ಶಿಲಾನ್ಯಾಸದ ನಂತರ ಪ್ರಧಾನಿ ಮೋದಿ ಜೈ ಶ್ರೀರಾಮ್​ ಹೇಳದೆ, ಜೈ ಸಿಯಾ ರಾಮ್​ ಎಂದೇ ಹೇಳಿದ್ದೇಕೆ? ಕಾರಣ ಇಲ್ಲಿದೆ ನೋಡಿ...

ಲಖನೌ: ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ನಿನ್ನೆ ಅಯೋಧ್ಯೆ ರಾಮಮಂದಿರ ಶಿಲಾನ್ಯಾಸ ನೆರವೇರಿಸಿದ ಬಳಿಕ ಮಾತನಾಡಿದರು. ಹಾಗೇ ಮಾತು ಪ್ರಾರಂಭಿಸುವ ಮೊದಲು ಅವರು, ಜೈ ಶ್ರೀರಾಮ್​ ಎಂದು ಹೇಳುವ ಬದಲು, ಜೈ ಸಿಯಾ ರಾಮ್ ಎಂದು ಘೋಷಣೆ ಕೂಗಿದರು.

ಮಂದಿರ ಹೋರಾಟ ಕಾಲದಿಂದಲೂ ನಡೆದು ಬಂದ ಪ್ರಸಿದ್ಧ ಘೋಷವಾಕ್ಯ ಜೈ ಶ್ರೀರಾಮ್​ ಬದಲು ಜೈ ಸಿಯಾ ರಾಮ್​ ಎಂದೇ ಯಾಕೆ ಪ್ರಧಾನಿ ಹೇಳಿದರು ಎಂಬುದು ಅನೇಕರ ಕುತೂಹಲ. ಮೊದಲಿಗೆ ನಾವು ಪ್ರಭು ರಾಮಚಂದ್ರ ಹಾಗೂ ಮಾತೆ ಜಾನಕಿಯನ್ನು ನೆನಪು ಮಾಡಿಕೊಳ್ಳೋಣ ಎಂದು ಹೇಳಿದ ಮೋದಿಯವರು...ಸಿಯಾವರ್​ ರಾಮಚಂದ್ರ ಕೀ ಜೈ...ಜೈ ಸಿಯಾ ರಾಮ್​ ಎಂದು ಜೈ ಕಾರ ಹಾಕಿದರು.

1984ರಲ್ಲಿ ರಾಮಮಂದಿರ ಆಂದೋಲನ ಶುರುವಾಗಿದೆ. ಅಂದಿನಿಂದಲೂ ಕೇಸರಿಪಡೆಯಲ್ಲಿ ಜೈ ಶ್ರೀರಾಮ್ ಎಂಬುದು ಪ್ರಸಿದ್ಧ ಶುಭಾಶಯ ವಿಧಾನ. ಅಷ್ಟೇ ಅಲ್ಲ, ರಾಮಮಂದಿರ ಹೋರಾಟ ಗಂಭೀರಸ್ವರೂಪಕ್ಕೆ ತಿರುಗಿದಾಗ ಈ ಜೈ ಶ್ರೀರಾಮ್​ ಎಂಬುದು ಯುದ್ಧ ಘೋಷ ವಾಕ್ಯವಾಯಿತು. ಇದನ್ನೂ ಓದಿ: ರಾಮ ಜನ್ಮಭೂಮಿ ಆವರಣದಲ್ಲಿ ಪ್ರಧಾನಿ ಮೋದಿ ಪಾರಿಜಾತ ನೆಟ್ಟಿದ್ದು ಏಕೆ?

ಹಾಗೇ ಒಂದಷ್ಟು ಜನರು ಜೈ ಸಿಯಾ ರಾಮ್​ ಎಂಬುದನ್ನು ಶುಭಾಶಯ ವಿಧಾನವನ್ನಾಗಿ ಮಾಡಿಕೊಂಡಿದ್ದರು. ಜೈ ಸಿಯಾ ರಾಮ್​ ಎಂದರೆ ಶ್ರೀರಾಮ ಸೀತೆಯ ಸಹಿತ ಇರುವ ಸೌಮ್ಯ ರೂಪ, ಮರ್ಯಾದಾ ಪುರಷೋತ್ತನ ಸ್ವಭಾವ ಅದು. ಹಾಗೇ, ಮೃದುತ್ವ ಮತ್ತು ನಮ್ರತೆಯ ಪ್ರತೀಕ ಎಂದು ಶ್ರೀರಾಮನ ಭಕ್ತರು ನಂಬಿದ್ದರು. ಅಂದರೆ ಜೈ ಶ್ರೀರಾಮ್​ ಎಂಬುದು ಹೋರಾಟದ ಪ್ರತಿರೂಪವಾಗಿಯೂ..ಜೈ ಸಿಯಾ ರಾಮ್​ ಎಂಬುದು ಸೌಮ್ಯ ಮೂರ್ತಿಯ ಸಂಕೇತವಾಗಿಯೂ ಉಲ್ಲೇಖಿಸಲ್ಪಟ್ಟಿತು.

ಈ ಬಗ್ಗೆ ತೇವಾರಿ ಮಂದಿರದ ಮಹಾಂತ್​ ಗಿರಿಶ್​ಪತಿ ತ್ರಿಪಾಠಿ ವಿವರಿಸಿದ್ದಾರೆ. ಜೈ ಶ್ರೀರಾಮ್ ಎಂಬುದು ನಿರ್ಭಯ ಭಾವವನ್ನು ಒಳಗೊಂಡಿದೆ. ಅದನ್ನು ಉಚ್ಛರಿಸಿದರೆ ನಮ್ಮಲ್ಲೂ ಧೈರ್ಯ ಮೂಡುತ್ತದೆ. ಹಾಗೇ ಜೈ ಸಿಯಾ ರಾಮ್​ ಎಂಬುದು ಇತರರ ಒಳಿತನ್ನೂ ಒಳಗೊಂಡಿದೆ. ಹಾಗೇ, ಜೈ ಶ್ರೀರಾಮ್​ ಯುದ್ಧೋನ್ಮಾದವಾಗಿದ್ದರೆ, ಜೈ ಸಿಯಾ ರಾಮ್​ ಪ್ರೀತಿ, ಅರ್ಪಣೆಯ ಭಾವವನ್ನು ಹೊಂದಿದೆ ಎಂದು ಹೇಳಿದ್ದಾರೆ. ಇದನ್ನೂ ಓದಿ: ಮುಖ್ಯಮಂತ್ರಿ ಮಗನನ್ನು ಟೀಮ್​ ಕಂಗನಾ ಟಾರ್ಗೆಟ್​ ಮಾಡುತ್ತಿರುವುದೇಕೆ?

ಜೈ ಶ್ರೀರಾಮ್​ ಮತ್ತು ಜೈ ಸಿಯಾ ರಾಮ್​ ನಡುವೆ ನಿಜವಾಗಿಯೂ ಯಾವುದೇ ವ್ಯತ್ಯಾಸವಿಲ್ಲ. ಇವೆರಡೂ ರಾಮನನ್ನು ಸ್ಮರಿಸಲು ಹೇಳುವ ವಾಕ್ಯಗಳು ಎಂದು ಹೇಳಲಾಗಿದೆ.

ಹಾಗೇ ನಿನ್ನೆ ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ಜೈ ಸಿಯಾ ರಾಮ್​ ಎಂದು ಹೇಳಿದ್ದು, ಗುರಿ ಸಾಧನೆ ಮಾಡಿದ್ದರ ಸಂಕೇತ. 1984ಕ್ಕೂ ಮೊದಲು ಜೈ ಶ್ರೀರಾಮ್​ ಮತ್ತು ಜೈ ಸಿಯಾ ರಾಮ್​ ನಡುವೆ ಯಾವುದೇ ವ್ಯತ್ಯಾಸವೂ ಇರಲಿಲ್ಲ. ಆದರೆ ನಂತರ ಇವೆರಡನ್ನೂ ಬೇರೆಯದ್ದೇ ಅರ್ಥಗಳಲ್ಲಿ ಬಳಸಲಾಯಿತು. ಜೈ ಶ್ರೀರಾಮ್​ ಚಳವಳಿ ರೂಪ ಪಡೆದುಕೊಂಡಿತು. ಜೈ ಸಿಯಾ ರಾಮ್​ ಪದದ ಸೌಮ್ಯತೆಯನ್ನು ಹಾಗೇ ಉಳಿಸಿಕೊಂಡಿತು. ರಾಮಮಂದಿರ ನಿರ್ಮಾಣದ ಉದ್ದೇಶ ಈಗ ಈಡೇರಿರುವ ಹಿನ್ನೆಲೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿಯ ಜೈ ಸಿಯಾ ರಾಮ್​ ಎಂಬ ಪದವನ್ನೇ ಆಯ್ಕೆ ಮಾಡಿಕೊಂಡಿದ್ದಾರೆಂದು ಅಯೋಧ್ಯಾ ಅವಧ್​ ಯೂನಿವರ್ಸಿಟಿಯ ಮಾಜಿ ಉಪಕುಲಪತಿ ಮನೋಜ್​ ದೀಕ್ಷಿತ್​ ಅಭಿಪ್ರಾಯಪಟ್ಟಿದ್ದಾರೆ. (ಏಜೆನ್ಸೀಸ್​)

https://www.vijayavani.net/haryana-govt-booked-against-fake-sanitiser/