ಬಹುಜನರನ್ನು ಕಾಡುವ ಬವಣೆಗಳಲ್ಲಿ ಆರೋಗ್ಯ ಸಮಸ್ಯೆಗಳದ್ದೇ ಸಿಂಹಪಾಲು. ಸಮಸ್ಯೆಗಳಿಗೆ ಉತ್ತರವನ್ನು ಸೂಚಿಸಲು ಎಲ್ಲರಿಗೂ ಆಸಕ್ತಿಯಿರುತ್ತದೆ. ಹೀಗಾಗಿಯೇ ತಮ್ಮ ಸಮೀಪದ ಬಂಧುಗಳಿಗೆ ಆರೋಗ್ಯದಲ್ಲಿ ಏರುಪೇರಾದರೆ ಹಲವಾರು ಸಲಹೆಗಳನ್ನು ಒಬ್ಬರೇ ನೀಡುತ್ತಾರೆ! ಯಾವ ವೈದ್ಯರಲ್ಲಿಗೆ ಹೋಗಬಹುದು, ಯಾವ ಚಿಕಿತ್ಸೆ ಉಪಕಾರಿ ಇತ್ಯಾದಿ ಸಲಹೆಯೊಂದಿಗೆ ತಮಗೆ ಗೊತ್ತಿರುವ ಒಂದೆರಡು ಚಿಕಿತ್ಸೆಯನ್ನೂ ಹಂಚಿಕೊಳ್ಳುತ್ತಾರೆ. ಹಿರಿಯರಿಂದ ಬಂದಿರುವ ಮನೆಮದ್ದನ್ನೂ ಸೂಚಿಸುತ್ತಾರೆ! ವಿಶೇಷವೆಂದರೆ ಇಷ್ಟೆಲ್ಲಾ ಹೇಳಿದವರು ವೈದ್ಯರೂ ಅಲ್ಲ, ವೈದ್ಯಕೀಯ ಕ್ಷೇತ್ರದವರೂ ಅಲ್ಲ. ಆದರೂ ಎಷ್ಟೊಂದು ಬಗೆಯ ವೈದ್ಯ ಸಲಹೆಗಳು! ಕಾರಣ ತೀರಾ ಸರಳ. ಪ್ರತಿಯೊಬ್ಬರಲ್ಲೂ ಮಾನವ ಜೀವಿಗಳ ಒಳಿತಿಗಾಗಿಯೇ ಇರುವ ಕರುಣಾ ರಸದಿಂದಲೇ ಹುಟ್ಟಿಕೊಂಡ ವೈದ್ಯತನ ಹಾಸುಹೊಕ್ಕಾಗಿರುತ್ತದೆ. ಸಮಾಜದಲ್ಲಿ ವೈದ್ಯವೃತ್ತಿಗೆ ಅಪಾರವಾದ ಗೌರವವಿದೆ, ಹಲವಾರು ವಿಶೇಷತೆಗಳೂ ಇವೆ, ಹೆಚ್ಚಿನ ಜವಾಬ್ದಾರಿಯೂ ಇದೆ. ಇದಕ್ಕಾಗಿಯೇ ಆಯುರ್ವೆದದ ಗ್ರಂಥಗಳೆಲ್ಲಾ ಚಿಕಿತ್ಸೆಯನ್ನಷ್ಟೇ ಹೇಳಿಲ್ಲ, ಚಿಕಿತ್ಸೆಯಲ್ಲಿ ಪ್ರಧಾನ ಪಾತ್ರವಿರುವ ವೈದ್ಯರ ಪ್ರಾಮುಖ್ಯತೆ, ಜವಾಬ್ದಾರಿ, ಕರ್ತವ್ಯ, ನಡತೆ, ಕಾರ್ಯವಿಧಾನ, ಶ್ರೇಷ್ಠತೆಗಳ ಬಗ್ಗೆ ಸೂಕ್ಷ್ಮವಾಗಿ ಹಾಗೂ ಸೊಗಸಾಗಿ ವಿವರಿಸಿವೆ.
