ತೀಕ್ಷ್ಣಗುಣದ ಅಥವಾ ದೇಹಕ್ಕೆ ಒಗ್ಗದ ಔಷಧಗಳ ಸೇವನೆಯೂ ಇನ್ನೊಂದು ಕಾರಣ. ಒಣಗಿರುವ ಆಹಾರ ವ್ಯಂಜನಗಳು, ಅಡುಗೆ ಮಾಡಿ ತಯಾರಿಸಿ ಬಹುಸಮಯ ಕಳೆದ ಹಳೆ ಆಹಾರ, ಶುಷ್ಕ ಗುಣದ ಪದಾರ್ಥಗಳಿಂದ ಸಿದ್ಧಗೊಳಿಸಿದ ಆಹಾರ ಸೇವನೆಯಿಂದಲೂ ಮೂತ್ರಬಾಧೆ ಉಂಟಾಗುತ್ತದೆ. ನಿತ್ಯ ಮದ್ಯಸೇವನೆ, ಅತಿಯಾದ ಲೈಂಗಿಕ ಕ್ರಿಯೆ, ವಾಹನಗಳಲ್ಲಿ ವೇಗವಾಗಿ, ಗಡುಸಾಗಿ ಪ್ರತಿನಿತ್ಯ ಸಂಚರಿಸುವುದು, ಹೊತ್ತುಗೊತ್ತಿ ಲ್ಲದೆ ಆಗಾಗ ಅತಿಯಾದ ಆಹಾರ ಸೇವಿಸುವುದು, ತಿಂದ ಆಹಾರ ಪಚನವಾಗದೆ ಅಜೀರ್ಣವಾಗಿರುವುದು ಇವೆಲ್ಲವೂ ಕಷ್ಟಕರ ಮೂತ್ರಕ್ಕೆ ಕಾರಣವಾಗುತ್ತವೆ ಎನ್ನುತ್ತದೆ ಆಯುರ್ವೆದ. ತಾಳತಪ್ಪಿದ ದೋಷಗಳು ಮೂತ್ರವಹ ಸಂಸ್ಥಾನದ ಅವಯವಗಳಿಗೆ ಒತ್ತಡ ಹೇರಿ ದೂಷಿಸಿ ಕಷ್ಟಕರ ಮೂತ್ರ ಉಂಟಾಗುತ್ತದೆ.
