ಇನ್ನೊಂದೆಡೆ ಹಸಿರು ಅನಕೊಂಡ ಅತ್ಯಂತ ಭಾರವಾದ ಹಾವುಗಳಲ್ಲಿ ಒಂದಾಗಿದೆ. ಇದು ಮುಖ್ಯವಾಗಿ ದಕ್ಷಿಣ ಅಮೆರಿಕದ ಜಲಮಯ ಪ್ರದೇಶಗಳಲ್ಲಿ ವಾಸಿಸುತ್ತದೆ. ನೀರಿನ ಸಮೀಪ ಸಿಗುವ ದೊಡ್ಡ ಪ್ರಾಣಿಗಳನ್ನು ಬೇಟೆಯಾಡುವ ಸಾಮರ್ಥ್ಯ ಇದಕ್ಕಿದೆ.ಆದರೆ ಮನುಷ್ಯನನ್ನು ಬೇಟೆಯಾಡುವುದು ಈ ಹಾವುಗಳ ಸಾಮಾನ್ಯ ಆಹಾರ ಪದ್ಧತಿ ಎಂದು ಹೇಳಲಾಗುವುದಿಲ್ಲ. ಇಂತಹ ಘಟನೆಗಳು ಬಹಳ ಅಪರೂಪ.
ಹಾವು ಮನುಷ್ಯನನ್ನು ಹೇಗೆ ಬೇಟೆಯಾಡುತ್ತದೆ?
ಇಲ್ಲಿ ಒಂದು ಮುಖ್ಯ ವಿಷಯವಿದೆ. ಈ ದೊಡ್ಡ ಹಾವುಗಳು ವಿಷಕಾರಿ ಹಾವುಗಳಂತೆ ಕಚ್ಚಿ ವಿಷವನ್ನು ಹರಡುವ ಮೂಲಕ ಬೇಟೆಯನ್ನು ಕೊಲ್ಲುವುದಿಲ್ಲ. ಹೆಬ್ಬಾವುಗಳು ಮತ್ತು ಅನಕೊಂಡಗಳು ಉಸಿರುಗಟ್ಟಿಸುವ ರೀತಿಯಲ್ಲಿ ಬೇಟೆಯನ್ನು ನಿಯಂತ್ರಿಸುವ ಹಾವುಗಳು. ಬೇಟೆ ಹಾವಿನ ವ್ಯಾಪ್ತಿಗೆ ಬಂದಾಗ ಅದು ಕ್ಷಿಪ್ರವಾಗಿ ದಾಳಿ ಮಾಡಿ ತನ್ನ ದೇಹವನ್ನು ಬೇಟೆಯ ಸುತ್ತಲೂ ಸುತ್ತಿಕೊಳ್ಳುತ್ತದೆ. ನಂತರ ಸ್ನಾಯುಗಳ ಬಲದಿಂದ ಬೇಟೆಯ ಚಲನೆಯನ್ನು ನಿಯಂತ್ರಿಸುತ್ತದೆ. ಹಾಗೂ ಅದರ ಮೂಳೆಗಳು ಮುರಿಯಬೇಕು ಅಷ್ಟು ಬಲವಾಗಿ ಬೇಟೆಯನ್ನು ಸುತ್ತಿಕೊಳ್ಳುತ್ತದೆ. ಬೇಟೆ ಚಲಿಸಲು ಸಾಧ್ಯವಾಗದ ಸ್ಥಿತಿಗೆ ಬಂದ ನಂತರ ಹಾವು ಅದನ್ನು ಸಂಪೂರ್ಣವಾಗಿ ನುಂಗಲು ಆರಂಭಿಸುತ್ತದೆ.
ಹಾವು ಬೇಟೆಯನ್ನು ಹಿಂಬಾಲಿಸುತ್ತದೆಯೇ?
ಅಗತ್ಯವಿದ್ದಾಗ ಹಾವು ಬೇಟೆಯನ್ನು ಹಿಂಬಾಲಿಸಬಹುದು. ಆದರೆ ದೊಡ್ಡ ಹೆಬ್ಬಾವುಗಳು ಸಾಮಾನ್ಯವಾಗಿ ತಮ್ಮ ಬೇಟೆಯನ್ನು ಗಂಟೆಗಟ್ಟಲೆ ಓಡಿಸಿಕೊಂಡು ಹೋಗುವುದಕ್ಕಿಂತ ಅಡಗಿಕೊಂಡು ಕಾಯುವ ತಂತ್ರವನ್ನು ಬಳಸುತ್ತವೆ. ಅವು ಪರಿಸರದಲ್ಲಿ ಬೆರೆತುಹೋಗುವಂತೆ ಮೌನವಾಗಿ ಕಾಯುತ್ತವೆ. ಬೇಟೆ ಹತ್ತಿರ ಬಂದಾಗ ಅತ್ಯಂತ ವೇಗವಾಗಿ ದಾಳಿ ಮಾಡುತ್ತವೆ. ನೀರಿನಲ್ಲಿರುವ ಅನಕೊಂಡಗಳು ನೀರಿನೊಳಗೆ ಬಹುತೇಕ ದೇಹವನ್ನು ಮರೆಮಾಡಿಕೊಂಡು ಬೇಟೆ ಹತ್ತಿರ ಬರುವವರೆಗೆ ಕಾಯಬಲ್ಲವು.
ಮನುಷ್ಯನನ್ನೇ ಬೇಟೆ ಎಂದು ಏಕೆ ಪರಿಗಣಿಸುತ್ತದೆ?
ಮನುಷ್ಯ ಈ ಹಾವುಗಳ ಸಾಮಾನ್ಯ ಆಹಾರವಲ್ಲ. ಆದರೂ ಅತ್ಯಂತ ದೊಡ್ಡ ಹಾವಿಗೆ ಮನುಷ್ಯನ ಗಾತ್ರದ ದೃಷ್ಟಿಯಿಂದ ಬೇಟೆಯಾಗುವ ಸಾಧ್ಯತೆಯನ್ನು ಸಂಪೂರ್ಣವಾಗಿ ತಳ್ಳಿಹಾಕಲು ಸಾಧ್ಯವಿಲ್ಲ. ವಿಶೇಷವಾಗಿ ಒಬ್ಬ ವ್ಯಕ್ತಿ ಹಾವಿನ ವಾಸಸ್ಥಳದ ಬಳಿ ಒಂಟಿಯಾಗಿ ಇದ್ದಾಗ, ಮಲಗಿರುವಾಗ ಅಥವಾ ನೀರಿನ ಅಂಚಿನಲ್ಲಿ ಇದ್ದಾಗ ಅಪರೂಪದ ದಾಳಿ ಸಂಭವಿಸಬಹುದು. ಆದರೆ, ಹಾವು ಮನುಷ್ಯರನ್ನು ಹುಡುಕಿಕೊಂಡು ಬಂದು ಬೇಟೆಯಾಡುತ್ತದೆ ಎಂಬ ಕಲ್ಪನೆ ಸರಿಯಲ್ಲ.
ಬೇಟೆಯನ್ನು ನುಂಗುವುದು ಹೇಗೆ?
ಹಾವು ಬೇಟೆಯನ್ನು ನಿಯಂತ್ರಿಸಿದ ನಂತರ ಅದನ್ನು ಸಾಮಾನ್ಯವಾಗಿ ತಲೆಯ ಭಾಗದಿಂದ ನುಂಗಲು ಆರಂಭಿಸುತ್ತದೆ. ಇದರಿಂದ ಬೇಟೆಯ ಕಾಲುಗಳು ಮತ್ತು ದೇಹದ ಇತರ ಭಾಗಗಳು ಸುಲಭವಾಗಿ ಹಾವಿನ ಬಾಯಿಯೊಳಗೆ ಹೋಗಲು ನೆರವಾಗುತ್ತವೆ. ಹಾವಿನ ದವಡೆಯ ವಿಶೇಷ ರಚನೆಯಿಂದ ಬಾಯಿ ಬಹಳಷ್ಟು ವಿಸ್ತರಿಸಿಕೊಳ್ಳುತ್ತದೆ. ಅದರ ಕೆಳದವಡೆಯ ಎರಡು ಭಾಗಗಳು ಹೆಚ್ಚು ಚಲಿಸಬಲ್ಲ ಕಾರಣ ದೊಡ್ಡ ಬೇಟೆಯನ್ನು ನಿಧಾನವಾಗಿ ಒಳಕ್ಕೆ ಎಳೆಯಲು ಸಾಧ್ಯವಾಗುತ್ತದೆ. ಹಾವು ಆಹಾರವನ್ನು ಜಗಿಯುವುದಿಲ್ಲ. ಸಂಪೂರ್ಣ ಬೇಟೆಯನ್ನೇ ನುಂಗುತ್ತದೆ.
