ಇತ್ತ ಸಿಎಂ ಭೇಟಿ ವೇಳೆಯೂ ಪ್ರೀತಂ ಗೌಡಗೆ ಕ್ಲಾಸ್ ಆಗಿದೆ. ಸಿಎಂ ಕಚೇರಿಯಲ್ಲಿ ಇಬ್ಬರು ಹಿರಿಯ ಸಚಿವರ ಜತೆ ಚರ್ಚೆ ನಡೆಸುತ್ತಾ ಬೊಮ್ಮಾಯಿ ಕುಳಿತಿದ್ದರು. ಈ ವೇಳೆ ಬಂದ ಪ್ರೀತಂಗೌಡಗೆ ಸಿಎಂ ತರಾಟೆಗೆ ತೆಗೆದುಕೊಂಡರು. ದೇವೇಗೌಡರನ್ನು ಭೇಟಿ ಮಾಡಿದ್ದರ ಬಗ್ಗೆ ಎಲ್ಲರಿಗೂ ಗೊತ್ತಿದೆ. ಅಡ್ಜೆಸ್ಟಮೆಂಟ್ ರಾಜಕಾರಣ ಎಂದರೆ ಏನು? ಸಿಎಂಗೆ ಈ ರೀತಿ ಹೇಳುವುದು ಸರಿಯೇ? ರಾಜಕಾರಣವೇ ಬೇರೆ, ವೈಯಕ್ತಿಕ ಸಂಬಂಧಗಳೇ ಬೇರೆ. ಅಷ್ಟಕ್ಕೂ ದೇವೇಗೌಡರು ಮಾಜಿ ಪ್ರಧಾನಿ, ರಾಜ್ಯದ ಹಿರಿಯ ರಾಜಕಾರಣಿ. ಈ ಬಗ್ಗೆ ಬಹಿರಂಗವಾಗಿ ಹೇಳಿಕೆ ಕೊಡೋದು ಸರಿಯಲ್ಲ ಎಂದು ಬುದ್ಧಿವಾದ ಹೇಳಿದರು. ಸಿಎಂ ಗರಂ ಆಗಿದ್ದನ್ನು ಕಂಡ ಪ್ರೀತಂ, ಹೆಚ್ಚು ಮಾತನಾಡದೆ ಹೊರಟರು.
