ಅಯೋಧ್ಯೆಗೆ ಬಂದ ಬಾಲರಾಮ: ಮುಗ್ಧ ಮಗುವಿನ ವಿಡಿಯೋ ನೋಡಿ ಕಣ್ತುಂಬಿಕೊಂಡ ಭಕ್ತಸಮೂಹ! Ayodhya RamLalla

ಅಯೋಧ್ಯೆ: ಉತ್ತರಪ್ರದೇಶದ ಅಯೋಧ್ಯೆಯಲ್ಲಿ ರಾಮಲಲ್ಲಾ (Ayodhya RamLalla) ನ ಪ್ರಾಣಪ್ರತಿಷ್ಠಾಪನೆಯಾದ ನಂತರ ಪ್ರತಿದಿನವೂ ಅಲ್ಲಿ ಒಂದಲ್ಲ ಒಂದು ವಿಶೇಷತೆಗಳು ನಡೆಯುತ್ತಲೇ ಇರುತ್ತವೆ. ಆದರೆ ಇತ್ತೀಚೆಗೆ ಅಯೋಧ್ಯೆಯ ಮಂದಿರದ ಆವರಣದಲ್ಲಿ ಕಂಡುಬಂದ ದೃಶ್ಯವೊಂದು ಭಕ್ತರ ಕಣ್ಣುಗಳಲ್ಲಿ ಆನಂದಬಾಷ್ಪ ತರಿಸಿದೆ. ಸಾಕ್ಷಾತ್ ಆ ರಾಮಲಲ್ಲಾನೇ ಮಗು ರೂಪದಲ್ಲಿ ಮಂದಿರದ ಆವರಣದಲ್ಲಿ ನಡೆದುಕೊಂಡು ಹೋಗುತ್ತಿದ್ದಾನೋ ಎನ್ನುವಂತಹ ಅದ್ಭುತ ದೃಶ್ಯವೊಂದು ಈಗ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗುತ್ತಿದೆ.

ವೈರಲ್ ಆಗಿರುವ ವಿಡಿಯೋನಲ್ಲಿ, ಪುಟ್ಟ ಮಗುವೊಂದು ರಾಮಲಲ್ಲಾನ ಅಲಂಕಾರದಲ್ಲಿ ಅಂದರೆ ತಲೆಯಲ್ಲಿ ಬಂಗಾರದ ಕಿರೀಟ, ಕೈಯಲ್ಲಿ ಪುಟ್ಟ ಬಿಲ್ಲು-ಬಾಣ ಹಿಡಿದು ತಾಯಿಯ ಕೈಹಿಡಿದು ಮಂದಿರದ ಆವರಣದಲ್ಲಿ ಹೆಜ್ಜೆ ಹಾಕುತ್ತಿದೆ. ಮಗುವಿನ ಮುಖದಲ್ಲಿರುವ ಆ ಮುಗ್ಧತೆ ಮತ್ತು ದೈವಿಕ ಕಳೆ ಕಂಡ ಭಕ್ತರು ಒಂದು ಕ್ಷಣ ಸ್ತಬ್ಧರಾಗಿದ್ದಾರೆ. ಮಂದಿರಕ್ಕೆ ಬಂದಿದ್ದ ಸಾವಿರಾರು ಭಕ್ತರು ತಮ್ಮ ಆರಾಧ್ಯ ದೈವದ ಬಾಲರೂಪವನ್ನೇ ಈ ಮಗುವಿನಲ್ಲಿ ಕಂಡು ಭಾವುಕರಾಗಿದ್ದಾರೆ.

ಸಾಮಾನ್ಯವಾಗಿ ಅಯೋಧ್ಯೆಯಲ್ಲಿ ಭಕ್ತರ ದಟ್ಟಣೆ ಹೆಚ್ಚಿರುತ್ತದೆ. ಆದರೆ ಈ ಪುಟಾಣಿ ರಾಮನನ್ನು ಕಂಡ ಕೂಡಲೇ ಜನರು ಹೋಗುವುದನ್ನು ನಿಲ್ಲಿಸಿ, ಮಗುವನ್ನು ಸುತ್ತುವರೆದಿದ್ದಾರೆ. ಪ್ರತಿಯೊಬ್ಬರೂ ಈ ಸುಂದರ ಕ್ಷಣವನ್ನು ತಮ್ಮ ಮೊಬೈಲ್ ಕ್ಯಾಮೆರಾದಲ್ಲಿ ಸೆರೆಹಿಡಿಯಲು ಮುಗಿಬಿದ್ದಿದ್ದಾರೆ. ಮಗು ತನ್ನ ಪುಟ್ಟ ಹೆಜ್ಜೆಗಳನ್ನು ಹಾಕುತ್ತಾ ಸಾಗುತ್ತಿದ್ದರೆ, ಭಕ್ತರು ಜೈ ಶ್ರೀರಾಮ್ ಎಂಬ ಘೋಷಣೆಗಳನ್ನು ಕೂಗುತ್ತಾ ಮಗುವಿಗೆ ದಾರಿಕೊಟ್ಟಿದ್ದಾರೆ. ಅನೇಕರು ನಮಗೆ ಸಾಕ್ಷಾತ್ ರಾಮಲಲ್ಲಾನೇ ದರ್ಶನ ಕೊಟ್ಟ ಅನುಭವವಾಯಿತು ಎಂದು ತಮ್ಮ ಅನಿಸಿಕೆ ಹಂಚಿಕೊಂಡಿದ್ದಾರೆ.

ಈ ಹೃದಯಸ್ಪರ್ಶಿ ವಿಡಿಯೋ ಅಪ್‌ಲೋಡ್ ಆದ ಕೆಲವೇ ಗಂಟೆಗಳಲ್ಲಿ ಲಕ್ಷಾಂತರ ಜನರು ಇದನ್ನು ವೀಕ್ಷಿಸಿದ್ದಾರೆ. ಇಂಟರ್ನೆಟ್ ಲೋಕದಲ್ಲಿ ಈ ಮಗು ಈಗ ದೊಡ್ಡ ಸೆಲೆಬ್ರಿಟಿಯಾಗಿ ಬಿಟ್ಟಿದ್ದಾನೆ. ವಿಡಿಯೋ ನೋಡಿದ ಪ್ರತಿಯೊಬ್ಬರೂ ಮಗುವಿನ ಮುಗ್ಧತೆಗೆ ಮಾರುಹೋಗಿದ್ದಾರೆ.

ವಿಡಿಯೋದ ಕಾಮೆಂಟ್ ಬಾಕ್ಸ್‌ನಲ್ಲಿ ಭಕ್ತಿಯ ಮಹಾಪೂರವೇ ಹರಿಯುತ್ತಿದೆ. ಒಬ್ಬ ಬಳಕೆದಾರರು ಇದು ಕೇವಲ ಮಗುವಲ್ಲ, ಭಕ್ತಿಯ ಪ್ರತಿರೂಪ ಎಂದು ಬರೆದರೆ, ಇನ್ನೊಬ್ಬರು ನನ್ನ ದಿನದ ಆರಂಭಕ್ಕೆ ಇದಕ್ಕಿಂತ ಸುಂದರವಾದ ವಿಡಿಯೋ ಬೇಕಿರಲಿಲ್ಲ ಎಂದು ಕಮೆಂಟ್ ಮಾಡಿದ್ದಾರೆ. ಇನ್ನು ಕೆಲವರು ಮಗುವಿನ ತಾಯಿಯ ಭಕ್ತಿಯನ್ನು ಮೆಚ್ಚಿಕೊಂಡಿದ್ದಾರೆ. ಒಟ್ಟಿನಲ್ಲಿ ಅಯೋಧ್ಯೆಯ ಈ ಪುಟ್ಟ ರಾಮ ಈಗ ದೇಶಾದ್ಯಂತ ಜನರ ಮನಗೆದ್ದಿದ್ದಾನೆ ಎಂದರೆ ತಪ್ಪಿಲ್ಲ,(ಏಜನ್ಸೀಸ್​).