ಹೆಲ್ಮೆಟ್​ ಮೇಲೆಯೂ ವಿಧಿಸಲಾಗುತ್ತಿದೆ 18% ಜಿಎಸ್​ಟಿ: ಜೀವ ಉಳಿಸುವ ಸಾಧನಕ್ಕೆ ತೆರಿಗೆ ತೆಗೆದುಹಾಕಲು ಆಗ್ರಹ

ನವದೆಹಲಿ: ಸುರಕ್ಷತೆ ದೃಷ್ಟಿಯಿಂದ ಬಳಕೆಯನ್ನು ಉತ್ತೇಜಿಸುವ ನಿಟ್ಟಿನಲ್ಲಿ ಹೆಲ್ಮೆಟ್‌ಗಳ ಮೇಲಿನ ತೆರಿಗೆಯನ್ನು ಶೇಕಡಾ 18 ರಿಂದ ಶೂನ್ಯಕ್ಕೆ ಇಳಿಸುವಂತೆ ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ) ಕೌನ್ಸಿಲ್ ಮತ್ತು ಹಣಕಾಸು ಸಚಿವಾಲಯವನ್ನು ಅಂತಾರಾಷ್ಟ್ರೀಯ ರಸ್ತೆ ಒಕ್ಕೂಟ (ಐಆರ್‌ಎಫ್) ಬುಧವಾರ ಒತ್ತಾಯಿಸಿದೆ.

ರಸ್ತೆ ಅಪಘಾತ ದುರಂತಗಳ ಸಂದರ್ಭದಲ್ಲಿ ದ್ವಿಚಕ್ರ ವಾಹನ ಸವಾರರು ಹೆಚ್ಚು ದುರ್ಬಲರಾಗಿರುತ್ತಾರೆ. ರಸ್ತೆ ಅಪಘಾತ ಸಾವುಗಳು ಹೆಚ್ಚುತ್ತಿರುವ ಮಧ್ಯೆಯೇ ಹೆಲ್ಮೆಟ್‌ಗಳ ಮೇಲಿನ ಜಿಎಸ್‌ಟಿ ದರಗಳನ್ನು ಕಡಿಮೆ ಮಾಡುವುದರಿಂದ ಜನಸಾಮಾನ್ಯರಿಗೆ ಹೆಲ್ಮೆಟ್‌ಗಳನ್ನು ಹೆಚ್ಚು ಕೈಗೆಟುಕುವಂತೆ ಮಾಡಲು ನೆರವಾಗುತ್ತದೆ ಎಂದು ಐಆರ್‌ಎಫ್ ಪ್ರಕಟಣೆಯಲ್ಲಿ ತಿಳಿಸಿದೆ.

ಐಆರ್‌ಎಫ್ ವಿಶ್ವಾದ್ಯಂತ ರಸ್ತೆ ಅಪಘಾತ ಸಾವುಗಳ ಪೈಕಿ ಅಂದಾಜು 12 ಪ್ರತಿಶತದಷ್ಟು ಭಾರತದಲ್ಲಿ ಸಂಭವಿಸುತ್ತಿವೆ. ಇದರಿಂದಾಗಿ, ಭಾರತೀಯ ಆರ್ಥಿಕತೆಗೆ ಅಂದಾಜು 15.71-38.81 ಶತಕೋಟಿ ಡಾಲರ್​ ನಷ್ಟವಾಗುತ್ತಿದೆ ಎಂದು ಬಾಷ್ ವರದಿಯನ್ನು ಉಲ್ಲೇಖಿಸಿ ಐಆರ್‌ಎಫ್ ಹೇಳಿದೆ.

"ದ್ವಿಚಕ್ರ ವಾಹನ ಸವಾರರು, ಅತ್ಯಂತ ದುರ್ಬಲರಾಗಿದ್ದಾರೆ. ರಸ್ತೆ ಅಪಘಾತದ ಸಾವುಗಳಲ್ಲಿ ಅಂದಾಜು 31.4 ಪ್ರತಿಶತವು ಪ್ರಾಥಮಿಕವಾಗಿ ತಲೆಗೆ ಗಾಯಗಳಿಂದ ಉಂಟಾಗುತ್ತಿವೆ. ದ್ವಿಚಕ್ರ ವಾಹನ ಅಪಘಾತದ ಗಾಯಗಳು ಮತ್ತು ಸಾವುಗಳನ್ನು ಕಡಿಮೆ ಮಾಡಲು ಅತ್ಯಂತ ಪರಿಣಾಮಕಾರಿ ಕ್ರಮವೆಂದರೆ ಗುಣಮಟ್ಟದ ಹೆಲ್ಮೆಟ್‌ಗಳ ಬಳಕೆ" ಎಂದು ಐಆರ್‌ಎಫ್ ಅಧ್ಯಕ್ಷ ಕೆ.ಕೆ.ಕಪಿಲಾ ಹೇಳಿದ್ದಾರೆ.

ಹೆಚ್ಚಿನ ದ್ವಿಚಕ್ರ ವಾಹನ ಸವಾರರು ಆರ್ಥಿಕವಾಗಿ ದುರ್ಬಲ ಮತ್ತು ಕಡಿಮೆ ಆದಾಯದ ಗುಂಪುಗಳಲ್ಲಿ ಬರುತ್ತಾರೆ. ಅಗ್ಗದ ಮತ್ತು ಗುಣಮಟ್ಟದಲ್ಲಿ ಕಡಿಮೆ ಇರುವ ಹೆಲ್ಮೆಟ್‌ಗಳನ್ನು ಖರೀದಿಸಲು ಬಯಸುತ್ತಾರೆ. ಭಾರತದಲ್ಲಿ ಹೆಲ್ಮೆಟ್ ಬಳಕೆ ಕಡಿಮೆಯಾಗಿದೆ ಎಂದು ಕಪಿಲಾ ಹೇಳಿದರು.

ಪ್ರಸ್ತುತ, ಹೆಲ್ಮೆಟ್‌ಗಳ ಮೇಲೆ ಅನ್ವಯವಾಗುವ ಜಿಎಸ್‌ಟಿ ದರವು ಶೇಕಡಾ 18 ರಷ್ಟಿದೆ. ಇದು ಜೀವ ಉಳಿಸುವ ಸಾಧನವಾಗಿದೆ. ಹೆಲ್ಮೆಟ್‌ಗಳ ಮೇಲೆ ಯಾವುದೇ ಜಿಎಸ್‌ಟಿ ಇರಬಾರದು ಎಂದು ಐಆರ್‌ಎಫ್ ಬಲವಾಗಿ ಶಿಫಾರಸು ಮಾಡುತ್ತದೆ ಎಂದು ಕಪಿಲಾ ಹೇಳಿದ್ದಾರೆ, ಇದು ಜನಸಾಮಾನ್ಯರಿಗೆ ಗುಣಮಟ್ಟದ ಹೆಲ್ಮೆಟ್‌ಗಳನ್ನು ಹೆಚ್ಚು ಕೈಗೆಟುಕುವಂತೆ ಮಾಡಲು ಸಹಾಯ ಮಾಡುತ್ತದೆ. ಕಡಿಮೆ ಗುಣಮಟ್ಟದ ಹೆಲ್ಮೆಟ್‌ಗಳನ್ನು ಖರೀದಿಸುವುದರಿಂದ ಅವರನ್ನು ನಿರುತ್ಸಾಹಗೊಳಿಸುತ್ತದೆ ಎಂದು ಅವರು ಹೇಳಿದರು.

https://www.vijayavani.net/bulls-roar-again-in-bourses-nifty-index-hits-new-all-time-high