ನೀವು ನಮ್ಮ ನೀರು ತಡೆದ್ರೆ, ನಾವು ನಿಮ್ಮ ಕತ್ತು ಹಿಸುಕುತ್ತೇವೆ: ಹಫೀಜ್ ಸಯೀದ್‌ ರೀತಿಯಲ್ಲೇ​ ಬೆದರಿಕೆ! Pakistan Army

Pakistan Army : ಪಾಕಿಸ್ತಾನ ಸೇನೆ ಮತ್ತು ಭಯೋತ್ಪಾದಕ ಜಾಲದ ನಡುವಿನ ಭಯಾನಕ ಸಮ್ಮಿಲನಕ್ಕೆ ಸಾಕ್ಷಿಯಾಗಿ ಮತ್ತೊಂದು ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದೆ. ಪಾಕ್​ ಮಿಲಿಟರಿ ಅಧಿಕಾರಿಯೊಬ್ಬರು ಮೋಸ್ಟ್​ ವಾಂಟೆಡ್​ ಭಯೋತ್ಪಾದಕ ಹಫೀಜ್ ಸಯೀದ್‌ ರೀತಿಯಲ್ಲೇ ಭಾರತಕ್ಕೆ ಬೆದರಿಕೆ ಹಾಕುತ್ತಿರುವುದು ಕಂಡುಬಂದಿದೆ.

ಪಾಕಿಸ್ತಾನದ ವಿಶ್ವವಿದ್ಯಾಲಯವೊಂದರಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಲೆಫ್ಟಿನೆಂಟ್ ಜನರಲ್ ಅಹ್ಮದ್ ಷರೀಫ್ ಚೌಧರಿ ಮಾತನಾಡಿದರು. ನೀವು ನಮ್ಮ ನೀರನ್ನು ನಿರ್ಬಂಧಿಸಿದರೆ, ನಾವು ನಿಮ್ಮ ಕತ್ತು ಹಿಸುಕುತ್ತೇವೆ ಎಂದು ಹೇಳುತ್ತಿರುವುದು ವೈರಲ್​ ವಿಡಿಯೋದಲ್ಲಿದೆ. ಪಹಲ್ಗಾಮ್ ಭಯೋತ್ಪಾದಕ ದಾಳಿಯ ನಂತರ ಸಿಂಧೂ ನದಿ ನೀರು ಹಂಚಿಕೆ ಒಪ್ಪಂದವನ್ನು ಸ್ಥಗಿತಗೊಳಿಸಿದ ಭಾರತದ ಇತ್ತೀಚಿನ ಕ್ರಮವನ್ನು ಉಲ್ಲೇಖಿಸಿ ಬೆದರಿಕೆ ಹಾಕಿರುವುದು ಸ್ಪಷ್ಟವಾಗಿದೆ.

ನೀವು ನೀರನ್ನು ನಿಲ್ಲಿಸಿದರೆ, ದೇವರು ಬಯಸಿದರೆ, ನಾವು ನಿಮ್ಮ ಉಸಿರನ್ನು ನಿಲ್ಲಿಸುತ್ತೇವೆ ಮತ್ತು ನಂತರ ಈ ನದಿಗಳಲ್ಲಿ ರಕ್ತ ಬರುತ್ತದೆ ಎಂದು ಲಷ್ಕರ್-ಇ-ತೊಯ್ಬಾ ಮುಖ್ಯಸ್ಥ ಹಫೀಜ್ ಸಯೀದ್ ಹೇಳಿರುವ ಹೇಳಿಕೆಗೆ ಪಾಕ್​ ಸೇನಾಧಿಕಾರಿ ಹೇಳಿರುವ ಹೇಳಿಕೆ ಕನ್ನಡಿ ಹಿಡಿದಂತಿದೆ. ಇಂಟರ್ನೆಟ್‌ನಲ್ಲಿ ಹಂಚಿಕೊಂಡ ಎರಡೂ ವಿಡಿಯೋಗಲ್ಲಿ ತುಂಬಾ ಹೋಲಿಕೆಗಳಿವೆ.

ಇದನ್ನೂ ಓದಿ: ಹಾರ್ವರ್ಡ್​ ವಿಶ್ವವಿದ್ಯಾಲಯ 3 ದಿನದಲ್ಲಿ 6 ಷರತ್ತುಗಳನ್ನು ಪೂರೈಸಿದ್ರೆ ವಿದೇಶಿ ವಿದ್ಯಾರ್ಥಿಗಳು ಅಲ್ಲೇ ಇರಬಹುದು! Harvard University

ವಿಡಿಯೋ ಬಗ್ಗೆ ಮಾತನಾಡಿರುವ ಆಫ್ಘನ್ ರಾಜಕಾರಣಿ ಮತ್ತು ಮಾಜಿ ಸಂಸತ್ ಸದಸ್ಯೆ ಮರಿಯಮ್ ಸೊಲೈಮಾಂಖಿಲ್, ಭಾರತ ನೀರನ್ನು ನಿಲ್ಲಿಸಿದರೆ ನಾವು ಅವರ ಉಸಿರನ್ನು ನಿಲ್ಲಿಸುತ್ತೇವೆ ಎಂದು ಲಷ್ಕರ್ ಇ ತೊಯ್ಬಾದ ಸಂಸ್ಥಾಪಕ ಹಫೀಜ್ ಸಯೀದ್ ಹೇಳಿದ ಮಾತನ್ನು ನಕಲು ಮಾಡಿದಂತಿದೆ. ಪಾಕಿಸ್ತಾನಿ ಮಿಲಿಟರಿ ಸ್ಥಾಪನೆಯು ಮಾನ್ಯತೆ ಪಡೆದ ಭಯೋತ್ಪಾದಕರೊಂದಿಗೆ ಸ್ಕ್ರಿಪ್ಟ್ ಹಂಚಿಕೊಂಡಿದೆ ಎಂದು ನಾನು ಭಾವಿಸುತ್ತೇನೆ ಎಂದು ಟೀಕಿಸಿದ್ದಾರೆ.

ಹಫೀಜ್ ಸಯೀದ್ ವಿಡಿಯೋದ ಸಮಯ ಯಾವುದೆಂದು ತಿಳಿದುಬಂದಿಲ್ಲ. ಆದರೆ, ಈ ಹಿಂದಿನ ಸಾರ್ವಜನಿಕ ಭಾಷಣದಲ್ಲಿ ಮಾತನಾಡಿರುವಂತೆ ಕಾಣುತ್ತದೆ. ಏಪ್ರಿಲ್ 22ರ ಪಹಲ್ಗಾಮ್ ಭಯೋತ್ಪಾದಕ ದಾಳಿಯ ನಂತರ ಭಾರತ ಇತ್ತೀಚೆಗೆ ಪಾಕಿಸ್ತಾನದೊಂದಿಗಿನ 1960 ರ ಸಿಂಧೂ ಜಲ ಒಪ್ಪಂದವನ್ನು ಭಾರತ ಸ್ಥಗಿತಗೊಳಿಸಿದೆ. ಈ ಕ್ರಮವು ಇಸ್ಲಾಮಾಬಾದ್ ವಿರುದ್ಧ ಭಾರತ ತೆಗೆದುಕೊಂಡ ದಂಡನಾತ್ಮಕ ಕ್ರಮಗಳ ಸರಣಿಯ ಭಾಗವಾಗಿದ್ದು, ಪಾಕಿಸ್ತಾನ ಗಡಿಯಾಚೆಗಿನ ಭಯೋತ್ಪಾದನೆಯನ್ನು ಬೆಂಬಲಿಸುತ್ತಿದೆ ಎಂದು ಆರೋಪಿಸಿದೆ. (ಏಜೆನ್ಸೀಸ್​)

https://www.vijayavani.net/harvard-university-indian-foreign-students-can-stay-if-they-meet-6-conditions-in-3-days