ಭಾರತ-ಪಾಕ್​ ಪಂದ್ಯ ಮಾತ್ರವಲ್ಲ, ವಿಶ್ವಕಪ್​ನಲ್ಲಿ ಇನ್ನೂ ಕೆಲ ಪಂದ್ಯಗಳ ದಿನಾಂಕ ಬದಲಾವಣೆ!

ನವದೆಹಲಿ: ಮುಂಬರುವ ಏಕದಿನ ವಿಶ್ವಕಪ್​ನಲ್ಲಿ ಭಾರತ-ಪಾಕಿಸ್ತಾನ ನಡುವಿನ ಪಂದ್ಯ ಮಾತ್ರವಲ್ಲದೆ ಇನ್ನೂ ಕೆಲ ಪಂದ್ಯಗಳ ವೇಳಾಪಟ್ಟಿಯೂ ಬದಲಾವಣೆ ಕಾಣಲಿದೆ ಎಂದು ಬಿಸಿಸಿಐ ಕಾರ್ಯದರ್ಶಿ ಜಯ್​ ಷಾ ಗುರುವಾರ ತಿಳಿಸಿದ್ದಾರೆ.

ಪಂದ್ಯಗಳ ನಡುವಿನ ಅಂತರದ ಬಗ್ಗೆ ಆಕ್ಷೇಪವೆತ್ತಿ ಕೆಲ 3 ದೇಶಗಳ ಕ್ರಿಕೆಟ್​ ಮಂಡಳಿಗಳು ಐಸಿಸಿಗೆ ಪತ್ರ ಬರೆದಿವೆ. ಈ ಹಿನ್ನೆಲೆಯಲ್ಲಿ ಕೆಲ ಪಂದ್ಯಗಳ ದಿನಾಂಕ ಮತ್ತು ಸಮಯ ಬದಲಾವಣೆ ಮಾಡಲಾಗುವುದು. ಸ್ಥಳದಲ್ಲಿ ಯಾವುದೇ ಬದಲಾವಣೆ ಮಾಡಲಾಗುವುದಿಲ್ಲ. ಕೆಲ ತಂಡಗಳ ಪಂದ್ಯಗಳ ನಡುವೆ 6 ದಿನಗಳ ಅಂತರವಿದ್ದರೆ, 4-5 ದಿನಗಳಿಗೆ ತಗ್ಗಿಸಲಾಗುವುದು. 3-4 ದಿನಗಳಲ್ಲಿ ಈ ಬದಲಾವಣೆಯನ್ನು ಅಂತಿಮಗೊಳಿಸಲಾಗುವುದು ಎಂದು ಜಯ್​ ಷಾ ವಿವರಿಸಿದ್ದಾರೆ. ಆದರೆ ಯಾವ ದೇಶದ ಕ್ರಿಕೆಟ್​ ಮಂಡಳಿಗಳೆಲ್ಲ ಪಂದ್ಯಗಳ ದಿನಾಂಕ ಬದಲಾವಣೆಗೆ ಬೇಡಿಕೆ ಇಟ್ಟಿವೆ ಎಂಬುದನ್ನು ಜಯ್​ ಷಾ ಬಹಿರಂಗಪಡಿಸಿಲ್ಲ.

ನವರಾತ್ರಿ ಹಬ್ಬದ ಹಿನ್ನೆಲೆಯಲ್ಲಿ ಭಾರತ-ಪಾಕ್​ ಪಂದ್ಯ ಅ.15ರ ಬದಲಾಗಿ 14ರಂದು ನಡೆಯುವ ಸಾಧ್ಯತೆಗಳಿವೆ ಎಂದು ಈಗಾಗಲೆ ವರದಿಯಾಗಿತ್ತು. ವಿಶ್ವಕಪ್​ ವೇಳಾಪಟ್ಟಿ ಬದಲಾವಣೆ ಅಂತಿಮಗೊಳಿಸುವ ಮುನ್ನ ಐಸಿಸಿ ಒಪ್ಪಿಗೆಯನ್ನೂ ಪಡೆಯಲಾಗುವುದು ಎಂದು ಜಯ್​ ಷಾ ಸ್ಪಷ್ಟಪಡಿಸಿದ್ದಾರೆ.

https://www.vijayavani.net/fans-mock-windies-cricket-for-not-handing-player-of-the-series