ಆರೋಗ್ಯ ಕಾಳಜಿಯಿಂದ ಕಾರ್ಯಕ್ಷಮತೆ ಹೆಚ್ಚಳ

ಉಡುಪಿ: ಪೊಲೀಸರ ಆರೋಗ್ಯ ಕಾಪಾಡುವುದು ಕೂಡ ಇಲಾಖೆ ಉದ್ದೇಶವಾಗಿದೆ. ಇದರಿಂದ ಕಾರ್ಯಕ್ಷಮತೆಯೂ ಉತ್ತಮವಾಗಲಿದೆ. ಪೊಲೀಸರು ಆರೋಗ್ಯ ಕಡೆಗೂ ಗಮನಹರಿಸಬೇಕು ಎಂದು ಜಿಲ್ಲಾ ಪೊಲೀಸ್​ ವರಿಷ್ಠಾಧಿಕಾರಿ ಹರಿರಾಮ್​ ಶಂಕರ್​ ತಿಳಿಸಿದರು.

ಬುಧವಾರ ಅಮ್ಮಣ್ಣಿ ರಾಮಣ್ಣ ಶೆಟ್ಟಿ ಮೆಮೋರಿಯಲ್​ ಆಡಿಟೋರಿಯಂನಲ್ಲಿ ಜಿಲ್ಲಾ ಪೊಲೀಸ್​ ಹಾಗೂ ಪರೀಕ ಸೌಖ್ಯವನದ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಯೋಗ ಮತ್ತು ಪ್ರಕೃತಿ ಚಿಕಿತ್ಸಾ ಆಸ್ಪತ್ರೆಯ ಸಹಭಾಗಿತ್ವದಲ್ಲಿ ನಡೆದ ನವಚೇತನ ಶಿಬಿರದ ಸಮಾರೋಪದಲ್ಲಿ ಅವರು ಮಾತನಾಡಿದರು.

ಪೊಲೀಸ್​ ಸಿಬಂದಿಗೆ ಕರ್ತವ್ಯದಲ್ಲಿ ಹಲವು ಒತ್ತಡಗಳಿವೆ. ವಿಐಪಿಗಳ ಆಗಮನದ ಸಂದರ್ಭ ಊಟ&ತಿಂಡಿ ಬಿಟ್ಟು ಕೆಲಸ ಮಾಡಬೇಕಾಗುತ್ತದೆ. ಕೆಲಸದ ಒತ್ತಡದಿಂದ ಬೊಜ್ಜು ಹಾಗೂ ಕಾಯಿಲೆಗಳು ಬರುವುದು ಸಹಜ. ಈ ಸಮಸ್ಯೆಗಳ ಪರಿಹಾರಕ್ಕಾಗಿ ಆರೋಗ್ಯ ಶಿಬಿರಗಳನ್ನು ಆಯೋಜಿಸಲಾಗಿದೆ ಎಂದರು.

ಚಲನಚಿತ್ರ ನಟ ಪ್ರಮೋದ್​ ಶೆಟ್ಟಿ ಮಾತನಾಡಿದರು. ಅಂತಾರಾಷ್ಟ್ರೀಯ ಕ್ರೀಡಾಪಟು ಅಭಿನ್​ ದೇವಾಡಿಗ, ಧರ್ಮಸ್ಥಳದ ಎಸ್​ಡಿಎಂ ಶಾಂತಿವನ ಟ್ರಸ್ಟ್​ ಕಾರ್ಯದರ್ಶಿ ಬಿ.ಸೀತಾರಾಮ ತೋಳ್ಪಾಡಿತ್ತಾಯ, ಪರೀಕ ಸೌಖ್ಯವನದ ಮುಖ್ಯವೈದ್ಯಾಧಿಕಾರಿ ಡಾ. ಗೋಪಾಲ್​ ಪೂಜಾರಿ, ಹೆಚ್ಚುವರಿ ಪೊಲೀಸ್​ ವರಿಷ್ಠಾಧಿಕಾರಿ ಸುಧಾಕರ್​ ಎಸ್​.ನಾಯ್ಕ್​ ಉಪಸ್ಥಿತರಿದ್ದರು. ರೋಹಿತ್​ ಕುಮಾರ್​ ಪ್ರಸ್ತಾವನೆಗೈದರು. ಯೋಗೀಶ್​ ನಿರೂಪಿಸಿದರು.