ರಾಜಾಂಗಣದಲ್ಲಿ 'ವೀಣಾ ತ್ರಿಂಶತ್​' ಉತ್ಸವ...

ಕಲಾಸ್ಪಂದನದ 30ನೇ ವಾರ್ಷಿಕೋತ್ಸವ

ವಾಯಲಿನ್​ ಹಿರಿಯ ಸಾಧಕರಿಗೆ ಸನ್ಮಾನ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಮಣಿಪಾಲದ ಡಾ. ಪಳ್ಳತ್ತಡ್ಕ ಕೇಶವ ಭಟ್​ ಮೆಮೋರಿಯಲ್​ ಟ್ರಸ್ಟ್​ನ ವೀಣಾ ಕಲಿಕೆಯ ಸಂಸ್ಥೆಯಾದ ಕಲಾಸ್ಪಂದನದ 30ನೇ ವಾರ್ಷಿಕೋತ್ಸವದ ನಿಮಿತ್ತ ಉಡುಪಿಯ ರಾಜಾಂಗಣದಲ್ಲಿ ಪರ್ಯಾಯ ಪುತ್ತಿಗೆ ಮಠದ ಆಶ್ರಯದಲ್ಲಿ ಇತ್ತೀಚೆಗೆ ವೀಣಾ ತ್ರಿಂಶತ್​ ಕಾರ್ಯಕ್ರಮ ನಡೆಯಿತು.

ಸುಗುಣೇಂದ್ರ ತೀರ್ಥ ಶ್ರೀಪಾದರು ಸಾನ್ನಿಧ್ಯ ವಹಿಸಿ ಆಶೀರ್ವಚನ ನೀಡಿದರು. ಹಿರಿಯರಾದ ಲೀಲಾ ಆಚಾರ್​, ದೇವಕಿ ಕೆ. ಭಟ್​, ಶೈಲಾ ರಾವ್​, ಸ್ನೇಹಪ್ರಭಾ ಮತ್ತು ಶಂಕರಿ ಭಟ್​ ಪಂಚಮಾತೆಯರಾಗಿ ಕಾರ್ಯಕ್ರಮ ಉದ್ಘಾಟಿಸಿದರು.

ದೇವತೆಯರಾದ ಸರಸ್ವತಿ, ಲಲಿತಾ ಹಾಗೂ ರುದ್ರ, ರಾಘವೇಂದ್ರ ಸ್ವಾಮಿ, ಹನುಮನ ವೇಷ-ಭೂಷಣ ತೊಟ್ಟು ವೀಣಾ ಪ್ರಸ್ತುತಿ, ಸಾಮವೇದ ವೀಣಾ ನಾದ, ಬಾಲಾಂಜನೇಯನಿಂದ ವೀಣಾ ವಾದನ, ನೃತ್ಯದಲ್ಲಿ ವೀಣಾ ನಾದ, ಪಂಚವೀಣೆ ಮತ್ತು ವಿದ್ಯಾರ್ಥಿಗಳಿಂದ ವೀಣಾ ವಾದನ ಹೀಗೆ ವೀಣೆಯಲ್ಲಿನ ವಿವಿಧ ಸಾಧ್ಯತೆಗಳನ್ನು ಪ್ರಸ್ತುತ ಪಡಿಸಲಾಯಿತು.

ಕಲಾಸ್ಪಂದನದ ಶಿಕ್ಷಕರಾದ ವಿದುಷಿ ಪವನಾ ಬಿ. ಆಚಾರ್​ ಮತ್ತು ಡಾ. ಬಾಲಚಂದ್ರ ಆಚಾರ್​ ಕಾರ್ಯಕ್ರಮ ಸಂಯೋಜಿಸಿ ನಿರ್ದೇಶಿಸಿದರು.

ಟ್ರಸ್ಟ್​ನ ದೇವಕಿ ಕೆ. ಭಟ್​, ಡಾ. ಅನಸೂಯಾದೇವಿ ಉಪಸ್ಥಿತರಿದ್ದರು. ಶಿಲ್ಪಾ ಜೋಶಿ ಕಾರ್ಯಕ್ರಮ ನಿರ್ವಹಿಸಿದರು.