ ಪ್ರಧಾನಿಯನ್ನು ಮೆಚ್ಚಿಕೊಂಡಿದ್ದಾರೆ.

ದಿನದಿಂದ ದಿನಕ್ಕೆ ಕರೊನಾ ವೈರಸ್​ ಸೋಂಕು ಹರಡುತ್ತಿರುವುದರಿಂದ ಭಾರತೀಯರನ್ನು ಉದ್ದೇಶಿಸಿ ಟ್ವೀಟ್​ ಮಾಡಿರುವ ಪೀಟರ್ಸನ್​, ನಮಸ್ತೆ ಭಾರತ. ಎಲ್ಲರೂ ಸ್ವಯಂ ಏಕಾಂತದಲ್ಲಿ ಉಳಿದುಕೊಂಡು, ಸರ್ಕಾರ ಹೇಳಿದ ನಿಯಮಗಳನ್ನು ಪಾಲಿಸಬೇಕು. ಎಲ್ಲರೂ ಒಟ್ಟಾಗಿ ಮಹಾಮಾರಿ ಕರೊನಾ ವಿರುದ್ಧ ಹೋರಾಡಬೇಕು. ಹೀಗಾಗಿ ಕೆಲ ದಿನಗಳಮಟ್ಟಿಗೆ ಮನೆಯಲ್ಲೇ ಇರಿ ಎಂದು ಹಿಂದಿಯಲ್ಲಿ ಮನವಿ ಮಾಡಿಕೊಂಡಿದ್ದಾರೆ. ಇದಕ್ಕೆ ಪಶ್ಚಿಮ ಬಂಗಾಳ ಕ್ರಿಕೆಟರ್​ ಶ್ರೀವಾತ್ಸವ್​ ಗೋಸ್ವಾಮಿ ಅವರನ್ನು ಟ್ಯಾಗ್​ ಮಾಡಿ ನನ್ನ ಹಿಂದಿ ಟೀಚರ್​ ಎಂದು ಕರೆದಿದ್ದಾರೆ.

ಪೀಟರ್ಸನ್​ ಟ್ವೀಟ್​ಗೆ ಪ್ರತಿಕ್ರಿಯೆ ನೀಡಿರುವ ಪ್ರಧಾನಿ ಮೋದಿ, ಆಂಗ್ಲ ಆಟಗಾರನನ್ನು ಸ್ಪೋಟಕ ಬ್ಯಾಟ್ಸ್​ಮನ್​ ಎಂದು ಕರೆದಿದ್ದಾರೆ. ಅವರು ಕರೊನಾ ಮಹಾಮಾರಿ ಬಗ್ಗೆ ನಮಗೆ ಏನೋ ಹೇಳುತ್ತಿದ್ದಾರೆ. ನಾವು ಕೂಡ ಒಟ್ಟಾಗಿ ಕರೊನಾ ವಿರುದ್ಧ ಹೋರಾಡೋಣ ಎಂದು ತಿಳಿಸಿದ್ದಾರೆ.

ಇದಕ್ಕೆ ಮತ್ತೆ ಪ್ರತಿಕ್ರಿಯೆ ನೀಡಿರುವ ಪೀಟರ್ಸನ್​, ಧನ್ಯವಾದಗಳು ಮಿಸ್ಟರ್​ ಮೋದಿ, ನಿಮ್ಮ ನಾಯಕತ್ವವೂ ಕೂಡ ಸ್ಪೋಟಕವಾಗಿದೆ ಎಂದಿದ್ದಾರೆ. ಒಟ್ಟಾರೆ ಪ್ರಧಾನಿ ಮತ್ತು ಪೀಟರ್ಸನ್​ ನಡುವಿನ ಸ್ನೇಹಪರ ಚರ್ಚೆ ಜನರಿಗೆ ಹೊಸ ಜಾಗೃತಿ ಸಂದೇಶವನ್ನು ನೀಡಿದೆ.

ಅಂದಹಾಗೆ ಪೀಟರ್ಸನ್​ ಮತ್ತು ಕ್ರಿಕೆಟಿಗ ಶ್ರೀವಾತ್ಸವ್​ ಗೋಸ್ವಾಮಿ ಅವರು ಈ ಹಿಂದೆ ಐಪಿಎಲ್​ನಲ್ಲಿ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ತಂಡದ ಪರ ಆಡಿದ್ದರು. (ಏಜೆನ್ಸೀಸ್​)

https://www.vijayavani.net/do-not-believe-rumors-on-cororavirus-pandemic-which-spread-across-the-world/

https://www.vijayavani.net/football-giant-pk-banerjee-is-no-more/