ಬೆಂಗಳೂರು: “ನನ್ನ ತಂದೆಯೇ ನಮ್ಮ ಪಾಲಿನ ಹೀರೋ” ಎಂದು ಹೇಳುವ ಹೆಣ್ಣು ಮಕ್ಕಳೇ ಹೆಚ್ಚು. ಆದರೆ ಇಲ್ಲೊಬ್ಬಳು ಬಾಲಕಿ ತನ್ನ ತಂದೆಯ ವಿರುದ್ಧ ಪೊಲೀಸರಿಗೆ ದೂರು ನೀಡಿದ್ದು, 16 ವರ್ಷದ ಬಾಲಕಿಗೆ ತಂದೆಯೇ ವಿಲನ್ ಆದ ಪ್ರಕರಣ ಬೆಳಕಿಗೆ ಬಂದಿದೆ.
ಘಟನೆಯ ವಿವರ: ಬಲವಂತವಾಗಿ ಬಾಲಕಿಗೆ ಮದುವೆ ಮಾಡಿಸಿರುವ ಕಾರಣ ತಂದೆ ಹಾಗೂ ಮದುವೆ ಆದ ವ್ಯಕ್ತಿ ಮೇಲೆ ಬಾಲಕಿ ದೂರು ನೀಡಿದ್ದಾಳೆ. ಬಾಲಕಿ ದೂರಿನ ಮೇಲೆ ಬೆಳ್ಳಂದೂರು ಪೊಲೀಸ್ ಠಾಣೆಯಲ್ಲಿ ಎಫ್ಐಆರ್ ದಾಖಲಾಗಿದೆ.
ಇದನ್ನೂ ಓದಿ: ಚಂದ್ರಯಾನ-3 ಉಡಾವಣೆಗೆ ಕ್ಷಣಗಣನೆ: ನೆಹರು ತಾರಾಲಯದಲ್ಲಿ ನೇರ ಪ್ರಸಾರ ವೀಕ್ಷಿಸಲು ಅವಕಾಶ
ತಪ್ಪಿಸಿಕೊಂಡ ಬಾಲಕಿ
ಈಗಾಗಲೇ ಮದುವೆಯಾಗಿದ್ದ ವ್ಯಕ್ತಿ ಜೊತೆಗೆ ದೇವಸ್ಥಾನದಲ್ಲಿ ಬಲವಂತವಾಗಿ ಮದುವೆ ಮಾಡಿಸಲಾಗಿತ್ತು. ಆದರೆ ಈ ಮದುವೆಗೆ ಬಾಲಕಿ ಒಪ್ಪಿರಲಿಲ್ಲ. ಬಳಿಕ ಬೆಳ್ಳಂದೂರಿನ ಸಮೀಪ ಮನೆಯಲ್ಲಿ ಕೂಡಿ ಹಾಕಲಾಗಿತ್ತು. ಈ ವೇಳೆ ಮದುವೆಯಾದ ವ್ಯಕ್ತಿ ದೈಹಿಕ ಸಂಪರ್ಕ ಮಾಡಲು ಪ್ರಯತ್ನ ಮಾಡಿದಾಗ ಆತನಿಂದ ತಪ್ಪಿಸಿಕೊಂಡು ಕಂಟ್ರೋಲ್ ರೂಂಗೆ ಬಾಲಕಿ ಕರೆ ಮಾಡಿದ್ದಾಳೆ. ಇದೀಗ ಬೆಳ್ಳಂದೂರು ಪೊಲೀಸರಿಂದ ಬಾಲಕಿ ರಕ್ಷಣೆ ಮಾಡಲಾಗಿದೆ. ಪೊಲೀಸರು ಮದುವೆಯಾಗಿದ್ದ ಆರೋಪಿಯನ್ನು ಬಂಧಿಸಿ ಜೈಲಿಗಟ್ಟಿದ್ದಾರೆ. ಆರೋಪಿ ತಂದೆಗಾಗಿ ಹುಡುಕಾಟ ನಡೆಯುತ್ತಿದೆ.