ಬೆಂಗಳೂರಿನಲ್ಲಿ ಮತ್ತಿಬ್ಬರಲ್ಲಿ ಕರೊನಾ ಸೋಂಕು ಧೃಡ; ಕಲಬುರಗಿಯಲ್ಲಿ ಆರಂಭವಾಗಲಿದೆ ಕರೊನಾ ಲ್ಯಾಬ್​

ಬೆಂಗಳೂರು: ಚೀನಾದಿಂದ ಭಾರತ ಮತ್ತು ಇತರೆ ದೇಶಗಳಿಗೆ ಬಂದಿರುವ ಕರೊನಾ ಸೋಂಕಿತರ ಸಂಖ್ಯೆ ದಿನದಿಂದ ದಿನಕ್ಕೆ ಹೆಚ್ಚಳ ಕಾಣುತ್ತಿದೆ. ರಾಜ್ಯ ರಾಜಧಾನಿಯಲ್ಲಿ ಇಂದು ಮತ್ತಿಬ್ಬರಲ್ಲಿ ಸೋಂಕು ಪತ್ತೆಯಾಗಿದ್ದು, ಸೋಂಕಿತರ ಸಂಖ್ಯೆ 13ಕ್ಕೆ ಏರಿಕೆಯಾಗಿದೆ. ಈ ಮೂಲಕ ಕರ್ನಾಟಕ ದೇಶದಲ್ಲಿ ಅತಿ ಹೆಚ್ಚು ವೈರಸ್​ ದಾಳಿಗೆ ಒಳಗಾದ ರಾಜ್ಯಗಳ ಪೈಕಿ ನಾಲ್ಕನೇ ಸ್ಥಾನದಲ್ಲಿ ಕಾಣಿಸಿಕೊಂಡಿದೆ.

ಯುಎಸ್​ಎ ಪ್ರವಾಸ ಮುಗಿಸಿ ಭಾರತಕ್ಕೆ ಮಾರ್ಚ್​ 6ರಂದು ಹಿಂದಿರುಗಿದ್ದ 56 ವರ್ಷ ವಯಸ್ಸಿನ ವ್ಯಕ್ತಿಯಲ್ಲಿ ಸೋಂಕಿರುವುದು ಧೃಡವಾಗಿದೆ. 25 ವರ್ಷದ ಮಹಿಳೆಯೊಬ್ಬರು ಸ್ಪೇನ್​ನ ಪ್ರವಾಸ ಕೈಗೊಂಡು ಬೆಂಗಳೂರಿಗೆ ಮರಳಿದ್ದು ಆಕೆಯಲ್ಲಿಯೂ ಸಹ ಸೋಂಕಿರುವುದು ಧೃಡವಾಗಿದೆ. ಸದ್ಯ ಇಬ್ಬರನ್ನು ಆಸ್ಪತ್ರೆಯಲ್ಲಿ ಪ್ರತ್ಯೇಕಿಸಿಟ್ಟು ಚಿಕಿತ್ಸೆ ನೀಡಲಾಗುತ್ತಿದೆ ಎಂದು ರಾಜ್ಯ ಆರೋಗ್ಯ ಸಚಿವ ಶ್ರೀ ರಾಮುಲು ತಿಳಿಸಿದ್ದಾರೆ.

ಕಲಬುರಗಿಯಲ್ಲಿ ಸೋಂಕಿತನೊಬ್ಬ ಮರಣ ಹೊಂದಿದ್ದು, ಆತನ ಕುಟುಂಬದ ಒಬ್ಬರಿಗೆ ಮತ್ತು ಆತನಿಗೆ ಚಿಕಿತ್ಸೆ ನೀಡಿದ ವೈದ್ಯರಿಗೆ ಸೋಂಕು ತಗುಲಿರುವುದು ಧೃಡವಾಗಿದೆ. ಜಿಲ್ಲೆಯಲ್ಲಿ ಸೋಂಕಿನ ಭಯ ಹೆಚ್ಚಾಗಿರುವ ಕಾರಣ ಕರೊನಾ ಸೋಂಕು ಪತ್ತೆ ಹಚ್ಚುವ ಲ್ಯಾಬ್​ ನಿರ್ಮಾಣ ಮಾಡುವುದಾಗಿ ಸಚಿವರು ತಿಳಿಸಿದ್ದಾರೆ. ಇನ್ನು ಮೂರು ನಾಲ್ಕು ದಿನದಲ್ಲಿ ಲ್ಯಾಬ್​ ಆರಂಭ ಮಾಡಲಾಗುತ್ತದೆ ಎಂದು ಅವರು ತಿಳಿಸಿದ್ದಾರೆ. ತಮಗೆ ಕರೊನಾ ಇದೆಯೋ ಇಲ್ಲವೋ ಎನ್ನುವುದನ್ನು ತಿಳಿದುಕೊಳ್ಳಲು ಉತ್ತರ ಕರ್ನಾಟಕದ ಜನ ಎರಡು ಮೂರು ದಿನ ಕಾಯುವ ಸಮಸ್ಯೆಯನ್ನು ತಪ್ಪಿಸುವ ಸಲುವಾಗಿ ಅತ್ಯಾಧುನಿಕ ಲ್ಯಾಬ್​ನ್ನು ಕಲಬುರಗಿಯಲ್ಲಿ ನಿರ್ಮಿಸುವುದಾಗಿ ತಿಳಿಸಲಾಗಿದೆ.

ರಾಜ್ಯದಲ್ಲಿ ಐದು ಕೇಂದ್ರಗಳಲ್ಲಿ ಕರೊನಾ ಟೆಸ್ಟಿಂಗ್​ ನಡೆಯುತ್ತಿದ್ದು ಅವುಗಳ ವಿವರ ಇಲ್ಲಿದೆ.

•  ಬೆಂಗಳೂರು ಮೆಡಿಕಲ್​ ಕಾಲೇಜು ಮತ್ತು ರಿಸರ್ಚ್​ ಇನ್​ಸ್ಟಿಟ್ಯೂಟ್​, ಬೆಂಗಳೂರು
•  ನ್ಯಾಷನಲ್​ ಇನ್​ಸ್ಟಿಟ್ಯೂಟ್​ ಆಫ್​ ವೈರಾಲಜಿ ಫೀಲ್ಡ್​ ಯುನಿಟ್​, ಬೆಂಗಳೂರು
•  ಮೈಸೂರು ಮೆಡಿಕಲ್​ ಕಾಲೇಜು ಮತ್ತು ರಿಸರ್ಚ್​ ಸೆಂಟರ್​, ಮೈಸೂರು
•  ಹಾಸನ ಇನ್​​ಸ್ಟಿಟ್ಯೂಟ್​ ಆಫ್​ ಮೆಡಿಕಲ್​ ಸೈನ್ಸ್​, ಹಾಸನ
•  ಶಿಮೊಗ್ಗ ಇನ್​​ಸ್ಟಿಟ್ಯೂಟ್​ ಆಫ್​ ಮೆಡಿಕಲ್​ ಸೈನ್ಸ್​, ಶಿವಮೊಗ್ಗ

https://www.vijayavani.net/some-factors-about-coronavirus-explained-by-doctor/