ಬೆಂಗಳೂರು: ಸೌತ್ ಸಿನಿಮಾಗಳ ಜತೆಗೆ ಬಾಲಿವುಡ್ನಲ್ಲಿಯೂ ಕನ್ನಡತಿ ರಶ್ಮಿಕಾ ಮಂದಣ್ಣ ಮಿಂಚುತ್ತಿದ್ದಾರೆ. ಸಾಲು ಸಾಲು ಸಿನಿಮಾಗಳನ್ನು ಒಪ್ಪಿಕೊಂಡು, ಬೇಡಿಕೆ ಸೃಷ್ಟಿಸಿಕೊಂಡಿದ್ದಾರೆ. ಹಿಂದಿಯಲ್ಲಿ ‘ಮಿಷನ್ ಮಜ್ನು’, ಅಮಿತಾಭ್ ಬಚ್ಚನ್ ಜತೆಗೆ ‘ಗುಡ್ಬೈ’ ಚಿತ್ರದ ಕೆಲಸಗಳನ್ನೂ ಆರಂಭಿಸಿದ್ದಾರೆ.
ಹೀಗಿರುವಾಗಲೇ ಅಚ್ಚರಿಯ ಸುದ್ದಿಯೊಂದು ಹೊರಬಿದ್ದಿದೆ. ಅದು ಹಿಂದಿಯಲ್ಲಿ ತಯಾರಾಗುತ್ತಿರುವ ‘ಜೆರ್ಸಿ’ ಚಿತ್ರದ ರಿಮೇಕ್ ಕುರಿತು. ಹೌದು, ಕಳೆದ ವರ್ಷವೇ ‘ಜೆರ್ಸಿ’ ಚಿತ್ರದ ಹಿಂದಿ ರಿಮೇಕ್ನಲ್ಲಿ ರಶ್ಮಿಕಾ ನಟಿಸಲಿದ್ದಾರೆ ಎಂಬ ಸುದ್ದಿ ದಟ್ಟವಾಗಿತ್ತು. ಅದೇ ರೀತಿ ನಿರ್ದೇಶಕರೂ ರಶ್ಮಿಕಾಗೆ ಅಪ್ರೋಚ್ ಸಹ ಮಾಡಿದ್ದರು. ಆದರೆ, ಒಂದಷ್ಟು ಕಾರಣ ನೀಡಿ ಸಿನಿಮಾದಿಂದ ಹಿಂದೆ ಸರಿದಿದ್ದರು.
ಏಕೆ ಆ ಚಿತ್ರ ಕೈ ಬಿಟ್ಟಿದ್ದು ಎಂಬ ಬಗ್ಗೆ ಮಾಹಿತಿಯೂ ಹೊರಬಿದ್ದಿರಲಿಲ್ಲ. ಇದೀಗ ಸಂದರ್ಶನವೊಂದರಲ್ಲಿ ಸ್ವತಃ ರಶ್ಮಿಕಾ ಆ ಬಗ್ಗೆ ಹೇಳಿಕೊಂಡಿದ್ದಾರೆ. ‘ನಟಿಸಿದ್ದರೆ ಬಾಲಿವುಡ್ನಲ್ಲಿ ‘ಜೆರ್ಸಿ’ ಚಿತ್ರವೇ ನನ್ನ ಮೊದಲ ಹಿಂದಿ ಸಿನಿಮಾ ಆಗುತ್ತಿತ್ತು. ಮೂಲ ಸಿನಿಮಾದಲ್ಲಿ ಶ್ರದ್ಧಾ ಶ್ರೀನಾಥ್ ಮಾಡಿದ ಪಾತ್ರಕ್ಕೆ ನ್ಯಾಯ ನೀಡಲು ಆಗುತ್ತೋ ಇಲ್ಲವೋ ಎಂಬ ಅಳುಕಿತ್ತು ಮತ್ತು ನಂಬಿಕೆ ಇರಲಿಲ್ಲ. ಹಾಗಾಗಿ ಆ ಚಿತ್ರದಿಂದ ಹಿಂದೆ ಸರಿದೆ’ ಎಂದಿದ್ದಾರೆ. ಸದ್ಯ ‘ಜೆರ್ಸಿ’ ರಿಮೇಕ್ನಲ್ಲಿ ಶಾಹಿದ್ ಕಪೂರ್ ಜತೆಗೆ ಮೃಣಾಲ್ ಠಾಕೂರ್ ನಾಯಕಿಯಾಗಿ ನಟಿಸುತ್ತಿದ್ದಾರೆ. ಇತ್ತ ಹಿಂದಿಯ ಸಿನಿಮಾಗಳ ಜತೆಗೆ ತೆಲುಗಿನ ‘ಪುಷ್ಪ’, ಶರ್ವಾನಂದ ಜತೆಗೆ ‘ಆಡವಾಳ್ಳು ಮೀಕು ಜೋಹಾರ್ಲು’ ಚಿತ್ರದಲ್ಲಿಯೂ ಬಿಜಿಯಾಗಿದ್ದಾರೆ.