ಆಂಧ್ರಪ್ರದೇಶದಿಂದ ಬೆಂಗಳೂರಿಗೆ ಮಾದಕ ವಸ್ತು ಸಾಗಣೆ ಮಾಡುತ್ತಿದ್ದ ಬಗ್ಗೆ ಶಿವಾಜಿನಗರ ಠಾಣೆ ಪೊಲೀಸರಿಗೆ ಖಚಿತ ಮಾಹಿತಿ ಲಭ್ಯವಾಗಿತ್ತು. ಈ ಮಾಹಿತಿ ಆಧರಿಸಿ ಎಸ್ಐ ಅವಿನಾಶ್ ಮತ್ತು ತಂಡ ಖಾಸಗಿ ಇನೋವಾ ಬಾಡಿಗೆಗೆ ಪಡೆದು ಆಂಧ್ರಪ್ರದೇಶಕ್ಕೆ ತೆರಳಿತ್ತು. ಡ್ರಗ್ಸ್ ಪೆಡ್ಲರ್ಗಳ ಜಾಡು ಹಿಡಿದು ಬಂಧನಕ್ಕೆ ಬೆನ್ನತ್ತಿದ್ದರು. ಆದರೆ, ಕಾರಣಾಂತರದಿಂದ ವಾಪಸ್ ಬೆಂಗಳೂರಿಗೆ ಹೊರಟ್ಟಿದ್ದರು. ಭಾನುವಾರ(ಜು.24)ರ ಮುಂಜಾನೆ 3.30ರಲ್ಲಿ ಚಿತ್ತೂರಿನಿಂದ ತಿರುಪತಿಗೆ ತೆರಳುವ ಮಾರ್ಗದಲ್ಲಿ ಪೂತಾಲ್ಲಪಟ್ಟು ಗ್ರಾಮದ ಬಳಿಯ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಚಾಲಕನ ನಿಯಂತ್ರಣ ತಪ್ಪಿದ ಇನ್ನೋವಾ ಕಾರು ತಡೆಗೋಡೆಗೆ ಗುದ್ದಿ, ಅಂದಾಜು 30 ಅಡಿ ಎತ್ತರಕ್ಕೆ ಹಾರಿ, ಪಕ್ಕದ ರಸ್ತೆಗೆ ಪಲ್ಟಿಯಾಗಿತ್ತು. ಗುದ್ದಿದ ರಭಸಕ್ಕೆ ಕಾರು ಸಂಪೂರ್ಣ ನಜ್ಜುಗುಜ್ಜಾಗಿತ್ತು. ಎಸ್ಐ ಅವಿನಾಶ್(29), ಕಾನ್ಸ್ಟೇಬಲ್ ಅನಿಲ್ ಮುಲಿಕ್(26) ಹಾಗೂ ಕಾರು ಚಾಲಕ ಮ್ಯಾಕ್ಸ್ವೆಲ್ ತೀವ್ರವಾಗಿ ಗಾಯಗೊಂಡು ಸ್ಥಳದಲ್ಲೇ ಅಸುನೀಗಿದ್ದರು.
