ಕರಾವಳಿಯವರಿಗೆ ತುಳು ಮಾತೃಭಾಷೆ. ಕಯ್ಯಾರ ಕಿಂಞ್ಞಣ್ಣ ರೈಯವರು ತುಳುವರಿಗೆ ಇಬ್ಬರು ತಾಯಂದಿರು ಎಂದು ಬಣ್ಣಿಸಿದ್ದಾರೆ. ಒಂದು ಜನ್ಮ ಕೊಟ್ಟ ತಾಯಿ ಇನ್ನೊಂದು ಸಾಕಿ ಸಲಹಿದ ತಾಯಿ ಎಂದು ಹೇಳುತ್ತಿದ್ದರು. ದೇವಕಿ ಕೃಷ್ಣನಿಗೆ ಜನ್ಮಕೊಟ್ಟವಳಾದರೂ ಯಶೋದೆ ಬೆಳೆಸಿದವಳು. ತುಳುವರಿಗೆ ಜನ್ಮ ನೀಡಿ, ಬೆಳೆಸಿದ್ದು ಮಾತೃಭಾಷೆಯಾದ ತುಳು, ಆದರೆ ಶಿಕ್ಷಣ, ವ್ಯಾವಹಾರಿಕ ಜ್ಞಾನ, ವ್ಯಕ್ತಿತ್ವ ರೂಪಿಸಿ ಕೊಟ್ಟದ್ದು ಕನ್ನಡ ಭಾಷೆ. ಈ ಎರಡೂ ಮಾತೆಯರನ್ನು ನಾವು ರಕ್ಷಣೆ ಮಾಡಬೇಕಾಗಿದೆ. India will conquer her conquerors culturally not politically ಇದು ಅರ್ನಾಲ್ಡ್ ಟ್ಯಾಂನ್ಬೆ ಹೇಳಿದ ಮಾತು ಸ್ಮರಣೀಯ. ನಮ್ಮ ಶತ್ರುಗಳು ಹಾಗೂ ನಮ್ಮನ್ನು ಯಾರು ಆಕ್ರಮಿಸಿಕೊಳ್ಳಬೇಕು ಎಂದು ಹೇಳುತ್ತಾರೋ, ಅವರನ್ನು ನಾವು ಆಕ್ರಮಿಸಬಹುದು, ಸೋಲಿಸಬಹುದು. ಹೇಗೆಂದರೆ ಸಾಂಸ್ಕೃತಿಕವಾಗಿ. ರಾಜಕೀಯವಾಗಿ ಅಥವಾ ಯುದ್ಧದ ಶಕ್ತಿಯಿಂದಲ್ಲ. ಬದಲಾಗಿ ಸಾಂಸ್ಕೃತಿಕವಾಗಿ ನಮ್ಮನ್ನ ನಾವು ಸದೃಢಪಡಿಸಿಕೊಂಡರೆ ನಮ್ಮ ಮೇಲೆ ಆಗಬಹುದಾದ ಆಘಾತವನ್ನು ನಾವು ಎದುರಿಸಬಹುದು ಎಂದು ಹೇಳುತ್ತಾರೆ. ಅಭಿಮಾನ ಸಾಹಿತಿಗಳ ಮೇಲೆ ಇದ್ದರೆ ಸಾಲದು ಅವರ ಸಾಹಿತ್ಯದ ಮೇಲಿರಬೇಕು. ಅಧ್ಯಯನ ಆಸಕ್ತಿಯನ್ನು ರೂಢಿಸಿಕೊಳ್ಳಬೇಕು. ಯುವಕರಲ್ಲಿ ಸಾಹಿತ್ಯದ ಮೇಲೆ ಅಭಿಮಾನ, ಭಕ್ತಿ ಇದ್ದಾಗ ಸಾಹಿತ್ಯಾವಲೋಕನದ ಕಡೆ ಮನಸ್ಸು ಹರಿದಾಗ ಖಂಡಿತವಾಗಿಯೂ ನಮ್ಮ ಯುವಸಮಾಜ ಏಳಿಗೆಯನ್ನು ಸಾಧಿಸುತ್ತದೆ. ಆದ್ದರಿಂದ ‘ನಾನು ಬುದ್ಧಿವಂತ, ನಾನು ಹೇಳುವ ಮಾತೇ ಅಂತಿಮ, ನನ್ನ ಮಾತು ಕೇಳುವವರು ಮಾತ್ರ ನೀವು, ಹೇಳುವವನು ನಾನು’ ಎನ್ನುವ ಭಾವನೆ ಬರಬಾರದು. ನಾವೆಲ್ಲರೂ ಸೇರಿ ಸಾಹಿತ್ಯ, ಸಂಸ್ಕೃತಿಯ ತೇರನ್ನು ಎಳೆಯುವ ಕಾರ್ಯವನ್ನು ಮಾಡಬೇಕು.
