ಅಥ್ಲೆಟಿಕ್ಸ್ನಲ್ಲಿ ಒಲಿಂಪಿಯನ್ಗಳಾದ ಅಶ್ವಿನಿ ನಾಚಪ್ಪ, ಜೆಜೆ ಶೋಭಾ, ವಂದನಾ ಶಾನ್ಭಾಗ್, ರೀತ್ ಅಬ್ರಾಹಂ, ಎಂಎಆರ್ ಪೂವಮ್ಮ, ಸಹನಾ ಕುಮಾರಿ, ಮೂಲತಃ ಚಿಕ್ಕಬಳ್ಳಾಪುರದವರಾದ ಒಲಿಂಪಿಯನ್ ಶೂಟರ್ ಸುಮಾ ಶಿರೂರು, ಪ್ಯಾರಾಲಿಂಪಿಯನ್ ಮಾಲತಿ ಹೊಳ್ಳ ಕೂಡ ನಮಗೆಲ್ಲ ಸ್ಪೂರ್ತಿಯಾಗಿ ನಿಲ್ಲುವಂಥ ಮಹಿಳಾ ಕ್ರೀಡಾ ತಾರೆಯರು. ಬ್ಯಾಡ್ಮಿಂಟನ್ನಲ್ಲಿ ವಿಶ್ವದ ಅಗ್ರ ಡಬಲ್ಸ್ ಆಟಗಾರ್ತಿಯಾಗಿ ಗುರುತಿಸಿಕೊಂಡಿರುವ ಅಶ್ವಿನಿ ಪೊನ್ನಪ್ಪ, 2011ರ ವಿಶ್ವ ಚಾಂಪಿಯನ್ಷಿಪ್ನ ಮಹಿಳಾ ಡಬಲ್ಸ್ನಲ್ಲಿ ಕಂಚಿನ ಪದಕ ಗೆದ್ದ ತಾರೆ. ಕಬಡ್ಡಿಯಲ್ಲಿ ಮಮತಾ ಪೂಜಾರಿ, ತೇಜಸ್ವಿನಿ ಬಾಯಿ ಹಾಗೂ ಉಷಾ ರಾಣಿ ಹಲವು ಏಷ್ಯಾಡ್ಗಳಲ್ಲಿ ತಂಡಕ್ಕೆ ಸ್ವರ್ಣ ಪದಕ ಗೆದ್ದುಕೊಡುವಲ್ಲಿ ಶ್ರಮಿಸಿದ್ದಾರೆ. 2000ದಲ್ಲಿ ನಡೆದ ಸಿಡ್ನಿ ಒಲಿಂಪಿಕ್ಸ್ನ ಭಾರತೀಯ ಸ್ವಿಮ್ಮಿಂಗ್ ತಂಡದಲ್ಲಿದ್ದ ಏಕೈಕ ಸದಸ್ಯೆ ಕರ್ನಾಟಕದ ನಿಶಾ ಮಿಲ್ಲೆಟ್. ಸ್ವಿಮ್ಮಿಂಗ್ನಲ್ಲಿ ದೊಡ್ಡ ಮಟ್ಟದ ಯಶಸ್ಸು ಕಂಡಿದ್ದರೂ, ಆರ್ಥಿಕ ಸಮಸ್ಯೆಯ ಕಾರಣದಿಂದಾಗಿ 2004ರಲ್ಲಿ ಕ್ರೀಡೆಯನ್ನು ತೊರೆದರು. ಇನ್ನು ಗಾಲ್ಪ್ ಕ್ರೀಡೆಯಲ್ಲಿ ಗಮನಸೆಳೆಯುತ್ತಿರುವ ಶರ್ವಿುಳಾ ನಿಕೊಲೆಟ್ ಹಾಗೂ ಅದಿತಿ ಅಶೋಕ್ ಇಬ್ಬರೂ ಬೆಂಗಳೂರಿನವರು. ತಮ್ಮ 18ನೇ ವರ್ಷದಲ್ಲಿಯೇ 2009ರಲ್ಲಿ ಲೇಡೀಸ್ ಯುರೋಪಿಯನ್ ಟೂರ್ಗೆ ಅರ್ಹತೆ ಪಡೆಯುವ ಮೂಲಕ ಅತಿ ಕಿರಿಯ ವಯಸ್ಸಿಗೆ ಈ ಸಾಧನೆ ಮಾಡಿದ ಭಾರತೀಯ ಗಾಲ್ಪರ್ ಎನಿಸಿಕೊಂಡಿದ್ದರು. 2016ರ ಒಲಿಂಪಿಕ್ಸ್ನಲ್ಲಿ ಸ್ಪರ್ಧೆ ಮಾಡಿದ್ದ ಅದಿತಿ ಅಶೋಕ್, 21ನೇ ವರ್ಷಕ್ಕೆ ಹಲವು ಪ್ರಶಸ್ತಿಗಳನ್ನು ಗೆಲ್ಲುವ ಮೂಲಕ ದೇಶದ ಗಮನ ಸೆಳೆದಿದ್ದಾರೆ.
