ಅಕ್ಟೋಬರ್​ ಅಂತ್ಯಕ್ಕೆ ಕರೊನಾ ಲಸಿಕೆ ವಿತರಣೆಗೆ ಸಿದ್ಧತೆ ಮಾಡಿಕೊಳ್ಳಿ; 50 ರಾಜ್ಯಗಳಿಗೆ ಸೂಚನೆ ನೀಡಿದ್ಯಾರು?

ಕರೊನಾ ಲಸಿಕೆ ಸಂಶೋಧನೆ ಈಗ ಆಯಾ ದೇಶಗಳಲ್ಲಿ ರಾಜಕೀಯವಾಗಿಯೂ ಅತ್ಯಂತ ಪ್ರಮುಖ ಎನಿಸಿಕೊಂಡಿದೆ. ಈ ಕಾರಣಕ್ಕೆ ತಮ್ಮ ಅಧಿಕಾರವಧಿಯಲ್ಲಿ ಸಿದ್ಧವಾಗಬೇಕೆಂಬ ಕಾರಣಕ್ಕೆ ಅದರಲ್ಲೂ ಚುನಾವಣೆ ನಡೆಯಲಿರುವ ಪ್ರದೇಶಗಳಲ್ಲಿ ಕರೊನಾ ಲಸಿಕೆಗೆ ಭಾರಿ ಬೇಡಿಕೆ ಬಂದಿದೆ.

ಅಂತೆಯೇ, ಅಧ್ಯಕ್ಷೀಯ ಚುನಾವಣೆ ನಡೆಯುತ್ತಿರುವ ನಡೆಯುತ್ತಿರುವ ಅಮೆರಿಕದಲ್ಲಂತೂ ಮರು ಆಯ್ಕೆ ಬಯಸಿರುವ ಡೊನಾಲ್ಡ್​ ಟ್ರಂಪ್​ ಮತದಾನಕ್ಕೂ ಮುನ್ನ ಜನರಿಗೆ ಲಸಿಕೆ ತಲುಪಿಸಲೇಬೇಕು ಎಂಬ ಆಕಾಂಕ್ಷೆ ಹೊಂದಿದ್ದಾರೆ. ಇದು ಅವರ ಮರು ಆಯ್ಕೆ ಮೇಲೆ ಭಾರಿ ಪ್ರಭಾವ ಬೀರಲಿರುವುದು ಕೂಡ ಅಷ್ಟೇ ಸತ್ಯ.

ನವೆಂಬರ್​ನಲ್ಲಿ ಅಮೆರಿಕ ಅಧ್ಯಕ್ಷೀಯ ಚುನಾವಣೆ ನಡೆಯಲಿದೆ. ಹೀಗಾಗಿ ಅಕ್ಟೋಬರ್​ ಅಂತ್ಯದ ವೇಳೆಗೆ ಶತಾಯಗತಾಯ ಕರೊನಾ ಲಸಿಕೆಯನ್ನು ಸಾರ್ವಜನಿಕ ಬಳಕೆಗೆ ಲಭ್ಯವಾಗುವಂತೆ ನೋಡಿಕೊಳ್ಳಬೇಕು ಎನ್ನುವುದು ಟ್ರಂಪ್​ ಉದ್ದೇಶ. ಇದಕ್ಕಾಗಿ ಅಮೆರಿಕ ಸರ್ಕಾರ ಈಗಾಗಲೇ ಸಾವಿರಾರು ಕೋಟಿ ಡಾಲರ್​ಗಳನ್ನು ವ್ಯಯಿಸಿದೆ.

ಇದನ್ನೂ ಓದಿ; ಬಸ್​​ನಲ್ಲಿದ್ದ ವ್ಯಕ್ತಿಯಿಂದ 23 ಪ್ರಯಾಣಿಕರಿಗೆ ಕರೊನಾ ಸೋಂಕು; ಗಾಳಿಯಿಂದ ಹರಡುತ್ತಿದೆ ಎನ್ನಲು ಇದುವೇ ನಿದರ್ಶನ?

ಅಂತೆಯೇ, ಅಮೆರಿಕದ ಕಾಯಿಲೆ ತಡೆ ಹಾಗೂ ನಿಯಂತ್ರಣ ಕೇಂದ್ರವು (CDC)ಸೋಂಕು ತಗಲುವ ಸಂಭಾವ್ಯತೆ ಹೆಚ್ಚಾಗಿರುವ (ಹೈ-ರಿಸ್ಕ್​) ಜನರಿಗೆ ಕರೊನಾ ಲಸಿಕೆ ನೀಡಲು ಸಿದ್ಧತೆ ಮಾಡಿಕೊಳ್ಳುವಂತೆ ರಾಜ್ಯ ಆರೋಗ್ಯಾಧಿಕಾರಿಗಳಿಗೆ ಸೂಚನೆ ನೀಡಿದೆ. ವಿತರಣಾ ಕೇಂದ್ರದ ಸ್ಥಾಪನೆಗೆ ಸಂಸ್ಥೆಯೊಂದರ ಜತೆಗೆ ಒಪ್ಪಂದಕ್ಕೆ ಸಹಿ ಹಾಕಲಾಗಿದೆ. ಈ ಕುರಿತ ದಾಖಲೆಗಳನ್ನು ಬಹಿರಂಗಪಡಿಸಲಾಗಿದೆ.

ಅಕ್ಟೋಬರ್​ ಹಾಗೂ ನವೆಂಬರ್​ನಲ್ಲಿ ಸೀಮಿತ ಪ್ರಮಾಣದಲ್ಲಿ ಲಸಿಕೆ ಲಭ್ಯವಾಗುವ ಸಾಧ್ಯತೆ ಇದೆ. ರಾಜ್ಯಗಳ ಬೇಡಿಕೆ ಹಾಗೂ ಸ್ಥಿತಿಗೆ ಅನುಗುಣವಾಗಿ ಆರಂಭಿಕ ಹಂತದ ಯೋಜನೆ ರೂಪಿಸಲು ಸೂಚಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಕರೊನಾ ಲಸಿಕೆ ವಿತರಣೆ ವಿಚಾರವಾಗಿ ಅಮೆರಿಕದ ಎಲ್ಲ 50 ರಾಜ್ಯಗಳು ಹಾಗೂ 5 ಪ್ರಮುಖ ನಗರಗಳ ಅಧಿಕಾರಿಗಳನ್ನು CDC ಅಧಿಕಾರಿಗಳು ಸಂಪರ್ಕಿಸಿದ್ದಾರೆ ಎಂದು ಮಾಧ್ಯಮಗಳು ಕೂಡ ವರದಿ ಮಾಡಿವೆ.

ಅಮೆರಿಕದಲ್ಲಿ ಈಗಾಗಲೇ ಹಲವು ಲಸಿಕೆಗಳು ಮಾನವರ ಮೇಲಿನ ಪ್ರಯೋಗದಲ್ಲಿ ಅಂತಿಮ ಹಂತದಲ್ಲಿವೆ. ಅಕ್ಟೋಬರ್​ ಅಥವಾ ನವೆಂಬರ್​ ವೇಳೆಗೆ ಕನಿಷ್ಠ ಒಂದು ಲಸಿಕೆ ಬಳಕೆಗೆ ಸುರಕ್ಷಿತ ಹಾಗೂ ಪರಿಣಾಮಕಾರಿ ಎಂಬುದಕ್ಕೆ ಅಗತ್ಯ ಕ್ಲಿನಿಕಲ್​ ಮಾಹಿತಿ ಲಭ್ಯವಾಗಲಿದೆ ಎಂದು ಸಾಂಕ್ರಾಮಿಕ ರೋಗಗಳ ತಜ್ಞ ಡಾ. ಅಂಥೋನಿ ಫೌಸಿ ಹೇಳಿದ್ದಾರೆ.

ಇದನ್ನೂ ಓದಿ; ವಿಮಾನ ಯಾನ ಸಿಬ್ಬಂದಿಗೆ ಕರೊನಾ ವೈರಸ್​ ನಿಗ್ರಹ ಲಸಿಕೆ ನೀಡುತ್ತಿದೆ ಚೀನಾ…!

ಅಮೆರಿಕದ್ದೇ ಆದ ಮಾಡೆರ್ನಾ ಲಸಿಕೆಯನ್ನು 30 ಸಾವಿರಕ್ಕೂ ಅಧಿಕ ಜನರ ಮೇಲೆ ಪ್ರಯೋಗಿಸಲಾಗಿದೆ. ಜತೆಗೆ, ಇಂಗ್ಲೆಂಡ್​ನ ಆಕ್ಸ್​ಫರ್ಡ್​ ವಿವಿಯ ಮತ್ತೊಂದು ಲಸಿಕೆ ಕೂಡ ಒಟ್ಟಾರೆ 50 ಸಾವಿರ ಜನರ ಮೇಲೆ ಪ್ರಯೋಗಕ್ಕೆ ಒಳಗಾಗಿದೆ. ಇವೆರಡರ ಮೇಲೆಯೇ ಭಾರಿ ಭರವಸೆ ಇಡಲಾಗಿದೆ. ಅಲ್ಲಿಗೆ ಅಕ್ಟೋಬರ್​ ಅಂತ್ಯಕ್ಕೆ ಕನಿಷ್ಠ ಒಂದು ಲಸಿಕೆ ಅಮೆರಿಕನ್ನರ ಬಳಕೆಗೆ ಲಭ್ಯವಾಗುವುದು ಖಚಿತ ಎನಿಸಲಿದೆ.

https://www.vijayavani.net/pilots-report-man-in-jetpack-flying-3000-ft-in-the-air/