ಧರ್ಮಣ್ಣ ಮತ್ತು ಸತ್ಯಪ್ರಕಾಶ್​ ಸತ್ಯವನ್ನೇ ಹೇಳುವ ಮೂರೂವರೆ ನಿಮಿಷದ ಕಿರುಚಿತ್ರ

ಬೆಂಗಳೂರು: ಕಾಮಿಡಿ ನಟ ಧರ್ಮಣ್ಣ ಕಡೂರು ಸೇರಿ ಒಂದು ತಿಂಗಳಾಗಿದೆ. ಹಬ್ಬಕ್ಕೆ ಅವರು, ‘ರಾಮ ರಾಮಾ ರೇ’ ನಿರ್ದೇಶಕ ಸತ್ಯಪ್ರಕಾಶ್ ಇಬ್ಬರೂ ಊರಿಗೆ ಹೋಗಿದ್ದಾರೆ. ಹೋಗಿ ಎರಡೇ ದಿನಕ್ಕೆ ಲಾಕ್​ಡೌನ್ ಘೋಷಣೆಯಾಗಿದೆ. ಈಗ ಸದ್ಯ ಊರಿನಲ್ಲೇ ಇರುವ ಅವರು, ಸದ್ದಿಲ್ಲದೆ ಮೂರೂವರೆ ನಿಮಿಷದ ಒಂದು ಕಿರುಚಿತ್ರ ಮಾಡಿದ್ದಾರೆ.

ಹೌದು, ಸತ್ಯ ಮತ್ತು ಧರ್ಮಣ್ಣ ಇಬ್ಬರೂ ಸತ್ಯವನ್ನೇ ಹೇಳುತ್ತೇನೆ ಎಂಬ ಹೆಸರಿನಲ್ಲಿ ಒಂದು ಕಿರುಚಿತ್ರ ಮಾಡಿ, ಅದನ್ನು ಯೂಟ್ಯೂಬ್​ನಲ್ಲಿ ಬಿಡುಗಡೆ ಮಾಡಿದ್ದಾರೆ. ಈ ಚಿತ್ರದ ಪರಿಕಲ್ಪನೆ ಮತ್ತು ನಿರ್ದೇಶನದ ಜವಾಬ್ದಾರಿಯನ್ನು ಸತ್ಯ ವಹಿಸಿಕೊಂಡರೆ, ಧರ್ಮಣ್ಣ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.

ಈ ಸಾಹಸದಲ್ಲಿ ವಾಸುಕಿ ವೈಭವ್ ಸಹ ಕೈಜೋಡಿಸಿದ್ದು, ಅವರು ಸಂಗೀತ ಸಂಯೋಜಿಸಿದ್ದಾರೆ. ಇನ್ನು ಹಿರಿಯ ಸಂಕಲನಕಾರ ಬಿ.ಎಸ್. ಕೆಂಪರಾಜು, ಈ ಕಿರುಚಿತ್ರವನ್ನು ಎಡಿಟ್ ಮಾಡಿದ್ದಾರೆ. ಇಷ್ಟಕ್ಕೂ ಈ ಕಿರುಚಿತ್ರದ ವಿಶೇಷತೆ ಏನು ಎಂದರೆ, ‘ಮನುಷ್ಯರಿಗೆ ಕೆಮ್ಮು ಬರುವುದು ಸಾಮಾನ್ಯ. ಅದೇ ವಸ್ತುಗಳಿಗೆ ಕೆಮ್ಮು ಬಂದರೆ ಎಲ್ಲಿಗೆ ಹೋಗೋದು? ಅದು ಹೇಗೆ ಸಾಧ್ಯ ಅಂತೀರಾ. ಎಲ್ಲೆಲ್ಲೂ ಕರೊನಾ ಬಗ್ಗೆ ಕೇಳಿಕೇಳಿ ಸುಸ್ತಾಗುವ ಮನುಷ್ಯನೊಬ್ಬನಿಗೆ ನಿರ್ಜೀವ ವಸ್ತುಗಳು ಸಹ ಕೆಮ್ಮುವಂತೆ ಕೇಳಿಸುತ್ತದೆ.

ಆ ನಂತರ ಅವನ ಮನಸ್ಥಿತಿ ಹೇಗಿರುತ್ತದೆ ಮತ್ತು ಅವನು ಏನೆಲ್ಲಾ ಮಾಡುತ್ತಾನೆ’ ಎನ್ನುವುದನ್ನು ಹಾಸ್ಯಮಯವಾಗಿ ಹೇಳುವ ಪ್ರಯತ್ನ ಮಾಡಿದ್ದೇವೆ’ ಎನ್ನುತ್ತಾರೆ ಧರ್ಮಣ್ಣ. ಇದು ಒಂದೇ ವಿಷಯಕ್ಕೆ ಮುಗಿಯುವುದಿಲ್ಲ, ಮುಂದಿನ ದಿನಗಳಲ್ಲಿ ‘ಸತ್ಯವನ್ನೇ ಹೇಳುತ್ತೇನೆ’ ಸೀರೀಸ್​ನಲ್ಲಿ ಇನ್ನಷ್ಟು ಕಿರುಚಿತ್ರಗಳನ್ನು ಮಾಡುವ ಯೋಚನೆ ಇದೆ ಎನ್ನುತ್ತಾರೆ ಧರ್ಮಣ್ಣ. ಈಗ ಮೊದಲ ಕಿರುಚಿತ್ರ ಬಿಡಗುಡೆಯಾಗಿದ್ದು, ಮುಂದಿನ ದಿನಗಳಲ್ಲಿ ‘ಸತ್ಯವನ್ನೇ ಹೇಳುತ್ತೇನೆ’ ಹೆಸರಿನಲ್ಲಿ ಇನ್ನಷ್ಟು ಬಿಡುಗಡೆಯಾಗುವ ಸಾಧ್ಯತೆ ಇದೆ.