ಸೀಟು ಮಗುವಿನದ್ದು, ಕುಳಿತಿದ್ದು ಚಪ್ಪಲಿ! ವೈರಲ್ ವಿಡಿಯೋ ನೋಡಿ ನೆಟ್ಟಿಗರು ಗರಂ ಆಗಿದ್ದೇಕೆ? Viral

ನಮ್ಮ ದೇಶದಲ್ಲಿ ರೈಲು ಪ್ರಯಾಣ ಅಂದರೆ ಬರೀ ಒಂದು ಊರಿನಿಂದ ಇನ್ನೊಂದು ಊರಿಗೆ ಹೋಗುವ ಪಯಣವಲ್ಲ; ಅದೊಂದು ಭಾವನೆಗಳ ಸಂತೆ. ಕಿಟಕಿಯ ಪಕ್ಕದ ಸೀಟು ಹಿಡಿಯುವ ಪೈಪೋಟಿ, ಬಿಸಿಬಿಸಿ ಚಹಾ, ಸಹಪ್ರಯಾಣಿಕರ ಹರಟೆ ಹೀಗೆ ಹತ್ತು ಹಲವಾರು ನೆನಪುಗಳು ಅಲ್ಲಿರುತ್ತವೆ. ಆದರೆ, ಇತ್ತೀಚೆಗೆ 'ವಂದೇ ಭಾರತ್' ಎಕ್ಸ್‌ಪ್ರೆಸ್ ರೈಲಿನಲ್ಲಿ ನಡೆದ ಒಂದು ಘಟನೆ ಮಾತ್ರ ಈಗ ಸಾಮಾಜಿಕ ಮಾಧ್ಯಮಗಳಲ್ಲಿ ಸಖತ್​ ವೈರಲ್​ (Viral) ಆಗುತ್ತಿದೆ.

ಇತ್ತೀಚೆಗೆ ಮಹಿಳೆಯೊಬ್ಬರು ಇನ್‌ಸ್ಟಾಗ್ರಾಮ್‌ನಲ್ಲಿ ವಿಡಿಯೋ ಒಂದನ್ನು ಹಂಚಿಕೊಂಡಿದ್ದಾರೆ. ವಿಡಿಯೋದಲ್ಲಿ ಆಕೆ ತನ್ನ ಕುಟುಂಬದ ಜೊತೆ ವಂದೇ ಭಾರತ್ ರೈಲಿನಲ್ಲಿ ಪ್ರಯಾಣಿಸುತ್ತಿರುತ್ತಾರೆ. ತಮಗಾಗಿ, ಪತಿಗಾಗಿ ಮತ್ತು ಪುಟ್ಟ ಮಗುವಿಗಾಗಿ ಅವರು ಮೂರು ಸೀಟುಗಳನ್ನು ಬುಕ್ ಮಾಡಿರುತ್ತಾರೆ.

ವಿಡಿಯೋ ಆರಂಭವಾಗುವುದೇ ಒಂದು ನಗುವಿನ ವ್ಯಂಗ್ಯದೊಂದಿಗೆ. ಅಲ್ಲಿ ಮಗುವಿಗಾಗಿ ಬುಕ್ ಮಾಡಿದ ಸೀಟಿನಲ್ಲಿ ಮಗು ಕುಳಿತಿರಲಿಲ್ಲ. ಬದಲಿಗೆ, ಆ ಪುಟ್ಟ ಮಗು ತಾಯಿಯ ಮಡಿಲಲ್ಲಿ ಕುಳಿತು ಆರಾಮವಾಗಿ ನಿದ್ದೆ ಮಾಡುತ್ತಿತ್ತು. ಹಾಗಾದರೆ ಆ 1,500 ರೂಪಾಯಿಯ 'ಪ್ರೆಷಿಯಸ್' ಸೀಟಿನಲ್ಲಿ ಇದ್ದದ್ದೇನು ಗೊತ್ತಾ? ಆಕೆಯ 100 ರೂಪಾಯಿಯ ಚಪ್ಪಲಿಗಳು!

ಈ ವಿಡಿಯೋ ಅಪ್‌ಲೋಡ್ ಆದ ಕೆಲವೇ ಗಂಟೆಗಳಲ್ಲಿ ಲಕ್ಷಾಂತರ ವೀಕ್ಷಣೆ ಪಡೆದುಕೊಂಡಿದೆ. ಆದರೆ ಪ್ರತಿಕ್ರಿಯೆಗಳು ಮಾತ್ರ ಬೆಂಕಿ ಮತ್ತು ಮಂಜಿನಂತೆ ವಿಭಿನ್ನವಾಗಿವೆ.

ಕೆಲವರು ಇದನ್ನು ತಮಾಷೆಯಾಗಿ ತೆಗೆದುಕೊಂಡು, ನಿಮ್ಮ ಚಪ್ಪಲಿಯ ಅದೃಷ್ಟವೇ ಅದೃಷ್ಟ! ಚಪ್ಪಲಿಯಾಗಿ ಜನ್ಮ ಪಡೆದಿದ್ದರೂ ವಂದೇ ಭಾರತ್ ರೈಲಿನ ಸೀಟಿನ ಮೇಲೆ ಕುಳಿತು ಪ್ರಯಾಣ ಮಾಡುವ ಯೋಗ ಅದಕ್ಕಿತ್ತು ಎಂದು ಕಾಮೆಂಟ್ ಮಾಡಿದರೆ. ಇನ್ನು ಕೆಲವರು, ಜನರ ಬಳಿ ಹಣ ಹೆಚ್ಚಾದಾಗ ಇಂತಹ ಬುದ್ಧಿ ಬರುತ್ತದೆ. ಮಗುವಿಗೆ ಸೀಟು ಬೇಕಿಲ್ಲ ಎಂದಾದರೆ ಬುಕ್ ಮಾಡುವ ಅಗತ್ಯವೇನಿತ್ತು?" ಎಂದು ಗರಂ ಆಗಿದ್ದಾರೆ. ಮತ್ತೊಬ್ಬ ನೆಟ್ಟಿಗರು ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿ, ಇಷ್ಟೊಂದು ತ್ಯಾಗ ಮಾಡಿದ ನಿಮಗೆ ರಾಷ್ಟ್ರಪತಿಗಳಿಂದ ಪ್ರಶಸ್ತಿ ಕೊಡಿಸಬೇಕು ಎಂದು ವ್ಯಂಗ್ಯದ ಬಾಣ ಬಿಟ್ಟಿದ್ದಾರೆ.

ಒಂದು ಪುಟ್ಟ ವಿಡಿಯೋ, ಹತ್ತಾರು ಚರ್ಚೆ: ಈ ಘಟನೆ ಒಂದು ಕಡೆ ಹಾಸ್ಯಮಯವಾಗಿ ಕಂಡರೂ, ಮತ್ತೊಂದು ಕಡೆ ಸಾರ್ವಜನಿಕ ಆಸ್ತಿಯ ಬಳಕೆ ಮತ್ತು ನಮ್ಮ ಸೌಕರ್ಯಗಳ ಕುರಿತಾದ ಗಂಭೀರ ಚರ್ಚೆಗೂ ಹಾದಿ ಮಾಡಿಕೊಟ್ಟಿದೆ. ಅದು ತಮಾಷೆಯೇ ಇರಲಿ ಅಥವಾ ಟೀಕೆಯಿರಲಿ, ಈ 'ಚಪ್ಪಲಿ ಪ್ರಯಾಣ' ಮಾತ್ರ ಸದ್ಯಕ್ಕೆ ಇಂಟರ್ನೆಟ್‌ನಲ್ಲಿ ಸಖತ್ ಟ್ರೆಂಡಿಂಗ್‌ನಲ್ಲಿದೆ,(ಏಜನ್ಸೀಸ್).