ಪೋರ್ಟ್ ಆಫ್ ಸ್ಪೇನ್: ಮಳೆ ಅಡಚಣೆಯಿಂದಾಗಿ ಗೆಲುವಿನಿಂದ ವಂಚಿತವಾದ ಭಾರತ ತಂಡ ಆತಿಥೇಯ ವೆಸ್ಟ್ ಇಂಡೀಸ್ ವಿರುದ್ಧದ ಟೆಸ್ಟ್ ಸರಣಿಯ 2ನೇ ಹಾಗೂ ಅಂತಿಮ ಟೆಸ್ಟ್ ಪಂದ್ಯದಲ್ಲಿ ಡ್ರಾಗೆ ತೃಪ್ತಿಪಟ್ಟಿತು. ಸರಣಿ ಗೆಲುವಿನ ಅಂತರವನ್ನು 2-0ಗೆ ಏರಿಸುವುದನ್ನೂ ತಪ್ಪಿಸಿಕೊಂಡ ರೋಹಿತ್ ಶರ್ಮ ಪಡೆ 1-0ಯಿಂದ ಸರಣಿ ವಶಪಡಿಸಿಕೊಂಡಿತು. ವಿಂಡೀಸ್ ವಿರುದ್ಧ ಸತತ 9 ಮತ್ತು ಕೆರಿಬಿಯನ್ಸ್ ನೆಲದಲ್ಲಿ ಸತತ 5ನೇ ಸರಣಿ ಗೆಲುವಿನ ಸಾಧನೆಯೊಂದಿಗೆ ಟೀಮ್ ಇಂಡಿಯಾ ಪ್ರಾಬಲ್ಯವನ್ನು ಮುಂದುವರಿಸಿತು. ಆದರೆ ಇದರ ನಡುವೆ ಸರಣಿಯಲ್ಲಿ ಸರಣಿಶ್ರೇಷ್ಠ ಪ್ರಶಸ್ತಿಯನ್ನೇ ವಿತರಿಸದ ಕಾರಣಕ್ಕಾಗಿ ಆತಿಥೇಯ ವೆಸ್ಟ್ ಇಂಡೀಸ್ ಕ್ರಿಕೆಟ್ ಮಂಡಳಿ, ಭಾರತೀಯ ಕ್ರಿಕೆಟ್ ಪ್ರೇಮಿಗಳಿಂದ ಸಾಮಾಜಿಕ ಜಾಲತಾಣದಲ್ಲಿ ಟ್ರೋಲ್ಗಳಿಗೆ ಒಳಗಾಗಿದೆ.
ಸರಣಿಯಲ್ಲಿ 15 ವಿಕೆಟ್ ಕಬಳಿಸಿ, ಬ್ಯಾಟಿಂಗ್ ಮಾಡಿದ ಏಕೈಕ ಇನಿಂಗ್ಸ್ನಲ್ಲಿ ಅರ್ಧಶತಕ ಬಾರಿಸಿ ಮಿಂಚಿದ ಆರ್. ಅಶ್ವಿನ್ಗೆ ಸರಣಿಶ್ರೇಷ್ಠ ಪ್ರಶಸ್ತಿ ಒಲಿಯುವ ನಿರೀೆ ಇತ್ತು. ಆದರೆ ಸರಣಿ ಮುಕ್ತಾಯದ ಬಳಿಕ ನಡೆದ ಪ್ರಶಸ್ತಿ ವಿತರಣಾ ಸಮಾರಂಭದಲ್ಲಿ ಆತಿಥೇಯ ವಿಂಡೀಸ್ ಕ್ರಿಕೆಟ್ ಮಂಡಳಿ, ಸರಣಿಶ್ರೇಷ್ಠ ಪ್ರಶಸ್ತಿಯನ್ನೇ ವಿತರಿಸಲಿಲ್ಲ. ಮೊಹಮದ್ ಸಿರಾಜ್ ಮೊಟ್ಟಮೊದಲ ಬಾರಿಗೆ ಟೆಸ್ಟ್ ಪಂದ್ಯದಲ್ಲಿ ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು. ಯುವ ಎಡಗೈ ಆರಂಭಿಕ ಯಶಸ್ವಿ ಜೈಸ್ವಾಲ್ (266) ಪದಾರ್ಪಣೆಯ ಸರಣಿಯಲ್ಲೇ ಗರಿಷ್ಠ ರನ್ ಸ್ಕೋರರ್ ಎಂಬ ಗೌರವಕ್ಕೆ ಪಾತ್ರರಾದರು. ಆದರೆ, ವಿಂಡೀಸ್ ಕ್ರಿಕೆಟ್ ಮಂಡಳಿ ಸರಣಿಶ್ರೇಷ್ಠ ಪ್ರಶಸ್ತಿಯನ್ನೇ ವಿತರಿಸದಿರುವುದು ಭಾರತೀಯ ಕ್ರಿಕೆಟ್ ಪ್ರೇಮಿಗಳನ್ನು ಅಚ್ಚರಿಗೊಳಿಸಿದೆ. ಇದರೊಂದಿಗೆ ಭಾರತದ ಕ್ರಿಕೆಟ್ ಪ್ರೇಮಿಗಳು, ‘ಯಾಕೆ ಹಣ ಖಾಲಿಯಾಯಿತೇ’ ಎಂದು ವಿಂಡೀಸ್ ಕ್ರಿಕೆಟ್ ಮಂಡಳಿಯನ್ನು ಟ್ರೋಲ್ ಮಾಡಿದ್ದಾರೆ.
ವಿಂಡೀಸ್ ಕ್ರಿಕೆಟ್ ಮಂಡಳಿ ಬಡತನ ಈಗಾಗಲೆ ಕ್ರಿಕೆಟ್ ಪ್ರೇಮಿಗಳಿಗೆ ತಿಳಿದಿರುವುದೇ ಆಗಿದೆ. ಈ ಮುನ್ನ ಮೊದಲ ಟೆಸ್ಟ್ ಪಂದ್ಯದ ಬಳಿಕ ಯಶಸ್ವಿ ಜೈಸ್ವಾಲ್ಗೆ ಪಂದ್ಯಶ್ರೇಷ್ಠ ಪ್ರಶಸ್ತಿಯೊಂದಿಗೆ ಕೇವಲ 40 ಸಾವಿರ ರೂ. (500 ಡಾಲರ್) ಬಹುಮಾನ ಮೊತ್ತ ವಿತರಿಸಿದಾಗಲೂ ವಿಂಡೀಸ್ ಕ್ರಿಕೆಟ್ ಮಂಡಳಿ ಟ್ರೋಲ್ಗಳಿಗೆ ಒಳಗಾಗಿತ್ತು. ಈ ನಡುವೆ ನೇರಪ್ರಸಾರದ ಆ್ಯಪ್ ಜಿಯೋಸಿನಿಮಾದಲ್ಲಿ ಮಾತನಾಡಿರುವ ಮಾಜಿ ವೇಗಿ ಜಹೀರ್ ಖಾನ್, ನನ್ನ ಪ್ರಕಾರ ಆರ್. ಅಶ್ವಿನ್ ಅವರೇ ಸರಣಿಶ್ರೇಷ್ಠ ಎಂದಿದ್ದಾರೆ.
ಡಬ್ಲ್ಯುಟಿಸಿ ಅಂಕಪಟ್ಟಿಯಲ್ಲಿ 2ನೇ ಸ್ಥಾನಕ್ಕಿಳಿದ ಭಾರತ
ಎರಡನೇ ಟೆಸ್ಟ್ನಲ್ಲಿ ಡ್ರಾಕ್ಕೆ ತೃಪ್ತಿಪಟ್ಟ ಕಾರಣ ಭಾರತ ತಂಡ 3ನೇ ಆವೃತ್ತಿಯ ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್ಷಿಪ್ ಅಂಕಪಟ್ಟಿಯಲ್ಲಿ ಜಂಟಿ ಅಗ್ರಸ್ಥಾನದಿಂದ 2ನೇ ಸ್ಥಾನಕ್ಕೆ ಕುಸಿಯಿತು. ಡ್ರಾದಿಂದಾಗಿ ಭಾರತ-ವಿಂಡೀಸ್ ತಂಡಗಳು ಪಂದ್ಯದಲ್ಲಿ ತಲಾ 4 ಅಂಕಗಳನ್ನು ಹಂಚಿಕೊಂಡವು. ಇದರಿಂದ ಭಾರತದ ಶೇಕಡಾವಾರು ಅಂಕಗಳಿಗೆ 100ರಿಂದ 66.67ಕ್ಕೆ ಇಳಿಯಿತು. ಲಂಕಾ ವಿರುದ್ಧ ಮೊದಲ ಟೆಸ್ಟ್ ಗೆದ್ದಿರುವ ಪಾಕ್ ಅಗ್ರಸ್ಥಾನದಲ್ಲಿದೆ. ಆಶಸ್ ಸರಣಿಯಲ್ಲಿ ಆಡುತ್ತಿರುವ ವಿಶ್ವ ಟೆಸ್ಟ್ ಚಾಂಪಿಯನ್ ಆಸ್ಟ್ರೆಲಿಯಾ (ಶೇ.54.17) ಮತ್ತು ಇಂಗ್ಲೆಂಡ್ (ಶೇ. 28.17) ತಂಡಗಳು ಕ್ರಮವಾಗಿ 3, 4ನೇ ಸ್ಥಾನದಲ್ಲಿವೆ. ಮೊದಲ ಬಾರಿಗೆ ಅಂಕಗಳ ಖಾತೆ ತೆರೆದ ವಿಂಡೀಸ್ (ಶೇ.16.67) 5ನೇ ಸ್ಥಾನದಲ್ಲಿದೆ. 2023-25ರ 3ನೇ ಆವೃತ್ತಿಯ ಡಬ್ಲ್ಯುಟಿಸಿಯಲ್ಲಿ ದಣ ಆಫ್ರಿಕಾ, ನ್ಯೂಜಿಲೆಂಡ್ ಮತ್ತು ಬಾಂಗ್ಲಾದೇಶ ಇನ್ನಷ್ಟೇ ಅಭಿಯಾನ ಆರಂಭಿಸಬೇಕಾಗಿದೆ. ಶ್ರೀಲಂಕಾ ಇನ್ನೂ ಖಾತೆ ತೆರೆದಿಲ್ಲ.
ಐಪಿಎಲ್ನಲ್ಲಿ ಮಿಂಚಿರುವ ವಿಂಡೀಸ್ ಸ್ಫೋಟಕ ಬ್ಯಾಟರ್, ಭಾರತ ವಿರುದ್ಧ ಏಕದಿನ ಸರಣಿಗೆ ವಾಪಸ್!