ಮನುಷ್ಯ ಆರೋಗ್ಯವಾಗಿರಲು ಆಹಾರ ಕ್ರಮ, ಚಟುವಟಿಕೆಯುಕ್ತ ಜೀವನ ಶೈಲಿ ಬಹಳ ಮುಖ್ಯ. ಆದರೆ ಈ ಎಲ್ಲದಕ್ಕೂ ಮುಖ್ಯವಾದದ್ದು ವೈಯಕ್ತಿಕ ಸ್ವಚ್ಛತೆ. ಇದಕ್ಕೆ ಆದ್ಯತೆ ನೀಡದಿದ್ದರೆ ಏನೇ ಆಹಾರ ಸೇವಿಸಿದರೂ ಅನಾರೋಗ್ಯ ಕಾಡದೆ ಬಿಡದು. ಕುಡಿಯುವ ನೀರು, ಸೇವಿಸುವ ಆಹಾರ, ಬಳಸುವ ತಟ್ಟೆ, ಲೋಟ, ಉಡುವ ಬಟ್ಟೆ ಹೀಗೆ ಎಲ್ಲವೂ ಸ್ವಚ್ಛವಾಗಿರಬೇಕು. ನಿತ್ಯ ಸ್ನಾನ ಮಾಡುವ ಮೂಲಕ ತ್ವಚೆಯ ಆರೋಗ್ಯ ಕಾಪಾಡಿಕೊಳ್ಳಬೇಕು. ಊಟ ಮಾಡುವುದಕ್ಕೂ ಮುನ್ನ ಹಾಗೂ ಶೌಚಕ್ಕೆ ಹೋದ ನಂತರ ಸಾಬೂನು ಬಳಸಿ ಬೆರಳುಗಳು, ಅಂಗೈ, ಮುಂಗೈ, ಉಗುರು ಸೇರಿ ಕೈಗಳನ್ನು ಸಂಪೂರ್ಣವಾಗಿ ಸ್ವಚ್ಛವಾಗಿ ತೊಳೆದುಕೊಳ್ಳಬೇಕು. ಹೊರಗಿನಿಂದ ಮನೆಗೆ ಬಂದ ಕೂಡಲೇ ಕೈ ಕಾಲು, ಮುಖ ತೊಳಗೆದುಕೊಳ್ಳಬೇಕು. ಮನೆಯಲ್ಲಿ ಪ್ರತಿಯೊಬ್ಬರು ಪ್ರತ್ಯೇಕ ಸಾಬೂನು, ಟವೆಲ್, ಹೊದಿಕೆಗಳನ್ನು ಬಳಸುವುದು ಒಳ್ಳೆಯದು. ಜ್ವರ, ಡೆಂಘ, ಚಿಕೂನ್ಗುನ್ಯಾಎಚ್1ಎನ್1 ಸೇರಿ ಯಾವುದೇ ಸಾಂಕ್ರಾಮಿಕ ರೋಗಗಳು ಕಾಣಿಸಿಕೊಂಡ ಸಂದರ್ಭದಲ್ಲಿ ಪ್ರತ್ಯೇಕವಾಸ ಹಾಗೂ ವೈಯಕ್ತಿಕ ವಸ್ತುಗಳ ಬಳಕೆಯಲ್ಲಿ ಪ್ರತ್ಯೇಕತೆ ಇದ್ದರೆ ಒಳ್ಳೆಯದು. ಮನೆಯ ಒಳಗೆ ಹಾಗೂ ಹೊರಗೆ ನೀರು ನಿಲ್ಲದಂತೆ, ಸೊಳ್ಳೆಗಳು ಉತ್ಪತ್ತಿಯಾಗದಂತೆ ಸ್ವಚ್ಛತೆ ಕಾಪಾಡಿಕೊಳ್ಳಬೇಕು.
