ಬೆಂಗಳೂರು: ವಿನೋದ್ ಪ್ರಭಾಕರ್ ಒಂದು ತೀರ್ವನಕ್ಕೆ ಬಂದಿದ್ದಾರೆ. ದೇಹ ದಂಡಿಸುವುದು, ಸಿಕ್ಸ್ ಅಥವಾ ಏಯ್್ಟ ಪ್ಯಾಕ್ ಮಾಡಿಕೊಳ್ಳುವುದು, ಕೊನೆಗೆ ತೆರೆಯ ಮೇಲೆ ದೇಹ ಪ್ರದರ್ಶಿಸುವುದು … ಇವೆಲ್ಲಕ್ಕೂ ಅವರು ಫುಲ್ಸ್ಟಾಪ್ ಹಾಕಿದ್ದಾರೆ. ಇನ್ನು ಮುಂದೆ ತಮ್ಮ ಬೇರ್ಬಾಡಿ ಪ್ರದರ್ಶಿಸದಿರುವುದಕ್ಕೆ ತೀರ್ವನಿಸಿದ್ದಾರೆ.
ವಿನೋದ್ ಇಂಥದ್ದೊಂದು ತೀರ್ವನಕ್ಕೆ ಬಂದಿರುವುದಕ್ಕೂ ಕಾರಣವಿದೆ. ಪ್ರಮುಖವಾಗಿ, ದೇಹ ದಂಡಿಸುವುದಕ್ಕೆ ಹೋಗಿ ಕೆಲವು ಆರೋಗ್ಯ ಸಂಬಂಧಿ ಸಮಸ್ಯೆಗಳನ್ನು ಅವರು ಮೈಮೇಲೆ ಎಳೆದುಕೊಂಡಿದ್ದಾರಂತೆ. ‘ವರ್ಷಗಟ್ಟಲೆ ಅನ್ನ, ನೀರು ಬಿಟ್ಟು ದೇಹ ರೂಪಿಸಿಕೊಂಡಿದ್ದೇನೆ. ಉಪ್ಪು-ಖಾರ ತಿನ್ನದೆಯೇ ಜೀವಿಸಿದ್ದೇನೆ. ಅದಕ್ಕೆ ಕಾರಣ, ತೆರೆಯ ಮೇಲೆ ಚೆನ್ನಾಗಿ ಕಾಣಿಸಿಕೊಳ್ಳಬೇಕು ಎಂಬ ಆಸೆ. ಆದರೆ, ಅದರಿಂದಲೇ ಸಮಸ್ಯೆಗಳಾಗಿದ್ದೂ ಉಂಟು. ಇದರಿಂದ ಮೂಳೆಗಳಿಗೆ ಸಾಕಷ್ಟು ಹಾನಿಯಾಗುತ್ತದೆ ಎಂದು ವೈದ್ಯರು ಎಚ್ಚರಿಸಿದ್ದಾರೆ. ಉಪು್ಪ-ಖಾರ ದೇಹಕ್ಕೆ ಆವಶ್ಯಕವಾಗಿದ್ದು, ಹಾಗೆಲ್ಲ ಅದನ್ನು ಸಂಪೂರ್ಣವಾಗಿ ಬಿಡಬಾರದು ಎಂದು ಹೇಳಿದ್ದಾರೆ. ಹಾಗಾಗಿ, ದೇಹವನ್ನು ತುಂಬ ದಂಡಿಸದೆಯೇ, ಚೆನ್ನಾಗಿ ಇಟ್ಟುಕೊಳ್ಳುವ ಬಗ್ಗೆ ಹೆಚ್ಚು ಗಮನಹರಿಸುತ್ತೇನೆ. ಸಿಕ್ಸ್ಪ್ಯಾಕ್ ಮಾಡಿ ಪ್ರದರ್ಶಿಸುವುದಿಲ್ಲ’ ಎನ್ನುತ್ತಾರೆ ವಿನೋದ್.
ಅಂದಹಾಗೆ, ಅವರು ಮಾತನಾಡಿದ್ದು ‘ಶ್ಯಾಡೋ’ ಚಿತ್ರದ ಪತ್ರಿಕಾಗೋಷ್ಠಿಯಲ್ಲಿ. ಈ ಚಿತ್ರ ಫೆಬ್ರವರಿ 5ರಂದು ರಾಜ್ಯಾದ್ಯಂತ ಬಿಡುಗಡೆಯಾಗುತ್ತಿದೆ. ಬಿಡುಗಡೆಗೆ ಇನ್ನು 15 ದಿನಗಳಷ್ಟೇ ಉಳಿದಿದ್ದು, ಚಿತ್ರ ಆತುರಾತುರವಾಗಿ ಬಿಡುಗಡೆಯಾಗುತ್ತಿರುವ ಬಗ್ಗೆ ಅವರಿಗೆ ಬೇಸರವಿದೆ. ಈ ಕುರಿತು ಮಾತನಾಡುವ ಅವರು, ‘ಈ ಚಿತ್ರ 2018ರಲ್ಲೇ ಶುರುವಾಗಿದ್ದು, ಈಗ ಬಿಡುಗಡೆಯಾಗುತ್ತಿದೆ. ಇಷ್ಟು ದಿನ ಕಾದು, ಈಗ ಅವಸರವಸರವಾಗಿ ಯಾವುದೇ ಪ್ರಚಾರವಿಲ್ಲದೆ ಬಿಡುಗಡೆ ಮಾಡಿದರೆ ಹೇಗೆ?’ ಎಂದು ಪ್ರಶ್ನಿಸುತ್ತಾರೆ.