ನವದೆಹಲಿ: ಪಿಟ್ಬುಲ್ ತಳಿಯ ನಾಯಿಗಳು ನೋಡಲು ಎಷ್ಟು ಮುದ ನೀಡುತ್ತವೋ ಅದೇ ರೀತಿ ಕೆಲವೊಮ್ಮೆ ತಮ್ಮ ಸಿಟ್ಟಿನಿಂದಲೂ ಸಹ ಹೆಚ್ಚು ಸದ್ದು ಮಾಡುತ್ತವೆ. ಕಳೆದ ಕೆಲ ತಿಂಗಳ ಹಿಂದೆ ಲಕ್ನೋದಲ್ಲಿ ಇದೇ ಪಿಟ್ಬುಲ್ ಥಳಿಯ ನಾಯಿ ವೃದ್ಧರೊಬ್ಬರನ್ನು ಕೊಂದ ಸುದ್ದಿ ಮಾಸುವ ಮುನ್ನವೇ ಪುಟ್ಟ ಬಾಲಕನೋರ್ವ ಇದರ ದಾಳಿಯಿಂದ ಸ್ವಲ್ಪದರಲ್ಲೇ ಪಾರಾಗಿರುವ ಘಟನೆ ಬೆಳಕಿಗೆ ಬಂದಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿರುವ ವಿಡಿಯೋದಲ್ಲಿ ಬಾಲಕನೋರ್ವ ಪಿಟ್ಬುಲ್ಗೆ ನೀರಿನ ಬಾಟಲಿಯಿಂದ ಒಮ್ಮೆ ಹೊಡೆಯುತ್ತಾನೆ. ಈ ವೇಳೆ ಮಾಲೀಕ ಜೊತೆಯಲ್ಲಿದ್ದ ಕಾರಣ ಅದು ಸುಮ್ಮನಾಗುತ್ತದೆ. ಇದಾದ ಬಳಿಕ ಇದನ್ನೇ ರೂಡಿ ಮಾಡಿಕೊಂಡ ಬಾಲಕ ಅದಕ್ಕೆ ಪದೇ ಪದೇ ಹೊಡೆಯಲು ಶುರು ಮಾಡುತ್ತಾನೆ.
ಇದನ್ನೂ ಓದಿ: VIDEO| ಟ್ರ್ಯಾಕ್ಟರ್ ಚಲಾಯಿಸಿ ಕೃಷಿಕನ ಲುಕ್ನಲ್ಲಿ ಕಾಣಿಸಿಕೊಂಡ ರಾಹುಲ್ ಗಾಂಧಿ!
ಈ ವೇಳೆ ನೆರದಿದ್ದ ಜನ ನಾಯಿಯಿಂದ ದೂರ ಇರುವಂತೆ ಬಾಲಕನಿಗೆ ಸೂಚಿಸುತ್ತಾರೆ. ಅದರಂತೆ ಮೊದಲಿಗೆ ಸುಮ್ಮನಾಗುವ ಬಾಲಕ ಬಳಿಕ ತನ್ನ ಹಳೇ ಚಾಳಿಯನ್ನ ಮುಂದುವರೆಸುತ್ತಾನೆ. ಇದರಿಂದ ಸಿಟ್ಟಿಗೆದ್ದ ನಾಯಿ ಏಕಾಏಕಿ ಅವನ ಮೇಲೆ ದಾಳಿ ಮಾಡುತ್ತದೆ. ಈ ವೇಳೆ ಅಲ್ಲೇ ಇದ್ದ ಶ್ವಾನದ ಮಾಲೀಕ ಅದನ್ನು ತಡೆದಿದ್ದಾನೆ.
ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಬಾಲಕ ಹೆದರಿಕೆಯಿಂದ ಓಡಿ ಹೋಗುತ್ತಿರುವುದು ಕಂಡು ಬರುತ್ತದೆ. ಇನ್ನು ಈ ವಿಡಿಯೋ ಪರ-ವಿರೋಧದ ಚರ್ಚೆ ಹುಟ್ಟು ಹಾಕಿದ್ದು, ಹೆಚ್ಚಿನ ಜನ ಪುಟ್ಟ ಬಾಲಕನ ನಡೆ ಹಾಗೂ ಆತನ ಪೋಷಕರ ವಿರುದ್ಧ ಕಿಡಿಕಾರಿದ್ದಾರೆ.