ಉತ್ತರ ಕನ್ನಡದ ಗುಹೆಯಲ್ಲಿ ವಾಸವಿದ್ದಿದ್ದು ಏಕೆ? ಅಚ್ಚರಿಯ ಹೇಳಿಕೆ ನೀಡಿದ ರಷ್ಯಾ ಮಹಿಳೆ! Russian Woman

Russian Woman : ಉತ್ತರ ಕನ್ನಡದ ಗುಹೆಯೊಂದರಲ್ಲಿ ತನ್ನಿಬ್ಬರು ಹೆಣ್ಣು ಮಕ್ಕಳೊಂದಿಗೆ ವಾಸವಿದ್ದ ರಷ್ಯಾ ಮೂಲದ ಮಹಿಳೆಯನ್ನು ರಕ್ಷಣೆ ಮಾಡಿರುವ ಗೋಕರ್ಣ ಪೊಲೀಸರು, ಆಕೆಯನ್ನು ತುಮಕೂರಿನ ರಕ್ಷಣಾ ಕೇಂದ್ರಕ್ಕೆ ಕಳುಹಿಸುವ ಮುನ್ನ ಬೆಂಗಳೂರಿನ ವಿದೇಶಿಯರ ಪ್ರಾದೇಶಿಕ ನೋಂದಣಿ ಕಚೇರಿ ( FRRO ) ಯಲ್ಲಿ ಪರಿಶೀಲನೆ ನಡೆಸಲಾಯಿತು. ಇದೇ ವೇಳೆ ಆಕೆ ಎಎನ್​ಐ ಸುದ್ದಿ ಸಂಸ್ಥೆ ಜತೆ ಮಾತನಾಡಿದ್ದು, ಅಚ್ಚರಿ ಮಾಹಿತಿಯನ್ನು ಬಿಚ್ಚಿಟ್ಟಿದ್ದಾರೆ.

ರಷ್ಯಾ ಮಹಿಳೆ ನೀನಾ ಕುಟಿನಾ (40) , ತನ್ನಿಬ್ಬರು ಮಕ್ಕಳಾದ ಪ್ರಾಯಾ (6) ಮತ್ತು ಅಮಾ (4) ಜತೆ ಗೋಕರ್ಣ ಬಳಿಯಿರುವ ಗುಹೆಯಲ್ಲಿ ರಹಸ್ಯವಾಗಿ ವಾಸವಿದ್ದಳು. ಈ ವಿಚಾರ ಗೊತ್ತಾದ ಬಳಿಕ ಗೋಕರ್ಣ ಪೊಲೀಸರು ಆಕೆಯನ್ನು ರಕ್ಷಣೆ ಮಾಡಿದರು. ಇದೀಗ ತನ್ನ ಜೀವನಶೈಲಿಯನ್ನು ಸಮರ್ಥಿಸಿಕೊಂಡಿರುವ ಕುಟಿನಾ, ಆಕೆಯ ಪರಿಸ್ಥಿತಿಯ ಬಗ್ಗೆ ಹರಿದಾಡಿರುವ ಸುದ್ದಿಯನ್ನು ಸುಳ್ಳು ಎಂದಿದ್ದಾಳೆ.

ನೀವು ಈಗಾಗಲೇ ಸಾಕಷ್ಟು ತಪ್ಪು ಮಾಹಿತಿಯನ್ನು ನೀಡಿದ್ದೀರಿ. ನಮಗೆ ನೈಸರ್ಗಿಕವಾಗಿ ಕಾಡಿನಲ್ಲಿ ಉಳಿಯಲು ಸಾಕಷ್ಟು ಅನುಭವವಿದೆ ಮತ್ತು ನಾವೇನು ಸಾಯುತ್ತಿರಲಿಲ್ಲ. ನಾನು ನನ್ನ ಹೆಣ್ಣುಮಕ್ಕಳನ್ನು ಕಾಡಿನಲ್ಲಿ ಸಾಯಲು ಕರೆತಂದಿರಲಿಲ್ಲ, ನನ್ನ ಮಕ್ಕಳಿಗೆ ಯಾವುದೇ ಬೇಸರವೂ ಇರಲಿಲ್ಲ ಮತ್ತು ತುಂಬಾ ಸಂತೋಷವಾಗಿದ್ದರು. ಕಾಡಿನ ಜಲಪಾತದಲ್ಲಿ ಅವರು ಈಜುತ್ತಿದ್ದರು ಮತ್ತು ವಾಸಿಸುತ್ತಿದ್ದರು. ಮಲಗಲು ಅಲ್ಲಿ ಉತ್ತಮವಾದ ಸ್ಥಳವಿತ್ತು. ಕಲಾ ತಯಾರಿಕೆಯ ಬಗ್ಗೆ ಬಹಳಷ್ಟು ಪಾಠಗಳನ್ನು ಕಲಿತರು. ನಾವು ಜೇಡಿಮಣ್ಣಿನಿಂದ ಸಾಕಷ್ಟನ್ನು ತಯಾರಿಸಿದ್ದೇವೆ ಮತ್ತು ಬಣ್ಣ ಬಳಿದಿದ್ದೇವೆ. ಅಲ್ಲಿರುವಷ್ಟು ದಿನ ನಾವು ಚೆನ್ನಾಗಿ ತಿಂದಿದ್ದೇವೆ. ನಾನು ಗ್ಯಾಸ್ ಬಳಸಿ ಅಡುಗೆ ಮಾಡುತ್ತಿದ್ದೆ. ತುಂಬಾ ಒಳ್ಳೆಯ ಮತ್ತು ರುಚಿಕರವಾದ ಆಹಾರವನ್ನು ಮಾಡುತ್ತಿದ್ದೆ ಎಂದು ನೀನಾ ಕುಟಿನಾ ಹೇಳಿದ್ದಾರೆ.

ನೀವು ಹೇಳಿದ್ದು ಯಾವುದೂ ನಿಜವಲ್ಲ. ನನ್ನ ಬಳಿ ಸಾಮಾಜಿಕ ಜಾಲತಾಣದಂತಹ ಬಹಳಷ್ಟು ವೆಬ್‌ಸೈಟ್‌ಗಳಿವೆ. ನನ್ನ ಪ್ರೊಫೈಲ್‌ನಲ್ಲಿ ನಮ್ಮ ಜೀವನ ಅನುಭವದ ಬಗ್ಗೆ ಬಹಳಷ್ಟು ವಿಡಿಯೋಗಳಿವೆ. ಹಲವು ವರ್ಷಗಳು, ವಿಭಿನ್ನ ದೇಶಗಳಲ್ಲಿ ನಾನು ವಾಸ ಮಾಡಿದ್ದೇನೆ. ಸುಮಾರು 20 ದೇಶಗಳಲ್ಲಿ ಇದೇ ರೀತಿ ಕಳೆದಿದ್ದೇವೆ. ವಿಭಿನ್ನ ಅರಣ್ಯದಲ್ಲಿ ನಾವು ಜೀವನ ನಡೆಸಿದ್ದೇವೆ. ಏಕೆಂದರೆ ನಾವು ನೈಸರ್ಗಿಕತೆಯನ್ನು ಪ್ರೀತಿಸುತ್ತೇವೆ ಎಂದು ಕುಟಿನಾ ತಿಳಿಸಿದ್ದಾರೆ.

ಮಾತು ಮುಂದುವರಿಸಿದ ಕುಟಿನಾ, ಇಂದು ನಮ್ಮನ್ನು ವೈದ್ಯರ ತಪಾಸಣೆಗಾಗಿ ಆಸ್ಪತ್ರೆಗೆ ಕರೆತಂದರು. ಆದರೆ, ನನ್ನ ಹೆಣ್ಣುಮಕ್ಕಳು ಆಸ್ಪತ್ರೆಗೆ ಬಂದದ್ದು ಇದೇ ಮೊದಲು. ಅವರು ತುಂಬಾ ಆರೋಗ್ಯವಾಗಿದ್ದಾರೆ. ಅವರಿಗೆ ಒಂದೇ ಒಂದು ನೋವು ಇಲ್ಲ ಮತ್ತು ಅವರ ಜೀವನದಲ್ಲಿ ಒಮ್ಮೆಯೂ ಅವರು ಅನಾರೋಗ್ಯದಿಂದ ಬಳಲಿರಲಿಲ್ಲ ಎಂದ ಕುಟಿನಾ, ತಾವು ವಾಸಿಸುತ್ತಿದ್ದ ಗುಹೆಯನ್ನು ಸುರಕ್ಷಿತ ಎಂದು ಸಮರ್ಥಿಸಿಕೊಂಡರು.

ಇದನ್ನೂ ಓದಿ: ಒಡಿಶಾ ವಿದ್ಯಾರ್ಥಿನಿಯ ಸಾವು: ಇದು ಸರ್ಕಾರದ ಯೋಜಿತ ಕೊಲೆ ಎಂದು ವಿಪಕ್ಷಗಳ ಆಕ್ರೋಶ! Student Death

ನಾವು ನೈಸರ್ಗಿಕವಾಗಿ ಬದುಕಲು ಇಷ್ಟಪಡುತ್ತೇವೆ. ಈ ಗುಹೆ ದೊಡ್ಡ ಕಾಡಿನಲ್ಲಿರುವಂತೆ ಇರಲಿಲ್ಲ. ಎಲ್ಲದರಿಂದ ದೂರದಲ್ಲಿರಲಿಲ್ಲ. ಬಹುಶಃ ಆಹಾರ ಅಥವಾ ಏನನ್ನಾದರೂ ಖರೀದಿಸಬಹುದಿತ್ತು. ಇದು ಹಳ್ಳಿಗೆ ತುಂಬಾ ಹತ್ತಿರದಲ್ಲಿದೆ ಮತ್ತು ಇದು ತುಂಬಾ ದೊಡ್ಡ ಮತ್ತು ಸುಂದರವಾದ ಗುಹೆಯಾಗಿತ್ತು. ಇದು ಅಪಾಯಕಾರಿ ಸ್ಥಳವಲ್ಲ ಎಂದು ಕುಟಿನಾ ಬಣ್ಣಿಸಿದರು.

ವೀಸಾ ವಿಚಾರವಾಗಿ ಮಾತನಾಡಿದ ಕುಟಿನಾ, ತಮ್ಮ ದಾಖಲೆಗಳ ಅವಧಿ ಮುಗಿದಿದೆ ಎಂದು ಒಪ್ಪಿಕೊಂಡರು. ಆದರೆ, 2017 ರಿಂದ ಗುಹೆಯಲ್ಲೇ ವಾಸವಿದ್ದರು ಎಂಬ ವಾದವನ್ನು ತಳ್ಳಿ ಹಾಕಿದರು. ಪೊಲೀಸರಿಗೆ ನಮ್ಮ ಹಳೆಯ ಪಾಸ್​ಪೋರ್ಟ್​ ಸಿಕ್ಕಿದೆ. ಆದರೆ, ಅದನ್ನು ಅವರು ಪರಿಶೀಲಿಸಲಿಲ್ಲ. ನಮ್ಮ ಕುರಿತಾದ ವರದಿಗಳು ಸುಳ್ಳು. ನಮಗೆ ಮಾನ್ಯವಾದ ವೀಸಾ ಇಲ್ಲ. ನಮ್ಮ ವೀಸಾ ಮುಗಿದಿದೆ. ಆದರೆ, ಅದು ಸ್ವಲ್ಪ ಸಮಯದ ಹಿಂದೆಯೇ ಮುಗಿದಿತ್ತು. 2017ರ ನಂತರ, ನಾವು ಈಗಾಗಲೇ ನಾಲ್ಕು ದೇಶಗಳಲ್ಲಿದ್ದೆವು ಎಂದು ತಿಳಿಸಿದ್ದಾರೆ.

ಕುಟಿನಾ ಅವರು ರಷ್ಯಾದಲ್ಲಿ ಜನಿಸಿದರು ಆದರೆ, 15 ವರ್ಷಗಳಿಂದ ಅಲ್ಲಿ ವಾಸಿಸುತ್ತಿರಲಿಲ್ಲ ಎಂದು ಅವರೇ ಹೇಳಿದ್ದಾರೆ. ಕೋಸ್ಟರಿಕಾ, ಮಲೇಷ್ಯಾ, ಬಾಲಿ, ಥೈಲ್ಯಾಂಡ್, ನೇಪಾಳ, ಯೂಕ್ರೇನ್ ಸೇರಿದಂತೆ ಹಲವು ದೇಶಗಳಿಗೆ ಪ್ರಯಾಣಿಸುತ್ತಿದ್ದೆ ಎಂದು ತಿಳಿಸಿದ್ದಾರೆ.

ಇನ್ನು ಆಧ್ಯಾತ್ಮಿಕತೆ ಆಕೆಯನ್ನು ಪ್ರೇರೇಪಿಸಿದೆ ಎಂಬ ನಿರೂಪಣೆಯನ್ನು ತಿರಸ್ಕರಿಸಿದ ಕುಟಿನಾ, ಹೇಗೆ ಬರೆಯುತ್ತಾರೆ ಎಂಬುದು ಆಧ್ಯಾತ್ಮಿಕತೆಯ ಬಗ್ಗೆ ಅಲ್ಲ. ನಾವು ನೈಸರ್ಗಿಕತೆಯನ್ನು ಇಷ್ಟಪಡುತ್ತೇವೆ ಏಕೆಂದರೆ ಅದು ನಮಗೆ ಆರೋಗ್ಯವನ್ನು ನೀಡುತ್ತದೆ. ಇದು ತುಂಬಾ ದೊಡ್ಡ ಆರೋಗ್ಯ. ನೀವು ಮನೆಯಲ್ಲಿ ವಾಸಿಸುವಂತೆ ಅಲ್ಲ ಎಂದರು.

ತನ್ನ ಹೆಣ್ಣುಮಕ್ಕಳು ಆರಾಮದಾಯಕ ಮತ್ತು ಸಂತೋಷದಿಂದಿದ್ದಾರೆ. ನನ್ನ ಬಳಿ ಟೆಲಿಗ್ರಾಮ್ ಚಾನಲ್ ಇದೆ. ನಾವು ಗುಹೆಯಲ್ಲಿ ಏನು ಮಾಡುತ್ತೇವೆ ಎಂಬುದನ್ನು ರೆಕಾರ್ಡ್​ ಮಾಡಿ ಪೋಸ್ಟ್​ ಮಾಡುತ್ತೇವೆ. ನಮ್ಮಲ್ಲಿ ಫೋಟೋ, ವಿಡಿಯೋ ಎಲ್ಲ ಇದೆ. ನಾವು ರುಚಿಕರವಾದ ಆಹಾರವನ್ನು ಹೇಗೆ ಬೇಯಿಸುತ್ತೇವೆ? ನಾವು ಏನು ತಿನ್ನುತ್ತೇವೆ? ನಾವು ಹೇಗೆ ಪಾಠ ಮಾಡುತ್ತೇವೆ? ಕಲೆ, ಚಿತ್ರಕಲೆ ಮತ್ತು ಜೇಡಿಮಣ್ಣು ನಾವು ಮಾಡುವ ಎಲ್ಲವನ್ನೂ ನೀವು ನೋಡಬಹುದು ಎಂದು ಕುಟಿನಾ ಹೇಳಿದರು. (ಏಜೆನ್ಸೀಸ್​)

https://www.vijayavani.net/optical-illusion-challenge-only-the-smartest-feline-fans-can-solve-this-wardrobe-mystery

https://www.vijayavani.net/weight-loss-i-didnt-go-to-the-gym-i-didnt-starve-myself-the-young-woman-said-she-lost-18-kg-simply-this-is-the-secret