ಕರಾವಳಿಯಲ್ಲಿ ಮೇ ತಿಂಗಳಿನಲ್ಲಿ ಒಂದೆರೆಡು ಬಾರಿ ಮಳೆಯಾಗಿದ್ದರೂ, ತಾಪವಾನ ದಿನದಿಂದ ದಿನಕ್ಕೆ ಏರಿಕೆಯಾಗುತ್ತಿದೆ. ಇದು ಎಳನೀರು ಉದ್ಯಮದ ಮೇಲೆ ಪರಿಣಾಮ ಬೀರಿದ್ದು, ಮಾರುಕಟ್ಟೆಗೆ ಪೂರೈಕೆ ಕಡಿಮೆಯಾಗಿದ್ದರಿಂದ ಎಳನೀರಿನ ದರದಲ್ಲೂ ಹೆಚ್ಚಳವಾಗಿದೆ.
ಬಿಸಿಲಿನ ಬೇಗೆಯ ಪರಿಣಾಮದಿಂದ ಪಾರಾಗಲು ಜನರು ಎಳನೀರು ಸಹಿತ ತಂಪು ಪಾನೀಯಗಳತ್ತ ಮುಖಮಾಡಿದ್ದು, ಮಾರುಕಟ್ಟೆಯಲ್ಲಿ ಸೀಯಾಳಕ್ಕೆ ಭರ್ಜರಿ ಬೇಡಿಕೆ ಕಂಡುಬಂದಿದೆ. ಆದರ ವಿಪರೀತ ಬಿಸಿಯ ವಾತಾವರಣದಿಂದಾಗಿ ಸೀಯಾಳ ಇಳುವರಿ ಕಡಿಮೆಯಾಗಿದ್ದು, ಮಾರುಕಟ್ಟೆ ಮೇಲೆ ಹೊಡೆತ ಬಿದ್ದಿದೆ. ಊರಿನ ಎಳನೀರು ಇಳುವರಿ ಇಳಿಕೆ ಹಾಗೂ ಮಲೆನಾಡು ಪ್ರದೇಶಗಳಿಂದ ಕರಾವಳಿ ಮಾರುಕಟ್ಟೆಗೆ ಪೂರೈಕೆಯಾಗುತ್ತಿದ್ದ ಎಳನೀರು ಈ ಬಾರಿ ನಿರೀಕ್ಷಿತ ಪ್ರಮಾಣದಲ್ಲಿ ಬರುತ್ತಿಲ್ಲ. ಈ ಎಲ್ಲ ಕಾರಣಗಳಿಂದ ಎಳನೀರಿನ ದರ ಗಗನಮುಖಿಯಾಗಿದೆ.
